ନୂଆଦିଲ୍ଲୀ: ପବିତ୍ର ରମଜାନ ମାସରେ ଶୁକ୍ରବାର ନମାଜ ସମୟରେ ମିଆଁମାରରେ ଶକ୍ତିଶାଳୀ ୭.୭ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା, ଯାହା ଫଳରେ ଲୋକମାନେ ଭୟଭୀତ ହୋଇ ପଡ଼ିଥିଲେ । ବର୍ତ୍ତମାନ ଆସିଥିବା ଏକ ରିପୋର୍ଟ ଅନୁଯାୟୀ, ସ୍ପ୍ରିଙ୍ଗ ରିଭୋଲ୍ୟୁସନ୍ ମିଆଁମାର ମୁସଲିମ୍ ନେଟୱାର୍କ କହିଛି ଯେ, ବିପର୍ଯ୍ୟୟରେ ୭୦୦ ରୁ ଅଧିକ ଶ୍ରଦ୍ଧାଳୁ ମସଜିଦ ଭିତରେ ଫସି ରହିଥିଲେ ଏବଂ ସେମାନଙ୍କ ମୃତ୍ୟୁ ହୋଇଥିଲା। ମିଆଁମାରର ମାଣ୍ଡାଲେରେ ହୋଇଥିବା ଭୟଙ୍କର ଭୂମିକମ୍ପରେ ହଜାର ହଜାର ଲୋକଙ୍କର ମୃତ୍ୟୁ ହୋଇଥିଲା। ତେବେ ସରକାରୀ ସଂଖ୍ୟା ଅନୁସାରେ, ମୋଟ ୧୭୦୦ ଲୋକଙ୍କର ମୃତ୍ୟୁ ହୋଇଛି। ଏହି ସମୟ ମଧ୍ୟରେ ୬୦ ଟି ମସଜିଦ ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି । ଏହାର ମୁଖ୍ୟ କାରଣ ହେଉଛି ଏଗୁଡିକ ବହୁ ବର୍ଷ ପୁରୁଣା ।
ସ୍ପ୍ରିଙ୍ଗ ରିଭୋଲ୍ୟୁସନ୍ ମିଆଁମାର ମୁସଲିମ୍ ନେଟୱାର୍କର ସଦସ୍ୟ ତୁନ୍ କି କହିଛନ୍ତି ଯେ, ଶୁକ୍ରବାର ନମାଜ ସମୟରେ ଭୂମିକମ୍ପ ହୋଇଥିଲା, ଯେତେବେଳେ ମସଜିଦ ଗୁଡ଼ିକରେ ଶ୍ରଦ୍ଧାଳୁ ମାନେ ଭିଡ଼ ଜମାଇଥିଲେ। ଏହା ଫଳରେ ଅନେକ ମସଜିଦ ଭୁଶୁଡ଼ି ପଡ଼ିଥିଲା ଏବଂ ଶହ ଶହ ଲୋକ ଭଗ୍ନାବଶେଷ ତଳେ ପୋତି ହୋଇଯାଇଥିଲେ। ଇରାୱାଡି ଅନଲାଇନ୍ ନ୍ୟୁଜ୍ ପୋର୍ଟାଲ୍ ଦ୍ୱାରା ସେୟାର କରାଯାଇଥିବା ଏକ ଭିଡିଓରେ ଅନେକ ମସଜିଦ୍ ଭୁଶୁଡ଼ି ପଡୁଥିବା ଏବଂ ଲୋକମାନେ ନିଜ ଜୀବନ ବଞ୍ଚାଇବା ପାଇଁ ଦୌଡ଼ୁଥିବାର ଦେଖାଯାଇଛି। ଏହି ମସଜିଦଗୁଡ଼ିକ ମଧ୍ୟରୁ ଅନେକ ଐତିହାସିକ କୋଠା ଥିଲା, ଯାହା ଭୂମିକମ୍ପ କମ୍ପନକୁ ସହ୍ୟ କରିପାରି ନ ଥିଲା।
ସରକାରୀ ରିପୋର୍ଟ ଅନୁଯାୟୀ, ମୃତ୍ୟୁ ସଂଖ୍ୟା ୧୭୦୦ ରୁ ଅଧିକ ପହଞ୍ଚିଛି, କିନ୍ତୁ ମସଜିଦରେ ମୃତ୍ୟୁବରଣ କରିଥିବା ୭ ଶହରୁ ଅଧିକ ଲୋକଙ୍କୁ ଏହି ସଂଖ୍ୟାରେ ଅନ୍ତର୍ଭୁକ୍ତ କରାଯାଇଛି କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହି ଭୟଙ୍କର ବିପର୍ଯ୍ୟୟ ପରେ, ଉଦ୍ଧାର ଦଳ ଏବଂ ରିଲିଫ୍ ସଂଗଠନ ଗୁଡ଼ିକ ଦ୍ରୁତ ଗତିରେ ରିଲିଫ୍ କାର୍ଯ୍ୟରେ ନିୟୋଜିତ ଅଛନ୍ତି। ତଥାପି, ମିଆଁମାରରେ ଚାଲିଥିବା ରାଜନୈତିକ ଅସ୍ଥିରତା ଯୋଗୁଁ, ରିଲିଫ୍ କାର୍ଯ୍ୟ ଅନେକ ପ୍ରତିବନ୍ଧକର ସମ୍ମୁଖୀନ ହେଉଛି ।
