ଭୁବନେଶ୍ୱର,୨୪/୦୩: ଗଞ୍ଜାମ ସୋରଡ଼ା ଥାନା ଗାଜଲବାଡ଼ି ପଞ୍ଚାୟତର କେଟାମଣି ଜଙ୍ଗଲରୁ ଶନିବାର ମିଳିଥିଲା ହାଡ଼, ଖପୁରୀ ଓ କଙ୍କାଳ । କଙ୍କାଳଟି ଜଣେ ଯୁବତୀଙ୍କର ବୋଲି ସନ୍ଦେହ ହେଉଥିଲା । ଏହି ସନ୍ଦେହ ସତ ହୋଇଛି । ଉଦ୍ଧାର ହୋଇଥିବା କଙ୍କାଳ ଘଟଣାରେ ମୃତକଙ୍କ ପରିଚୟ ମିଳିଛି । ଏହି କଙ୍କାଳ ପଡ଼ୋଶୀ କନ୍ଧମାଳ ଜିଲ୍ଲା ଟିକାବାଲିର ଜଣେ ଛାତ୍ରୀଙ୍କର । ସେ ହେଉଛନ୍ତି କାମାକ୍ଷା ମହାପାତ୍ରଙ୍କ ଝିଅ ରିନୁ(୧୬) ।
ରବିବାର ଖପୁରୀ, କଙ୍କାଳ ସମେତ ଉକ୍ତ ପାହାଡ଼ ତଳୁ ମିଳିଥିଲା ପୋଷାକ ଓ ଅନ୍ୟ ସାମଗ୍ରୀ । ଉକ୍ତ ପୋଷାକ ତାଙ୍କ ଝିଅର ବୋଲି ଚିହ୍ନଟ କରିଛନ୍ତି କାମାକ୍ଷାଙ୍କ ପରିବାର । ଏପରିକି ଝିଅକୁ ବଳାତ୍କାର ପରେ ହତ୍ୟା କରାଯାଇଛି ଏବଂ ପ୍ରମାଣ ନଷ୍ଟ କରିବାକୁ ତାଙ୍କୁ ପୋଡ଼ି ଦିଆଯାଇଥିବା ଅଭିଯୋଗ ଆଣିଛନ୍ତି ପରିବାର ଲୋକେ । ଏହି ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତଙ୍କୁ ପୁଲିସ ତୁରନ୍ତ ଗିରଫ କରିବା ସହ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୃତାଙ୍କ ପରିବାର ଲୋକେ ଦୃଢ଼ ଦାବି କରିଛନ୍ତି । ଅପରପକ୍ଷେ ରବିବାର ଛତ୍ରପୁରରୁ ସାଇଣ୍ଟିଫିକ୍ ଟିମ୍ ଘଟଣାସ୍ଥଳକୁ ଯାଇ ଅନୁସନ୍ଧାନ କରିଛନ୍ତି । ପରିବାର ଲୋକ ଅଭିଯୋଗ କରିଛନ୍ତି, ରିନୁ ଗତମାସ ୨୭ ତାରିଖ ସନ୍ଧ୍ୟାରେ ଟ୍ୟୁସନ୍ ଆସିଥିଲେ । ହେଲେ ଆଉ ଫେରି ନ ଥିଲେ । ବହୁ ଖୋଜାଖୋଜି ପରେ ନ ପାଇବାରୁ ପରିବାର ଲୋକେ ଟିକାବାଲି ଥାନାରେ ନିଖୋଜ ନେଇ ଅଭିଯୋଗ କରିଥିଲେ । ପୁଲିସ ମାମଲା ରୁଜୁ କରିଥିଲା । ହେଲେ ନିଖୋଜ ନାବାଳିକାଙ୍କ ସମ୍ପର୍କରେ କିଛି ସୂଚନା ମିଳିପାରି ନ ଥିଲା । ଝିଅକୁ ନ ପାଇ ପରିବାର ଲୋକ ଚିନ୍ତାରେ ରହିଥିଲେ ।
ଶନିବାର କେଟାମଣି ପାହାଡ଼ ତଳ ଜଙ୍ଗଲରୁ ଖପୁରୀ, ପଞ୍ଜରା ହାଡ଼ ସହ ମୋବାଇଲ୍, ଚୁଡ଼ିଦାର, ପ୍ୟାଣ୍ଟ୍ ସାର୍ଟ, ବେକର ମାଳି, ଛୁରି ଆଦି ଜବତ ହୋଇଥିବା ସୂଚନା ପାଇଥିଲେ କାମାକ୍ଷାଙ୍କ ପରିବାର ଲୋକ । ରବିବାର ସୋରଡ଼ା ଥାନା ପୁଲିସ ସହ ଘଟଣାସ୍ଥଳରେ ପହଞ୍ଚି ଚୁଡ଼ିଦାର ପ୍ୟାଣ୍ଟ୍, ମାଳି, ମୋବାଇଲ୍ ଆଦି ତାଙ୍କ ଝିଅ ରିନୁର ବୋଲି ସ୍ପଷ୍ଟ କରିଥିଲେ । କାମାକ୍ଷା ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ଝିଅକୁ ଏଭଳି ବୀଭତ୍ସ ଭାବେ ହତ୍ୟା କରି ବହୁ ଦୂରକୁ ଆଣି ଏଠାରେ ଫିଙ୍ଗି ଦିଆଯାଇଛି । ଘଟଣା ସମ୍ପର୍କରେ ଯେମିତି କେହି ଜାଣି ନ ପାରିବେ ସେଥିପାଇଁ ପୋଡ଼ି ଦିଆଯାଇଛି । ଏଭଳି ଅମାନୁଷିକ କାମ କରିଥିବା ଦୁର୍ବୃତ୍ତମାନଙ୍କୁ ପୁଲିସ ତୁରନ୍ତ ଗିରଫ କରିବା ସହ ଦୃଷ୍ଟାନ୍ତମୂଳକ ଦଣ୍ଡ ଦେବାର ଆବଶ୍ୟକତା ରହିଛି । ତେବେ ଯାଇ ମୋ ଝିଅର ଆତ୍ମା ଶାନ୍ତି ପାଇବ ବୋଲି ମୃତାଙ୍କ ବାପା କ୍ଷୋଭ ପ୍ରକାଶ କରିଛନ୍ତି । ଏହି ଘଟଣାରେ ମୃତାଙ୍କ ପରିଚୟ ସ୍ପଷ୍ଟ ହେବା ପରେ ପୁଲିସ ତଦନ୍ତ ତ୍ୱରାନ୍ୱିତ କରିଛି । ଟିକାବାଲି ପୁଲିସ ସହ ସୋରଡ଼ା ପୁଲିସ ଏହି ଘଟଣାକୁ ଗମ୍ଭୀରତାର ସହ ନେଇ ଖୋଳତାଡ଼ ଜୋରଦାର୍ କରିଛନ୍ତି । ଅଭିଯୁକ୍ତମାନଙ୍କୁ ପୁଲିସ ନିଶ୍ଚିତ କାବୁ କରିବ ଏବଂ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଆସିକା ଏସ୍ଡିପିଓ ସନ୍ତୋଷ କୁମାର ଜେନା ସୂଚନା ଦେଇଛନ୍ତି । ସୂଚନାଯୋଗ୍ୟ କି, ଶନିବାର ସକାଳେ ସ୍ଥାନୀୟ ଲୋକେ ପାହାଡ଼ ନିକଟ କେଟାମଣି ଜଙ୍ଗଲକୁ ଜାଳେଣି କାଠ ପାଇଁ ଯାଇଥିଲେ । ଏହି ସମୟରେ ପାହାଡ଼ତଳେ ନର କଙ୍କାଳ ପଡ଼ିଥିବା ଦେଖି ପୁଲିସକୁ ଜଣାଇଥିଲେ
