ମାଲକାନଗିରି/କାଲିମେଳା /ଚିତ୍ରକୋଣ୍ଡା, ୧୨/୪(ଆପ୍ର ) ମାଲକାନଗିରି ଜିଲ୍ଲା କାଲିମେଳା ପୋଲିସ ଓ ଚିତ୍ରକୋଣ୍ଡା ପୋଲିସ ଦ୍ଵାରା ପୃଥକ ପୃଥକ ସ୍ଥାନରୁ ମୋଟ ୮୬୦ କେଜି ଗଞ୍ଜେଇ ଜବତ କରିଛି। ଏଥି ସହ ଦୁଇଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ରାଜ କୁମାର (୨୫) ଏବଂ ସୋନୁ ସିଂହ (୨୨)।
ଦୁଇଜଣ ଅଭିଯୁକ୍ତ ଏକ ଟ୍ରକ ଯୋଗେ ମାଲକାନଗିରି ଜିଲ୍ଲାର କାଲିମେଳା ଅଞ୍ଚଳରୁ ଗଞ୍ଜେଇ ନେଇ ଯାଉଥିଲେ। ଉତ୍କ ଟ୍ରକ ଦ୍ରୁତ ଗତିରେ ଆସୁଥିବା ଦେଖି ଯାଞ୍ଚ ପାଇଁ କାଲିମେଳା ପୋଲିସ ଟିମ ଅଟକାଇ ଥିଲା। ଯାଞ୍ଚ ବେଳେ ଟ୍ରକ ମଧ୍ୟରେ ବସ୍ତାରେ ରଖା ଯାଇଥିବା ବିପୁଳ ଗଞ୍ଜେଇ ଜବତ କରିବା ସହ ଦୁଇ ଅଭିଯୁକ୍ତଙ୍କୁ ଗିରଫ କରିଥିଲା। ଜବତ ଗଞ୍ଜେଇର ଓଜନ ୫୦୦ କେଜି ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ୫୦ ଲକ୍ଷ ଟଙ୍କା ହେବ ବୋଲି ଜଣା ପଡିଛି।
ଅନୁରୂପ ଭାବେ ଜିଲ୍ଲାର ଚିତ୍ରକୋଣ୍ଡା ପୋଲିସ ମଧ୍ୟ ପାଟ୍ରୋଲିଂ ବେଳେ ମନ୍ତ୍ରୀପୁଟ ରାସ୍ତା କଡ ଜଙ୍ଗଲ ମଧ୍ୟରୁ ୩୬୦ କେଜି ଗଞ୍ଜେଇ ଜବତ କରିଛି। ଚିତ୍ରକୋଣ୍ଡା ପୋଲିସ ପକ୍ଷରୁ ପାଟ୍ରୋଲିଂ ସମୟରେ ମନ୍ତ୍ରୀପୁଟ ରାସ୍ତା କଡରେ ଥିବା ଜଙ୍ଗଲ ମଧ୍ୟରେ କିଛି ବସ୍ତା ରଖା ଯାଇଥିବା ଦେଖିଥିଲେ। ଯାଞ୍ଚ ବେଳେ ବସ୍ତା ଗୁଡିକରେ ଗଞ୍ଜେଇ ଥିବା ଦେଖି ତାହାକୁ ଜବତ କରିଥିଲା। ଜବତ ଗଞ୍ଜେଇର ଓଜନ ୩୬୦ କେଜି ହୋଇଥିବା ବେଳେ ଏହାକି ବାହାର ରାଜ୍ୟକୁ ଚାଲାଣ ପାଇଁ ଗଚ୍ଛିତ ରଖାଯାଇଥିବା ଅନୁମାନ କରାଯାଉଛି। ଘଟଣା ସ୍ଥଳରେ କେହି ନଥିବା ବେଳେ ପୋଲିସ ଗଞ୍ଜେଇ ବସ୍ତାକୁ ଜବତ କରି ତଦନ୍ତ ଜାରି ରଖିଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୩୫ ଲକ୍ଷରୁ ଊର୍ଦ୍ଧ୍ଵ ହେବ ବୋଲି ଅନୁମାନ କରାଯାଉଛି।
