ଇସ୍ଲାମାବାଦ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଏବଂ ପିଟିଆଇ ଦଳର ମୁଖ୍ୟ ଇମ୍ରାନ ଖାନଙ୍କ ନାମ ନୋବେଲ ଶାନ୍ତି ପୁରସ୍କାର ପାଇଁ ସୁପାରିଶ କରାଯାଇଛି । ୱାର୍ଲ୍ଡ ଆଲାଏନ୍ସ (PWA) ଏବଂ ନରୱେର ରାଜନୈତିକ ଦଳ ସେଣ୍ଟ୍ରମ୍ ଦ୍ୱାରା ଏହି ଘୋଷଣା କରାଯାଇଛି। ପାକିସ୍ତାନ ୱାର୍ଲ୍ଡ ଆଲାଏନ୍ସ  ଏକ ଓକିଲ ସଂଗଠନ ଏବଂ ଏହା ୨୦୨୩ରେ ପ୍ରତିଷ୍ଠା ହୋଇଥିଲା । ଏହି ସଂଗଠନ ନରୱେର ରାଜନୈତିକ ଦଳ ସେଣ୍ଟ୍ରମ୍ ସହିତ ଜଡିତ । ସେଣ୍ଟ୍ରମ୍ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ (ଟ୍ୱିଟର) ରେ ଏହା ସ୍ପଷ୍ଟ କରିଛି। 

ନୋବେଲ ଶାନ୍ତି ପୁରସ୍କାର ପାଇଁ ଇମ୍ରାନ ଖାନଙ୍କ ନାମ ଦ୍ୱିତୀୟ ଥର ଲାଗି ସୁପାରିଶ କରାଯାଇଛି । ଦକ୍ଷିଣ ଏସିଆରେ ଶାନ୍ତି ପ୍ରତିଷ୍ଠା ପାଇଁ ତାଙ୍କର ଅବଦାନ ଯୋଗୁଁ ଇମ୍ରାନ ଖାନଙ୍କ ନାମ ୨୦୧୯ ରେ ନୋବେଲ ଶାନ୍ତି ପୁରସ୍କାର ପାଇଁ ସୁପାରିଶ କରାଯାଇଥିଲା। ପ୍ରତିବର୍ଷ ନରୱେ ନୋବେଲ କମିଟି ଶହ ଶହ ନାମାଙ୍କନ ଗ୍ରହଣ କରିଥାଏ, ଏହା ପରେ ସେମାନେ ଆଠ ମାସର ପ୍ରକ୍ରିୟା ମାଧ୍ୟମରେ ବିଜେତା ଚୟନ କରନ୍ତି ବୋଲି ଦି ଏକ୍ସପ୍ରେସ ଟ୍ରିବ୍ୟୁନରେ ରିପୋର୍ଟ ପ୍ରକାଶ ପାଇଛି । 

ପାକିସ୍ତାନର ମୁଖ୍ୟ ବିରୋଧୀ ଦଳ ପାକିସ୍ତାନ ତେହେରିକ-ଏ-ଇନସାଫ (ପିଟିଆଇ) ର ପ୍ରତିଷ୍ଠାତା ଇମ୍ରାନ ଖାନ ଅଗଷ୍ଟ ୨୦୨୩ରୁ ଜେଲରେ ଅଛନ୍ତି। କ୍ଷମତାର ଅପବ୍ୟବହାର ଏବଂ ଦୁର୍ନୀତି ମାମଲାରେ ଖାନଙ୍କୁ ୧୪ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି। ଏପ୍ରିଲ ୨୦୨୨ ରେ ଇମ୍ରାନ ଖାନଙ୍କୁ କ୍ଷମତାରୁ ବହିଷ୍କାର କରାଯାଇଥିଲା । ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗକୁ ସେ ରାଜନୈତିକ ଉଦ୍ଦେଶ୍ୟମୂଳକ ବୋଲି କହିଆସିଛନ୍ତି ।