ମାଲକାନଗିରି, ୧୧।୪(ଆପ୍ର): ଗୁରୁବାର ସନ୍ଧ୍ୟାରେ ସମଗ୍ର ମାଲକାନଗିରି ଜିଲ୍ଲାରେ କାଳ ବୈଶାଖୀର ତାଣ୍ଡବ ଦ୍ୱାରା ବିଭିନ୍ନ ସ୍ଥାନରେ ବ୍ୟାପକ କ୍ଷତି ଘଟିବା ସହିତ ବଜ୍ରପାତରେ ଜଣେ ମା ର ମୃତ୍ୟୁ ଘଟିଥିବା ବେଳେ ତାଙ୍କ ପୁତ୍ର ଗୁରୁତର ଭାବେ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। ମାଲକାନଗିରି ଜିଲ୍ଲା ମାଥିଲି ବ୍ଲକ ଅନ୍ତର୍ଗତ କଂସାରିପୁଟ ଗ୍ରାମରେ ଗୁରୁବାର ରାତିରେ ବଜ୍ରାଘାତରେ ମା ମୃତ, ପୁଅ ଗୁରୁତର ଆହତ ହୋଇଛନ୍ତି।
ସୂଚନା ଅନୁଯାୟୀ ଭତ କାଲି ରାତିରେ ମାଲକାନଗିରି ଜିଲ୍ଲାର ବିଭିନ୍ନ ସ୍ଥାନରେ ବର୍ଷା, ପବନ ସହ ବଜ୍ରାଘାତ ହୋଇଥିଲା। ଜିଲ୍ଲାର ମାଥିଲି ଅଞ୍ଚଳରେ ମଧ୍ୟ ଏହି ବର୍ଷା ଓ ବଜ୍ରାଘାତ ହୋଇଥିବା ବେଳେ ବ୍ଲକର କଂସାରିପୁଟ ଗ୍ରାମର ଜଣେ ମହିଳା ଓ ତାଙ୍କ ପୁଅ ଗୁରୁତର ଆହତ ହୋଇଥିଲେ। ଉଭୟଙ୍କୁ ମାଥିଲି ଚିକିତ୍ସାଳୟରେ ଭର୍ତି କରାଇଥିବା ବେଳେ ସେଠାରେ ମହିଳା ଜଣଙ୍କର ମୃତ୍ୟୁ ଘଟିଥିଲା। ମୃତ ମହିଳା ଜଣଙ୍କ ହେଲେ କଂସାରିପୁଟ ଗ୍ରାମର ଅଜୟ କୁମାର ନାୟକଙ୍କ ସ୍ତ୍ରୀ ଛବି ନାୟକ(୩୯) ବୋଲି ଜଣାପଡିଛି।
ସେହିପରି ଗୁରୁତର ଆହତ ହୋଇଥିବା ପୁଅର ନାମ ଚନ୍ଦନ ନାୟକ(୧୫) ବୋଲି ଜଣାପଡିଛି। ଚନ୍ଦନ ବର୍ତ୍ତମାନ ମାଥିଲି ହସପିଟାଲରେ ଚିକିତ୍ସାଧୀନ ଅବସ୍ଥାରେ ରହିଛନ୍ତି। ଘର ବାରଣ୍ଡାରେ ମା ପୁଅ ବସିଥିବା ବେଳେ ବଜ୍ରାଘାତରେ ଏହି ଅଘଟଣ ଘଟିଥିବା ସୂଚନା ମିଳିଛି। ଗତକାଲିର ଝଡ଼ ତୋଫାନ ରେ ବଡ଼ବଡ଼ ଗଛ ବିଦ୍ୟୁତ ଖୁଣ୍ଟ ଉପୁଡି ପଡିବା ସହ ବ୍ୟାପକ ପନିପରିବା ଫସଲ ମଧ୍ୟ ନଷ୍ଠ ହୋଇଛି।
