ନୂଆଦିଲ୍ଲୀ: ଥାଇଲ୍ୟାଣ୍ଡ ଏବଂ ପଡ଼ୋଶୀ ମିଆଁମାରରେ ଆଜି (ଶୁକ୍ରବାର) ୭.୭ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଛି। ଭୂମିକମ୍ପ ଯୋଗୁଁ ମିଆଁମାର ଛଅଟି ଅଞ୍ଚଳ ଏବଂ ରାଜ୍ୟରେ ଜରୁରୀକାଳୀନ ପରିସ୍ଥିତି ଘୋଷଣା କରିଛି। ଭୂମିକମ୍ପର କେନ୍ଦ୍ରସ୍ଥଳ ମିଆଁମାରର ଦ୍ୱିତୀୟ ବୃହତ୍ତମ ସହର ମାଣ୍ଡାଲେ ନିକଟରେ ଥିଲା। ବ୍ୟାଙ୍କକରେ ଭୂମିକମ୍ପ ଯୋଗୁଁ ଏକ ନିର୍ମାଣାଧୀନ ବହୁମହଲା କୋଠା ଭୁଶୁଡ଼ି ପଡ଼ିବା ପରେ ଏକ ବିରାଟ ଧୂଳିକଣା ଉଠିଥିବା ଦେଖାଯାଇଥିଲା। ସେହି ସମୟରେ କୋଠାରେ ଏକ କ୍ରେନ୍ ଲାଗିଥିଲା।
ବିବିସି ରିପୋର୍ଟ ଅନୁଯାୟୀ,ମିଆଁମାରର ଦ୍ୱିତୀୟ ବୃହତ୍ତମ ସହର ମାଣ୍ଡାଲେର ଜଣେ ଉଦ୍ଧାର କର୍ମୀ କହିଛନ୍ତି ଯେ, ଭୂମିକମ୍ପ ଯୋଗୁଁ ସେଠାରେ ବହୁତ କ୍ଷତି ହୋଇଛି। ସେ ମୃତ୍ୟୁ ସମ୍ପର୍କରେ କୌଣସି ନିଶ୍ଚିତ ସଂଖ୍ୟା ଦେଇ ନଥିଲେ ବି ମୃତ୍ୟୁ ସଂଖ୍ୟା ୧୫୦ ରୁ ଅଧିକ ହେବାର ଆଶଙ୍କା କରାଯାଉଛି। ରେଡକ୍ରସ ମଧ୍ୟ କହିଛି ଯେ, ବହୁତ କ୍ଷତି ହୋଇଛି। ରେଡକ୍ରସ ଏକ ଅନ୍ତର୍ଜାତୀୟ ମାନବିକ ସଂଗଠନ ଯାହା ଯୁଦ୍ଧ ଏବଂ ବିପର୍ଯ୍ୟୟ ଦ୍ୱାରା ପ୍ରଭାବିତ ଲୋକଙ୍କୁ ସାହାଯ୍ୟ କରେ।
ରେଡକ୍ରସ କହିଛି ଯେ,"ପ୍ରାଥମିକ ଭୂମି ରିପୋର୍ଟ ସୂଚାଇ ଦେଉଛି ଯେ ଭୂମିକମ୍ପରେ ବହୁତ କ୍ଷତି ହୋଇଛି । ମାନବିକ ସହାୟତା ସମ୍ପର୍କରେ ସୂଚନା ସଂଗ୍ରହ କରାଯାଉଛି।" ଗ୍ରେଟର ବ୍ୟାଙ୍କକ ଅଞ୍ଚଳରେ ୧.୭୦ କୋଟି ଅଧିକ ଲୋକ ବାସ କରନ୍ତି, ସେମାନଙ୍କ ମଧ୍ୟରୁ ଅନେକ ଉଚ୍ଚ କୋଠାରେ ରୁହନ୍ତି। ବ୍ୟାଙ୍କକର ସହର କେନ୍ଦ୍ରରେ ଏକ କାର୍ଯ୍ୟାଳୟ କୋଠାରେ କାମ କରୁଥିବା ଏପ୍ରିଲ କାନିଚାଭାନାକୁଲ କହିଛନ୍ତି ଯେ ସେ ପ୍ରଥମେ ଜାଣି ନଥିଲେ ଯେ ଏହା ଏକ ଭୂମିକମ୍ପ ଥିଲା । କାରଣ ଏହା ପ୍ରଥମ ଥର ପାଇଁ ସେ ଅନୁଭବ କରିଥିଲେ।
