ଭୁବନେଶ୍ୱର,୧୩/୦୪: ବିଜେଡିରେ ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ ପର୍ଯ୍ୟାୟରେ ପହଞ୍ଚିଲାଣି । ଏତେବେଳକୁ ପଞ୍ଚାୟତରୁ ରାଜ୍ୟସ୍ତର ଯାଏ ଦଳ ଉଠୁଥାନ୍ତା ପଡ଼ୁଥାନ୍ତା । ବଳ କଷାକଷି, ଲବିରେ କମ୍ପାଉଥାନ୍ତେ ତୃଣମୂଳରୁ ଆରମ୍ଭ କରି ରାଜ୍ୟସ୍ତରୀୟ ନେତାମାନେ । ମାତ୍ର ସେମିତି କିଛି ବାତାବରଣ ଦେଖିବାକୁ ମିଳୁନି ଏଥର । ଗଣମାଧ୍ୟମରେ ଯେତିକି ଚର୍ଚ୍ଚା ହେଉଛି, ପଦପଦବି ପାଇଁ ନେତା, କର୍ମୀଙ୍କ ଭିତରେ ସେତିକି ଉତ୍ସାହ ଦେଖିବାକୁ ମିଳୁନି ।
ଦଳ କ୍ଷମତାରୁ ହଟିବା ପରେ ଏଥର ଖୋଲାଖୋଲି ନେତୃତ୍ୱଙ୍କୁ ଚାଲେଞ୍ଜ ଦେଲେଣି ନେତାଏ । ତେଜିଲାଣି ବିଦ୍ରୋହ । ଦଳର ଏଭଳି ସ୍ଥିତି ଦେଖି ବିଜେଡିର ଲକ୍ଷ ଲକ୍ଷ କର୍ମୀ ହତାଶ ଓ ଆଶଙ୍କାରେ । ଅନେକେ ଭାବୁଛନ୍ତି, ଦଳର ନମ୍ବର ୱାନ୍, ନମ୍ବର ୨ ଥିବା ନେତାଙ୍କୁ ଯଦି ନେତାମାନେ ମାନୁନାହାନ୍ତି, ଆଗକୁ ପଞ୍ଚାୟତ, ବ୍ଲକ ସଭାପତିଙ୍କୁ କିଏ ପଚାରିବେ ? ଅଧିକାଂଶ କର୍ମୀ ଓ ନେତାଙ୍କ କହିବା କଥା ହେଲା- ଦଳ ଯାହାକୁ ପଦ ପଦବି ଦେଉ, କିଏ ପଚାରେ । ଏପଟେ ବିଜେଡିର ରାଜ୍ୟସ୍ତରୀୟ ନେତାମାନେ ବାରମ୍ବାର ବୈଠକ କରି ଗଣମାଧ୍ୟମରେ ସାଂଗଠନିକ ନିର୍ବାଚନର ପ୍ରଚାର କରୁଛନ୍ତି । ଶଙ୍ଖ ଭବନରେ ବସି ଫୁଟାଣି ମାରୁଛନ୍ତି, ପଞ୍ଚାୟତ ଓ ବ୍ଲକ ସଭାପତି ପାଇଁ ଦଳରେ କିଛି ଟଣାଓଟରା ନାହିଁ । ଦଳ ଶୃଙ୍ଖଳିତ, ଏକତ୍ରିତ । ମାତ୍ର ବିଜେଡିର ଆଉ ଥୋକେ ନେତା କହୁଛନ୍ତି, ଯେଉଁଠି ଉତ୍ସାହ କମ୍, ସେଠି ଟଣାଓଟରା କେମିତି ହେବ? ପୂର୍ବଭଳି ପଦପଦବି ପାଇଁ ମାଳମାଳ ଆଶାୟୀ ନାହାନ୍ତି । ପଦବି ମିଳିଲେ ଖୁସି, ନ ମିଳିଲେ ଢୋ... ।
ସୂତ୍ର ଅନୁସାରେ, ଆସନ୍ତା ୧୯ ତାରିଖରେ ବିଜେଡି ସାଂଗଠନିକ ନିର୍ବାଚନର ଚୂଡ଼ାନ୍ତ ଦିନ । ସେଦିନ ସଭାପତିଙ୍କ ନାମ ଘୋଷଣା ହେବ । ନବୀନ ପୁଣି ଥରେ ଏହି ପଦରେ ବସିବେ, ଏଥିରେ ସନ୍ଦେହ ନାହିଁ । ଇତିମଧ୍ୟରେ ପ୍ରାୟ ୧୮ରୁ ୨୦ଟି ଜିଲ୍ଲାର ସଭାପତିଙ୍କ ନାମ ଚୂଡ଼ାନ୍ତ ହୋଇସାରିଛି । ସେଦିନ ଘୋଷଣା ହୋଇପାରେ ।
ଏସବୁ ଜିଲ୍ଲାରେ ସଭାପତି ପଦ ପାଇଁ ସେଭଳି ଛକାପଞ୍ଝା ନଥିବା ଜଣାପଡ଼ିଛି । ତଥାପି ପ୍ରାୟ ୧୨ଟି ଜିଲ୍ଲାରେ ସଭାପତି ନେଇ କେଁ ଛିଣ୍ଡୁନି। କଟକରେ କାହାକୁ ଜିଲ୍ଲା ସଭାପତି କରିବେ, ଦଳ ବୁଝିପାରୁନି । ଦେବାଶିଷ ସାମନ୍ତରାୟ, ପ୍ରଭାତ ତ୍ରିପାଠୀ, ପ୍ରଭାତ ବିଶ୍ୱାଳ, ଚନ୍ଦ୍ରସାରଥୀ ବେହେରାଙ୍କ ଆଣ୍ଟପଣ ଦଳର କ୍ଷମତାଶାଳୀ ଗୋଷ୍ଠୀର ନିଦ ହଜାଇ ଦେଲାଣି । କେନ୍ଦ୍ରାପଡ଼ାରେ ଅତନୁ ସବ୍ୟସାଚୀ ନାୟକ, ପ୍ରତାପ ଦେବ, ଗଣେଶ୍ୱର ବେହେରା, ଧ୍ରୁବ ସାହୁ, ଅରବିନ୍ଦ ମହାପାତ୍ର ଓ ଅଂଶୁମାନ ମହାନ୍ତିଙ୍କ ସହମତିକୁ ନେଇ ସଭାପତି ଚୟନ ବିଜେଡି ପାଇଁ କାଠିକର ହେଲାଣି । ଖୋର୍ଦ୍ଧାରେ ସଭାପତି ହେବାକୁ ରାଜେନ୍ଦ୍ର ସାହୁ ପ୍ରମୁଖ ଦାବିଦାର ଥିବା ବେଳେ ଦଳର ନିର୍ଦ୍ଦିଷ୍ଟ କ୍ଷମତାଶାଳୀ ଗୋଷ୍ଠୀ ତାଙ୍କ ସପକ୍ଷରେ ନାହାନ୍ତି । ଅପରପକ୍ଷରେ ବିଭୂତି ବଳବନ୍ତରାୟ ମଧ୍ୟ ପଦ ପାଇଁ ବିଶେଷ ଆଗ୍ରହୀ ନଥିବା କୁହାଯାଉଛି ।
ବଲାଙ୍ଗିରରେ ରାଜପରିବାର ଓ ଟୁକୁନି ସାହୁଙ୍କୁ ନେଇ ବିବାଦ ରହିଛି । କଳାହାଣ୍ଡିରେ ଦଳ ଦିବ୍ୟଶଙ୍କର ମିଶ୍ରଙ୍କୁ ଚାହୁଁଥିବା ବେଳେ ପୁଷ୍ପେନ୍ଦ୍ର ସିଂହଦେଓଙ୍କ ସପକ୍ଷରେ ଅଧିକାଂଶ ନେତା ଥିବା କୁହାଯାଉଛି । ନବରଙ୍ଗପୁରରେ ପ୍ରଦୀପ ମାଝୀ ବନାମ ରମେଶ ମାଝୀ ବିବାଦ ଛିଣ୍ଡୁନି । କୋରାପୁଟରେ ଈଶ୍ୱର ପାଣିଗ୍ରାହୀ ଓ ରବି ନନ୍ଦଙ୍କୁ ନେଇ ଦଳ କିଛି ସ୍ଥିର କରିପାରୁନି । ମୟୂରଭଞ୍ଜ-୨ରେ ବି କାଶୀ ହେମ୍ବ୍ରମ- ରତିକାନ୍ତଙ୍କ ଭିତରେ ବିବାଦରୁ ସମାଧାନ ବାଟ ବାହାରି ପାରିନି ।
ନବୀନ ସଭାପତି ଘୋଷଣା ହେବା ପରେ ନିଜ ନୂଆ ଟିମ୍ ଗଢ଼ିବେ । ସମ୍ଭବତଃ ଏଥର ଦଳରେ କାହାକୁ ନମ୍ବର ୨ ଆସନ ମିଳିନପାରେ । ବରିଷ୍ଠ ଓ ଅନୁଭବୀ ନେତାଙ୍କୁ ନେଇ ରାଜନୈତିକ କମିଟି ଭଳି କିଛି ଟିମ୍ କରିପାରନ୍ତି ନବୀନ । ଏକ ନିର୍ଦ୍ଦିଷ୍ଟ ଗୋଷ୍ଠୀର ପସନ୍ଦର ନେତାଙ୍କୁ ଏହି ଟିମ୍ରେ ବଡ଼ ଭୂମିକା ମିଳିପାରେ । ଛାମୁଆ ସଂଗଠନ ପାଇଁ ଦଳ ବେଶି ମାପିଚୁପି ପଦକ୍ଷେପ ନେଉଛି । ଛାମୁଆ କର୍ମକର୍ତ୍ତା ଅସନ୍ତୁଷ୍ଟ ହେଲେ, ସେମାନଙ୍କୁ ବୁଝାଇବା ସହଜ ହେବନି । ସେଥିପାଇଁ ଦଳ କୌଣସି ରିସ୍କ ନ ନେଇ ଯୁବବର୍ଗ ପାଇଁ ପୁଣି ଥରେ ବ୍ୟୋମକେଶ ରାୟଙ୍କ ନାମକୁ ବିଚାର କରାଯାଉଥିବା ଶୁଣିବାକୁ ମିଳିଛି । ମହିଳା ସଂଗଠନ ପାଇଁ ସୁଲତା ଦେଓଙ୍କ ସମ୍ଭାବନା ଅଧିକ ଥିବା କୁହାଯାଉଛି । ଛାତ୍ର ସଭାପତି ପାଇଁ ଅରୁଣ ସାହୁଙ୍କ ଶିବିରରୁ ଆସୁଥିବା ନାଁକୁ ଗୁରୁତ୍ୱ ମିଳିପାରେ । ୱାକଫ୍ ବିଲ୍ ଝଡ଼ ପରେ ସାଂଗଠନିକ ଟିମ୍କୁ ନେଇ ଦଳ ଚାପରେ ଥିବା କୁହାଯାଉଛି ।
