କୋଲକାତା: ଦୁର୍ନୀତି ମାମଲାରେ ଗିରଫ ହୋଇଥିବା ଆରଜି କର ମେଡିକାଲ୍ କଲେଜ ଓ ହସ୍ପିଟାଲର ପୂର୍ବତନ ଅଧ୍ୟକ୍ଷ ସନ୍ଦୀପ ଘୋଷ ହଂକଂରେ ନର୍ସିଂ ଛାତ୍ରଙ୍କୁ ଅସଦାଚରଣ କରି ଫସିଥିଲେ । ୩୧ ବର୍ଷୀୟା ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲା ଏବଂ ଆରଜି କର ମେଡିକାଲର ପୂର୍ବତନ ଅଧ୍ୟକ୍ଷ ସନ୍ଦୀପ ଘୋଷଙ୍କୁ ନେଇ ଚର୍ଚ୍ଚା ଜାରି ରହିଥିବା ବେଳେ ଆଉ ଏକ ଖବର ଚର୍ଚ୍ଚାର ପ୍ରସଙ୍ଗ ପାଲଟିଛି । ୨୦୧୭ରେ ହଂକଂରେ ଜଣେ ନର୍ସିଂ ଛାତ୍ରଙ୍କୁ ଅସଦାଚରଣ କରି ଫସିଥିଲେ ସନ୍ଦୀପ । ପରେ ଘୋଷଙ୍କ ସ୍ପଷ୍ଟୀକରଣକୁ ଗ୍ରହଣ କରିବା ସହ ତାଙ୍କର କାନ୍ଧରେ ଆଘାତ ଲାଗିଥିବାରୁ ସେଠାକାର ଏକ କୋର୍ଟ ତାଙ୍କୁ ଆଶ୍ବସ୍ତି ଦେଇଥିଲେ ଏବଂ ମାମଲାରେ ଦୋଷମୁକ୍ତ କରିଥିଲେ ।
୨୦୧୭ରେ ହଂକଂର ଜଣେ ନର୍ସିଂ ଛାତ୍ର ଅଭିଯୋଗ କରିଥିଲେ ଯେ, ଡାକ୍ତରଖାନାର ଚେଞ୍ଜିଂ ରୁମରେ ସନ୍ଦୀପ ଘୋଷ ତାଙ୍କର ଯୌନାଙ୍ଗକୁ ଛୁଇଁବାକୁ ଚେଷ୍ଟା କରିଥିଲେ । ଏନେଇ ସାଉଥ ଚୀନ୍ ମର୍ଣ୍ଣିଂ ପୋଷ୍ଟରେ ଖବର ମଧ୍ୟ ପ୍ରକାଶ ପାଇଥିଲା । ସେପଟେ କୋଲକାତାର କେତେକ ଡାକ୍ତର ଏନେଇ ମଧ୍ୟ ସ୍ପଷ୍ଟ କରିଛନ୍ତି । ଆରଜି କର ମେଡିକାଲ କଲେଜ ଓ ହସ୍ପିଟାଲରେ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଚର୍ଚ୍ଚାକୁ ଆସିଥିଲେ ସନ୍ଦୀପ ଘୋଷ । ମାମଲାକୁ ଚାପିଦେବା ଲାଗି ସେ ଉଦ୍ୟମ କରିଥିବା କୁହାଯାଉଛି। ତାଙ୍କୁ ମାରାଥନ ଜେରା କରିବା ପରେ ଶେଷରେ ମେଡିକାଲରେ ଦୁର୍ନୀତି ମାମଲାରେ ତାଙ୍କୁ ସିବିଆଇ ଗିରଫ କରିଛି ।
ମିଳିଥିବା ସୂଚନା ଅନୁସାରେ, ସନ୍ଦୀପ ଘୋଷ ଏକ୍ସଚେଞ୍ଜ କାର୍ଯ୍ୟକ୍ରମ ଲାଗି ହଂକଂ ଯାଇଥିଲେ । ଏପ୍ରିଲ ୮, ୨୦୧୭ରେ କ୍ବିନ୍ ଏଲିଜାବେଥ୍ ହସ୍ପିଟାଲର ଜଣେ ନର୍ସିଂ ଛାତ୍ର ତାଙ୍କ ବିରୋଧରେ ଅସଦାଚରଣ ନେଇ ଅଭିଯୋଗ କରିଥିଲେ । ଏପରିକି ସେ ଛାତ୍ରଙ୍କୁ ‘ଏହି ଛୁଆଁ ପସନ୍ଦ କରୁଛନ୍ତି କି ନାହିଁ’ ବୋଲି ପ୍ରଶ୍ନ କରିଥିଲେ ବୋଲି ସାଉଥ ଚୀନ୍ ମର୍ଣ୍ଣିଂ ପୋଷ୍ଟରେ ଖବର ପ୍ରକାଶ ପାଇଥିଲା । ସେତେବେଳେ ୪୫ ବର୍ଷୀୟ ସନ୍ଦୀପ ଘୋଷ ମୁର୍ସିଦାବାଦ ମେଡିକାଲ କଲେଜର ଓର୍ଥୋପେଡିକ୍ ବିଭାଗର ମୁଖ୍ୟ ଥିଲେ । ପରେ ୨୦୧୮ରେ ତାଙ୍କୁ କୋଲକାତାର ଆରଜି କର ମେଡିକାଲ କଲେଜ ଓ ହସ୍ପିଟାଲର ପ୍ରିନ୍ସିପାଲ ଭାବରେ ନିଯୁକ୍ତି ମିଳିଥିଲା ।
