ଚେନ୍ନାଇ: ଟ୍ରେନ୍ ଭିତରେ ମଦ୍ୟପାନ କରି ଉତ୍ପାତ କରୁଥିବା ନେଇ ନାବାଳକଙ୍କ ସମେତ ୪ ଜଣଙ୍କୁ ଗିରଫ କରିଛି ପୋଲିସ । ଚଳନ୍ତା ଟ୍ରେନ୍ରେ ନିଶାସକ୍ତ ଅବସ୍ଥାରେ ଉନ୍ମତ୍ତକାଣ୍ଡ ଭିଆଇଥିବା ଅଭିଯୁକ୍ତଙ୍କୁ ଗିରଫ କରାଯାଇଥିବା ନେଇ ରେଳବାଇ ଅଧିକାରୀ ସୂଚନା ଦେଇଛନ୍ତି । ତାମିଲନାଡୁରେ ଅଲପୁଝା ଏକ୍ସପ୍ରେସରେ ବିଶୃଙ୍ଖଳା ସୃଷ୍ଟି କରିଥିବା ଯୁବକମାନଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ୍ ହୋଇଛି ।
ଟ୍ରେନ୍ ଭିତରେ ନିଶାସକ୍ତ ଅବସ୍ଥାରେ ଅନ୍ୟ ଯାତ୍ରୀଙ୍କୁ ଏମାନେ ହାଇରାଣ କରୁଥିବା ଦେଖିବାକୁ ମିଳିଛି । ଶନିବାର ରାତିରେ ଚେନ୍ନାଇ ସେଣ୍ଟ୍ରାଲରୁ ବାହାରିଥିବା ଅଲପୁଝା ଏକ୍ସପ୍ରେସରେ ଏଭଳି କାଣ୍ଡ ଘଟିଛି । ଏରୋଡରୁ ତିରୁପୁର ମଧ୍ୟରେ ଗଡ଼ୁଥିବା ଏହି ଏକ୍ସପ୍ରେସରେ ମଦ୍ୟପମାନଙ୍କ ଉନ୍ମତ୍ତକାଣ୍ଡର ଭିଡିଓ ସାଧାରଣରେ ଚର୍ଚ୍ଚାର ପ୍ରସଙ୍ଗ ପାଲଟିଛି । ଟ୍ରେନ୍ ଭିତରେ ୪ ଅଭିଯୁକ୍ତ ନୃତ୍ୟୁ କରିବା ସହ ଅନ୍ୟ ଯାତ୍ରୀଙ୍କୁ ହଇରାଣ କରିଥିଲେ । ଏପରିକି ସେମାନେ ସେଠାରେ ମଦ୍ୟପାନ କରିବା ସହ ଧୂମପାନ କରିଥିବା ନେଇ ମଧ୍ୟ ଅଭିଯୋଗ ହୋଇଛି ।
ଏହାକୁ କେତେକ ଯାତ୍ରୀ ବିରୋଧ କରିବାରୁ ମଦ୍ୟପମାନେ ସେମାନଙ୍କୁ ମାଡ଼ ମାରିଥିଲେ । ଏହା ପରେ ସେମାନେ ଟ୍ରେନ୍ରୁ ଓହ୍ଳାଇ ଚମ୍ପଟ ମାରିଥିଲେ । ଯାତ୍ରୀଙ୍କ ଅଭିଯୋଗ କ୍ରମେ ତିରୁପୁର ପୋଲିସ ସେମାନଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଉଛନ୍ତି- ଏକ ଅଶୋକ (୧୮), ପବନ କୁମାର (୧୭), ଏସ ସୁଦାଲାଇରାଜ୍ (୧୮) ଏବଂ କେ କରଣ (୨୩) । ନାବାଳକ ଅଭିଯୁକ୍ତକୁ ବାଳ ସୁଧାର ଗୃହକୁ ପଠାଇ ଦିଆଯାଇଛି । ଅନ୍ୟମାନଙ୍କୁ ମାଜିଷ୍ଟ୍ରେଟଙ୍କ ସାମ୍ନାରେ ହାଜର କରାଇବା ପରେ ସେମାନଙ୍କୁ ଜେଲ୍କୁ ପଠାଇଦିଆଯାଇଛି ।
