ନୂଆଦିଲ୍ଲୀ: ଭାରତୀୟ ଟିମ୍ର ମୁଖ୍ୟ କୋଚ ହେବା ପରେ ଗୌତମ ଗମ୍ଭୀର ନୂଆ ରଣନୀତି ଆପଣାଉଛନ୍ତି । କୋଲକାତା ନାଇଟ ରାଇଡର୍ସ (କେକେଆର)କୁ ବିଜୟୀ କରିବାରେ ମୁଖ୍ୟ ଭୂମିକା ନେଇଥିବା ଗମ୍ଭୀର ଟିମ୍ ଇଣ୍ଡିଆ ପାଇଁ ଖାସ ଯୋଜନା କରୁଥିବା କୁହାଯାଉଛି । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ମୁତାବକ, ଗମ୍ଭୀର ଏବେ ଭାରତୀୟ ଟିମ୍ରେ ଜଣେ ପ୍ରତିଭାବାନ ଖେଳାଳିଙ୍କୁ ବଡ଼ ଦାୟିତ୍ବ ଦେବାକୁ ଯାଉଛନ୍ତି ।
ଓ୍ବେଷ୍ଟଇଣ୍ଡିଜ୍ର ପୂର୍ବତନ ଖେଳାଳି ସୁନୀଲ ନାରାୟଣଙ୍କ ଭଳି ଜଣେ ଖେଳାଳିଙ୍କୁ ଗମ୍ଭୀର ବାଛିଛନ୍ତି । ଯିଏ କ୍ରିଜ୍କୁ ଆସୁ ଆସୁ ଛକା ଚୌକା ବର୍ଷା କରିବେ । ଏହି ଖେଳାଳି ଆଉ କେହି ନୁହଁନ୍ତି ଇଏ ହେଉଛନ୍ତି ଓ୍ବାଶିଂଟନ ସୁନ୍ଦର । ସୁନ୍ଦରଙ୍କୁ ସୁନୀଲ ନାରାୟଣଙ୍କ ଭୂମିକାରେ ଟିମ୍ ଇଣ୍ଡିଆରେ ଖେଳାଇବାକୁ ଯୋଜନା କରିଛନ୍ତି ଗୌତମ ଗମ୍ଭୀର । ମିଳିଥିବା ରିପୋର୍ଟ ଅନୁସାରେ ଓ୍ବାଶିଂଟନ ସୁନ୍ଦରଙ୍କୁ ଅଭ୍ୟାସ୍ ମ୍ୟାଚରେ ନମ୍ବର ୩ରେ ଖେଳିବାକୁ ଦିଆଯାଇଥିବା ବେଳେ ସେ ଲଙ୍ଗ ରେଞ୍ଜ ହିଟ୍ ପାଇଁ ପ୍ରାକ୍ଟିସ୍ କରିଛନ୍ତି । ଯେଉଁଭଳି ସୁନୀଲ ନାରାୟଣ ବ୍ୟାଟିଂ ଏବଂ ବୋଲିଂରେ କମାଲ କରିଥିଲେ ଠିକ୍ ସେହିଭଳି ଓ୍ବାଶିଂଟନ ସୁନ୍ଦରଙ୍କୁ ଦାୟିତ୍ବ ଦେଇଛନ୍ତି ଗମ୍ଭୀର ।
ସେ ବାମହାତୀ ବ୍ୟାଟର ହୋଇଥିବା ବେଳେ ଭଲ ବୋଲିଂ ମଧ୍ୟ କରୁଛନ୍ତି । ଅନ୍ତର୍ଜାତୀୟ କ୍ରିକେଟରେ ସୁନ୍ଦର ନିଜର ପ୍ରତିଭା ପ୍ରତିପାଦିତ କରିଛନ୍ତି । ୨୪ ବର୍ଷୀୟ ଏହି ଖେଳାଳି ଟି-୨୦, ଦିନିକିଆ ଏବଂ ଟେଷ୍ଟରେ ସେ ଅର୍ଦ୍ଧଶତକ ଲଗାଇ ସାରିଛନ୍ତି । ତେବେ ଗୌତମ ଗମ୍ଭୀରଙ୍କ ଏହି ଯୋଜନା କେତେ ସଫଳ ହେବ ତା ଉପରେ ସମସ୍ତଙ୍କ ନଜର ରହିବ ।
