ମାଲକାନଗିରି,୯।୪(ଆପ୍ର): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ରାଜ୍ୟ ବିଜାପୁର ଜିଲ୍ଲାରେ ନକ୍ସଲମାନଙ୍କ ଦ୍ୱାରା ବିଛା ଯାଇଥିବା ପ୍ରେସର ଆଇଇଡି ବିସ୍ଫୋରଣରେ ଜଣେ ଯବାନ ଗୁରୁତର ହୋଇଛନ୍ତି। ବିଜାପୁର ଜିଲ୍ଲା ଚିନ୍ନାକୋଡେପାଲ ଅଞ୍ଚଳକୁ ସିଆରପିଏଫ ୧୯୬ ବାଟାଲିୟନର ଯବାନମାନେ ସର୍ଚ୍ଚ ଅପରେସନରେ ଯାଇଥିଲେ। ଯବାନମାନେ ନକ୍ସଲଙ୍କ ପ୍ରେସର ଆଇଇଡି ବିସ୍ଫୋରଣ ସଂସ୍ପର୍ଶରେ ଆସିଥିଲେ। ସିଆରପିଏଫ ବାହିନୀର (ବୋମା ନିଷ୍କ୍ରିୟକାରୀ ଦଳ)ର ଜଣେ ଯବାନ ଗୁରୁତର ଆହତ ହୋଇଥିଲେ।
କୋଡେପାଲ ନାଳ ନିକଟରେ ମାଓବାଦୀମାନେ ଏକ ପ୍ରେସର ଆଇଇଡି ଖଞ୍ଜିଥିଲେ। ଯବାନ ପ୍ରେସର ଆଇଇଡି ସଂସ୍ପର୍ଶରେ ଆସିବାରୁ ଆଇଇଡି ବିସ୍ଫୋରଣ ଘଟିଥିଲା। ବିସ୍ଫୋରଣ ଏତେ ତୀବ୍ର ଥିଲା ଯେ ଯବାନଙ୍କ ଦୁଇ ଗୋଡରେ ଗୁରୁତର ଆଘାତ ଲାଗିଥିଲା। ତୁରନ୍ତ ପ୍ରାଥମିକ ଚିକିତ୍ସା ପରେ ଆହତ ଯବାନଙ୍କୁ ଜିଲ୍ଲା ହସ୍ପିଟାଲ ବିଜାପୁରରେ ଭର୍ତ୍ତି କରାଯାଇଛି। ସେଠାରେ ତାଙ୍କର ଉନ୍ନତ ଚିକିତ୍ସା ଜାରି ରହିଛି। ଅନ୍ୟପକ୍ଷରେ ଘଟଣା ପରେ ସୁରକ୍ଷା ବାହିନୀ ଆଖପାଖ ଅଞ୍ଚଳରେ ତଲାସୀ ଅଭିଯାନକୁ ଜୋରଦାର କରିଛି। ମାଓବାଦୀଙ୍କ ଉପସ୍ଥିତି ଏବଂ ଅନ୍ୟ ଯେକୌଣସି ପ୍ରକାରର ବିପଦ ଆଶଙ୍କାକୁ ଦୃଷ୍ଟିରେ ରଖି ସୁରକ୍ଷାବାହିନୀ ସଜାଗ ରହିଛନ୍ତି।
