ନୂଆଦିଲ୍ଲୀ,୦୨/୦୪: ୟୁକ୍ରେନ୍-ରୁଷ୍ ମଧ୍ୟରେ ଚାଲିଥିବା ଯୁଦ୍ଧରେ ବିରାମ ପାଇଁ ଆମେରିକାର ଉଦ୍ୟମକୁ ଝଟକା ଲାଗିଛି । ଯୁଦ୍ଧବିରତି ଲାଗି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପକ୍ଷରୁ ଦିଆଯାଇଥିବା ପ୍ରସ୍ତାବ ମଞ୍ଜୁର ନୁହେଁ ବୋଲି ରୁଷ୍ କହିଛି । ଟ୍ରମ୍ପ୍ଙ୍କ ପ୍ରସ୍ତାବ ଉପରେ ଅତି ଗମ୍ଭୀରତାର ସହ ବିଚାର କରଯାଉଛି । କିନ୍ତୁ ଏବେ ଡିଲ୍ରେ ଥିବା ସର୍ତ୍ତ ରୁଷ୍କୁ ଗ୍ରହଣୀୟ ନୁହେଁ ବୋଲି ରୁଷ୍ର ଉପବିଦେଶ ମନ୍ତ୍ରୀ ସର୍ଗେଇ ରିଆଭ୍କୋଭ୍ କହିଥିବା ନେଇ ରିପୋର୍ଟ ପ୍ରକାଶ ପାଇଛି । ଏଥିସହ ଆମେରିକା ଦେଇଥିବା ପ୍ରସ୍ତାବକୁ ଅସ୍ୱୀକାର କରି ରୁଷ୍ ନିଜ ଦାବିର ଏକ ତାଲିକା ଆମେରିକାକୁ ଧରାଇଥିବା ରିପୋର୍ଟରୁ ଜଣାପଡ଼ିଛି । ରିଆଭ୍କୋଭ୍ କହିଛନ୍ତି, ଆମେରିକାର ୟୁକ୍ରେନ୍ ଡିଲ୍ରେ ଆମର ମୁଖ୍ୟ ଦାବିକୁ ଅଣଦେଖା କରାଯାଇଛି । ଯୁଦ୍ଧର ମୂଳ କାରଣ, ସମସ୍ୟାର ସମାଧାନ ଲାଗି ଚୁକ୍ତିରେ କିଛି ନାହିଁ । ତେଣୁ ଏହି ଚୁକ୍ତି ଗ୍ରହଣ କରିବା କଷ୍ଟକର ।
ଏହା ମଦ୍ୟ ପଢନ୍ତୁ- ଲୋକସଭାରେ ଉପସ୍ଥାପିତ ହେବ ୱାକଫ୍ ସଂଶୋଧନ ବିଲ୍,ଦଳୀୟ ସଦସ୍ୟଙ୍କୁ ହ୍ୱିପ୍ ଜାରି କଲା ବିଜେପି
ଏହା ପୂର୍ବରୁ ରୁଷ୍ ଏବଂ ୟୁକ୍ରେନ୍ ମଧ୍ୟରେ ଯୁଦ୍ଧବିରତି ଲାଗି କୌଣସି ନିଷ୍କର୍ଷ ବାହାରି ପାରୁ ନ ଥିବାରୁ ଟ୍ରମ୍ପ୍ ରବିବାର ନିରାଶା ବ୍ୟକ୍ତ କରିଥିଲେ । ଏଥିସହ ଯୁଦ୍ଧ ଶେଷ କରିବା ଲାଗି ନିଜ ଉଦ୍ୟମରେ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଏବଂ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କିଙ୍କ ଆଭିମୁଖ୍ୟ ଦେଖି ବିରକ୍ତି ପ୍ରକାଶ କରିଥିଲେ । ଏପରିକି ରୁଷ୍ ଉପରେ ନୂଆ ଆର୍ଥିକ କଟକଣା ବିଶେଷ କରି ରୁଷ୍ର ତେଲ ଉପରେ ସେକେଣ୍ଡାରୀ ଟାରିଫ୍ ଲଗାଇବାକୁ ମଧ୍ୟ ଧମକ ଦେଇଥିଲେ । ପୁଟିନ୍ ଏହା ପୂର୍ବରୁ ଜେଲେନ୍ସ୍କିଙ୍କ ନେତୃତ୍ୱକୁ ନାପସନ୍ଦ କରିବା ସହ ସମାଲୋଚନା କରିଥିଲେ । ୟୁକ୍ରେନ୍ରେ ଏକ ଅସ୍ଥାୟୀ ଶାସନର ଆବଶ୍ୟକତା ଥିବା ଏବଂ ଜେଲେନ୍ସ୍କିଙ୍କୁ କ୍ଷମତାରୁ ବାହାର କରଯିବାକୁ ପୁଟିନ୍ ଦାବି କରିଥିଲେ । ଏହା ଟ୍ରମ୍ପ୍ଙ୍କୁ ପସନ୍ଦ ଆସି ନ ଥିଲା । ଟ୍ରମ୍ପ୍ କହିଥିଲେ, ୟୁକ୍ରେନ୍ରେ ନୂଆ ଶାସକ ଆସିଲେ ଶାନ୍ତି ବୁଝାମଣା ବିଳମ୍ବ ହେବ । ନୂଆ ନେତା ନ ଆସିବା ପର୍ଯ୍ୟନ୍ତ କୌଣସି ଚୁକ୍ତି ହୋଇପାରିବ ନାହିଁ ।
