ପୁରୀ,୨୦/୦୨: ନେତା କିମ୍ବା ଅଧିକାରୀଙ୍କ ଘର ହୋଇଥାନ୍ତା! କାର୍ଯ୍ୟ ଆରମ୍ଭ ହୋଇ ଶେଷ ହେବାକୁ ମାସ ପରେ ମାସ ବିତୁ ନଥାନ୍ତା । ଲୋକଙ୍କ ଟଙ୍କା ତ ଯାଉଛି । କିଏ କାହିଁକି ଚିନ୍ତା କରିବ । ଶ୍ରୀମନ୍ଦିର ପାର୍ଶ୍ବରେ ଲାଗିଥିବା ସିସିଟିଭିର ଆଖି ଥାଇ ଦେଖିପାରୁନି । ବାହାର ପରିକ୍ରମା ମାର୍ଗରେ ଲାଗିଥିବା ମାଳ ମାଳ ଅଚଳ ସିସି କ୍ୟାମେରା ଦେଖି ଏଭଳି ମନ୍ତବ୍ୟ ଦିଅନ୍ତି ସଚେତନ ପୁରୀବାସୀ । ୨୦୨୪ ରଥ ଯାତ୍ରା ପୂର୍ବରୁ ଶ୍ରୀମନ୍ଦିର ବାହାର ପରିକ୍ରମା ମାର୍ଗ ଚାରିପଟେ ଲାଗିଲା ସିସି କ୍ୟାମେରା । ଏବେ ୨୦୨୫ ରଥ ଯାତ୍ରା ଆସିଗଲା । କ୍ୟାମେରା ଲାଗିବା ବର୍ଷେ ପୂରିବାକୁ ବସିଲା ପଛେ ସିସିଟିଭି କାର୍ଯ୍ୟକ୍ଷମ ହେଲାନାହିଁ ।
ଶ୍ରୀମନ୍ଦିର ବାହାର ପରିକ୍ରମା ମାର୍ଗରେ ଲାଗିଛି ୨୦୦ରୁ ଉଦ୍ଧ୍ୱର୍ କ୍ୟାମେରା । ଖୁଣ୍ଟକୁ ଖୁଣ୍ଟକୁ ୱେରିଂ ସରିଲା । ଅହେତୁକ ବିଳମ୍ବ ହେବାରୁ ମାଟି ତଳେ ବିଛା ଯାଇଥିବା ତାରକୁ ବାରମ୍ବାର ମୂଷା କାଟି ଦେଉଛି । ଖରା, କାକର ଓ ବର୍ଷା ଖାଇ ନଷ୍ଟ ହେଉଛି ଦାମୀ ଯନ୍ତ୍ରାଂଶ । କାର୍ଯ୍ୟକ୍ଷମ ନହୋଇ ପଡ଼ି ରହିବାରେ ବାରମ୍ବାର ମରାମତି କରାଯାଉଛି । ଖରାପ ଜିନିଷ ପୁଣି କଢ଼ାଯାଇ ନୂଆ ଲାଗିବ । ପରିକ୍ରମା ପ୍ରକଳ୍ପ ଲୋକର୍ପଣକୁ ବର୍ଷାଧିକ ସମୟ ବିତିଗଲାଣି । ଶ୍ରୀମନ୍ଦିର ଚତୁଃପାଶ୍ୱର୍କୁ ସିସିଟିଭି ସ୍କାନରରେ ରଖାଯାଇ ଯେଉଁ ଶୃଙ୍ଖଳା ଅଣାଯିବ କୁହାଯାଉଥିଲା ତାହା ମଧ୍ୟ ସମ୍ଭବ ହେଉନାହିଁ । କାହାରି ତତ୍ପରତା ପ୍ରକାଶ ପାଉନାହିଁ ।
ଏନେଇ ସ୍ଥାନୀୟ ବାସିନ୍ଦା ସୁଜାତା ଦାସ କୁହନ୍ତି ସରକାରଙ୍କ ଏଭଳି ଅମନଯୋଗିତା ପାଇଁ ଗଣଧନ ଅକାରଣରେ ନଷ୍ଟ ହେଉଛି । ସରକାର ବେପରୁଆ ଭାବେ ଖର୍ଚ୍ଚ କରିଚାଲିଛନ୍ତି । ପୁରୀର ଲୁଣିଆ ପାଣିପାଗରେ ଲୁହା ଝଡ଼ିଯାଉଛି । କାର୍ଯ୍ୟ ବିଳମ୍ବ ହେବାରୁ ଏସବୁର ସୁଫଳ ମଧ୍ୟ ଲୋକେ ପାଇଲେ ନାହିଁ । ଶ୍ରୀମନ୍ଦିର ଚତୁଃପାଶ୍ୱର୍ର ସ୍ଥିତିରେ କିଛି ସୁଧାର ମଧ୍ୟ ଆସନ୍ତାଣି ।
ଓବିସିସି ଜେନେରାଲ ମ୍ୟାନେଜର ତଥା ବରିଷ୍ଠ ଯନ୍ତ୍ରୀ ପ୍ରଭାତ କୁମାର ପାଣିଗ୍ରାହୀ କୁହନ୍ତି ଶ୍ରୀମନ୍ଦିର ପରିକ୍ରମା କାର୍ଯ୍ୟ ସାରିବାକୁ ଆମେ ଦିନ ରାତି ଲାଗିଛୁ । ଭିତର ପରିକ୍ରମା ମାର୍ଗରେ ଲାଗିଥିବା ସିସିଟିଭି କାର୍ଯ୍ୟକ୍ଷମ ହୋଇ ପୁଲିସ ନିୟନ୍ତ୍ରଣରେ ରହିଛି । ଶ୍ରୀମନ୍ଦିର ବାହ୍ୟ ସୀମା ଉପରେ ନଜର ରଖିବାକୁ ବାହାର ପରିକ୍ରମା ମାର୍ଗରେ ୨ଶହରୁ ଉଦ୍ଧ୍ୱର୍ କ୍ୟାମେରା ଲାଗିଛି । ଭିତର ପରିକ୍ରମା ମାର୍ଗ ସମେତ ଶ୍ରୀମନ୍ଦିର ଚାରି ଦିଗକୁ ସଂଲଗ୍ନ ମାର୍ଗ ପର୍ଯ୍ୟନ୍ତ କ୍ୟାମେରା ନଜରରେ ରହୁଛି । ଏହାର ନିୟନ୍ତ୍ରଣ କକ୍ଷକୁ ନେଇ ପୂର୍ବ ନିର୍ଦ୍ଧାରିତ ଯୋଜନାରେ ପରିବର୍ତ୍ତନ ଆସିଛି । ପୁରୁଣା ନିର୍ମାଣର ମଡ଼େଲିଂ କରାଯାଇ ନୂତନ ଭାବେ ପ୍ରସ୍ତୁତ କରାଯାଇଛି । ଏହାର ବିଦ୍ୟୁତ୍ ସଂଯୋଗ ପାଇଁ ଟିପିସିଓଡ଼ିଏଲ୍କୁ କୁହାଯାଇଛି । ସେମାନେ ବିଦ୍ୟୁତ ସଂଯୋଗ ଦେବା ପରେ ବାହାର ପରିକ୍ରମା ମାର୍ଗର ସମସ୍ତ ସିସିଟିଭି କାର୍ଯ୍ୟକ୍ଷମ ହୋଇଯିବ ।
