ମୁମ୍ବାଇ ୨୮/୦୩: ଫିଲ୍ମ ‘ସିକନ୍ଦର୍’ର ପ୍ରମୋସନ୍ରେ ବ୍ୟସ୍ତ ଅଛନ୍ତି ଦବଙ୍ଗ ଖାନ୍ । ଗତ ବୁଧବାର ରାତିରେ ମୁମ୍ବାଇରେ ଫିଲ୍ମର ପ୍ରେସ୍ ସମ୍ମିଳନୀରେ ଗଣମାଧ୍ୟମର ଅନେକ ପ୍ରଶ୍ନର ଉତ୍ତର ଦେଇଛନ୍ତି ସଲ୍ଲୁ । ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ରୁ ମିଳୁଥିବା ଧମକ ବିଷୟରେ ପ୍ରଥମ ଥର ସେ ମୁହଁ ଖୋଲିଛନ୍ତି । କହିଛନ୍ତି, ଭଗବାନ-ଆଲ୍ଲା ଯେତିକି ବୟସ ଲେଖିଛନ୍ତି, ସେତିକି ନିଶ୍ଚୟ ବଞ୍ଚିବି । ସୁରକ୍ଷା ବଢ଼ାଯିବାକୁ ନେଇ ସଲ୍ଲୁ କହିଛନ୍ତି, ବେଳେବେଳେ ଏତେ ଲୋକଙ୍କୁ ସାଙ୍ଗରେ ନେଇ ଯିବାରେ ସମସ୍ୟା ହେଉଛି ।
୨୦୨୩ରେ ଲରେନ୍ସ ଗ୍ୟାଙ୍ଗ୍ରୁ ଧମକ ମିଳିବା ପରେ ସଲ୍ଲୁଙ୍କ ସୁରକ୍ଷା ବଢ଼ାଇ ଦିଆଯାଇଥିଲା । ମହାରାଷ୍ଟ୍ର ସରକାର ତାଙ୍କୁ ୱାଇ ପ୍ଲସ୍ କ୍ୟାଟେଗୋରି ସୁରକ୍ଷା ପ୍ରଦାନ କରିଛନ୍ତି । ୧୧ ଜଣ ଯବାନ ସବୁବେଳେ ସଲ୍ଲୁଙ୍କ ସହ ରହୁଛନ୍ତି । ଜଣେ କିମ୍ବା ଦୁଇଜଣ କମାଣ୍ଡୋ ଓ ୨ ପିଏସ୍ଓ ମଧ୍ୟ ଏଥିରେ ସାମିଲ । ସଲ୍ଲୁଙ୍କ ଗାଡ଼ିକୁ ଆଗ-ପଛରୁ ସୁରକ୍ଷା ଦେବା ପାଇଁ ଦୁଇଟି ଗାଡ଼ି ସର୍ବଦା ଯାଏ । ସଲ୍ଲୁଙ୍କ ଗାଡ଼ି ମଧ୍ୟ ସମ୍ପୂର୍ଣ୍ଣ ବୁଲେଟ୍ପ୍ରୁଫ୍ । ଜୀବନ ଉପରେ ବିପଦ ଥାଇ ସଲ୍ଲୁ ‘ସିକନ୍ଦର୍’ର ସୁଟିଂ ଶେଷ କରିଥିଲେ । ଫିଲ୍ମ ସେଟ୍ରେ ସୁରକ୍ଷା ବି ବଢ଼ାଯାଇଥିଲା । କୌଣସି ବାହାର ଲୋକଙ୍କୁ ସେଟ୍ ଭିତରକୁ ଅନୁମତି ନ ଥିଲା । ଆସନ୍ତା ୩୦ ତାରିଖରେ ରିଲିଜ୍ ହେବ ‘ସିକନ୍ଦର୍’ । ଫିଲ୍ମ ‘ଗଜନୀ’ର ନିର୍ଦ୍ଦେଶକ ଏଆର ମୁରୁଗଡସ ଏହାର ନିର୍ଦ୍ଦେଶନା ଦେଇଛନ୍ତି । ଏଥିରେ ସଲ୍ଲୁଙ୍କ ସହ ରଶ୍ମିକା ମୁଖ୍ୟ ଭୂମିକାରେ ଅଛନ୍ତି । କାଜଲ ଅଗ୍ରୱାଲ, ଶରମନ ଯୋଶୀ ଓ ପ୍ରତୀକ ବବ୍ୱର ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି ।
ଫିଲ୍ମର ଅଗ୍ରୀମ ବୁକିଂ ଗତ ୨୫ ତାରିଖରୁ ଆରମ୍ଭ ହୋଇସାରିଛି । ରଶ୍ମିକା ଓ ସଲ୍ଲୁଙ୍କ ମଧ୍ୟରେ ୩୧ ବର୍ଷର ତାରତମ୍ୟ ରହିଛି । ଏ ବିଷୟରେ ସେ ଗଣମାଧ୍ୟମକୁ କହିଛନ୍ତି, ବୟସ ତାରତମ୍ୟକୁ ନେଇ ଲୋକେ ଏତେ ନକାରାତ୍ମକ ପ୍ରତିକ୍ରିୟା ଦେଇଛନ୍ତି ଯେ ଆଗାମି ଦିନରେ ଜାହ୍ନବୀ କପୁର ଓ ଅନନ୍ୟା ପାଣ୍ଡେଙ୍କ ଭଳି କମ୍ ବୟସର ଅଭିନେତ୍ରୀଙ୍କ ସହ କାମ କରିବାକୁ ତାଙ୍କୁ ୧୦ ଥର ଭାବିବାକୁ ପଡ଼ିବ । ତା’ପରେ ବି କାମ କରିବେ ବୋଲି ସେ କହିଲେ । ଇତିମଧ୍ୟରେ ଆମିର ଖାନ୍ ନିଜର ନୂଆ ଗର୍ଲଫ୍ରେଣ୍ଡ୍ଙ୍କ ନାଁ ଗଣମାଧ୍ୟମ ସାମ୍ନାକୁ ଆଣିଲେ, ଯାହାକୁ ନେଇ ଏବେ ବି ଚର୍ଚ୍ଚା ଚାଲିଛି । ପ୍ରେସ୍ ମିଟ୍ରେ ସଲ୍ଲୁଙ୍କୁ ପଚରାଗଲା, ଶାହରୁଖ ଓ ଆମିର ଉଭୟଙ୍କୁ ଗୌରୀ ମିଳିଗଲା, ଆପଣଙ୍କୁ ଆପଣଙ୍କ ଗୌରୀ କେବେ ମିଳିବ? ଏଥିରେ ହସି ସଲ୍ଲୁ କହିଲେ, ଗୌରୀ ବ୍ୟତୀତ ଅନେକ ନାଁ- ମୀନା, ଭାରତୀ ମଧ୍ୟ ଅଛି ।
