ଢାକା: ବାଂଲାଦେଶର ଏକ ଜିଲ୍ଲାରେ ଇଦ୍ ଉପଲକ୍ଷେ ଆୟୋଜିତ କାର୍ଯ୍ରକ୍ରମରେ ଗୁପଚୁପ୍ ଖାଇବା ପରେ ୨୧୩ ଜଣ ଅସୁସ୍ଥ ହୋଇପଡ଼ିଛନ୍ତି । ସେମାନଙ୍କ ମଧ୍ୟରୁ ୧୪ ଜଣଙ୍କ ଅବସ୍ଥା ଗୁରୁତର ରହିଛି। ଏହି ଘଟଣାଟି ଆଭାଇନଗରର ଦକ୍ଷିଣ ଦେୟାପାରା ଗାଁରେ ଘଟିଛି । ସେଠାରେ ଲୋକମାନେ ଗୁପଚୁପ୍ ଖାଇବା ପରେ ପେଟ ଯନ୍ତ୍ରଣା, ବାନ୍ତି, ଝାଡ଼ା ଏବଂ ଜ୍ବରରେ ପଡ଼ିଥିଲେ । ଡାକ୍ତରଙ୍କ ଅନୁଯାୟୀ, ଫଙ୍ଗାଲ୍ ସଂକ୍ରମଣ ଯୋଗୁଁ ଏଭଳି ହୋଇଛି।
ଇଦ୍ ଅବସରରେ, ଦକ୍ଷିଣ ଦେୟାପଡ଼ା ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ଏକ ଚାରି ଦିନିଆ ମେଳାର ଆୟୋଜନ କରାଯାଇଥିଲା। ଇଦ୍ ଦିନ ଅପରାହ୍ନରୁ ବିଳମ୍ବିତ ରାତି ପର୍ଯ୍ୟନ୍ତ ହଜାର ହଜାର ଲୋକ ଏଠାକୁ ଆସିଥିଲେ ଏବଂ ଅନେକ ଦୋକାନରୁ ଖାଦ୍ୟ ସାମଗ୍ରୀ ଖାଇଥିଲେ। ଏହି ସମୟରେ, ରୂପାଡିଆ ଅଞ୍ଚଳର ଗୁପଚୁପ ବିକ୍ରେତା ମୋନିର ହୁସେନଙ୍କ ଷ୍ଟଲରୁ ଖାଦ୍ୟ ଖାଇବା ପରେ ଲୋକମାନେ ଅସୁସ୍ଥ ହେବାକୁ ଲାଗିଲେ। ପ୍ରଥମେ ପେଟ ଯନ୍ତ୍ରଣା ଏବଂ ବାନ୍ତିର ଅଭିଯୋଗ ଆସିଥିଲା, ତା’ପରେ ଅବସ୍ଥା ଆହୁରି ଖରାପ ହେବାକୁ ଲାଗିଲା।
ଆଭାଇନଗରର ସ୍ବାସ୍ଥ୍ୟ ଅଧିକାରୀ ଡାକ୍ତର ଆଲିମୁର ରାଜିବଙ୍କ ଅନୁଯାୟୀ, ୨୧୩ ଜଣ ରୋଗୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେମାନଙ୍କ ମଧ୍ୟରୁ ୫୩ ଜଣଙ୍କୁ ଔଷଧ ଦିଆଯାଇ ଘରକୁ ପଠାଇ ଦିଆଯାଇଛି । ୧୪୬ ଜଣ ଏବେ ବି ଡାକ୍ତରଖାନାରେ ଅଛନ୍ତି। ୧୪ ଜଣ ରୋଗୀଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ ଖୁଲନା ମେଡିକାଲ କଲେଜ ହସ୍ପିଟାଲକୁ ପଠାଯାଇଛି ।
ପ୍ରଫେସର ପାରାର ଅବଦୁଲ ରଉଫ ଗାଜି କହିଛନ୍ତି ଯେ, ସେ ତାଙ୍କ ମାଆ, ସ୍ତ୍ରୀ ଏବଂ ପିଲାମାନଙ୍କ ସହିତ ଇଦ କାର୍ଯ୍ୟକ୍ରମକୁ ଯାଇଥିଲେ। ତାଙ୍କ ପରିବାରର ପାଞ୍ଚ ଜଣ ସଦସ୍ୟ ଗୁପଚୁପ୍ ଖାଇଥିଲେ ଏବଂ କିଛି ଘଣ୍ଟା ମଧ୍ୟରେ ସେମାନଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିଥିଲା । ତାଙ୍କୁ ପ୍ରଥମେ ଅଭୟନଗର ହସ୍ପିଟାଲରେ ଭର୍ତ୍ତି କରାଯାଇଥିଲା, ପରେ ଖୁଲନା ସିଟି ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା।
ଘଟଣା ପରେ ଗୁପଚୁପ ବିକ୍ରେତା ଷ୍ଟଲ ଛାଡି ଦୌଡ଼ି ପଳାଇଥିଲା। ଆଭାଇନଗର ପୋଲିସ ଷ୍ଟେସନର ଭାରପ୍ରାପ୍ତ ଅଧିକାରୀ ଅବଦୁଲ ଅଲିମ କହିଛନ୍ତି ଯେ, ଏପର୍ଯ୍ୟନ୍ତ କେହି ଅଭିଯୋଗ ଦାଖଲ କରିନାହାଁନ୍ତି । କିନ୍ତୁ ଅଭିଯୋଗ ଆସିଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
