କାବୁଲ,୧୭/୦୯: ଆଫଗାନିସ୍ତାନରେ ଜାତିସଂଘ ପକ୍ଷରୁ ଚାଲିଥିବା ପୋଲିଓ ଟିକାକରଣ ଅଭିଯାନକୁ ତାଲିବାନ ରୋକିଛି । ତେବେ କାହଁକି ରୋକାଯାଇଛି ତାର କାରଣ ଦର୍ଶାଯାଇନାହିଁ । ବିଶ୍ୱରେ ପୋଲିଓ ବ୍ୟାପିଥିବା ଦୁଇ ଦେଶ ମଧ୍ୟରୁ ଆଫାଗାନିସ୍ତାନ ଅନ୍ୟତମ । ଏହାବ୍ୟତୀତ ପାକିସ୍ତାନରେ ମଧ୍ୟ ପୋଲିଓ ବ୍ୟାପିବାରେ ଲାଗିଛି ।
ଚଳିତ ମାସରୁ ଘରକୁ ଘର ବୁଲି ପିଲାମାନଙ୍କୁ ପୋଲିଓ ବୁନ୍ଦା ଖୁଆଇବା ଲାଗି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ଯୋଜନା କରାଯାଇଥିଲା । କିନ୍ତୁ ତାଲିବାନ ପକ୍ଷରୁ ଅନୁମତି ଦିଆଯାଇନାହିଁ । ଗତ ଜୁନ ମାସରୁ ଡବ୍ଲ୍ୟୁଏଚ୍ଓ କର୍ମୀମାନେ ଘରକୁ ଘର ବୁଲି ପିଲାଙ୍କୁ ପୋଲିଓ ବୁନ୍ଦା ଦେଉଛନ୍ତି । ଶିବିର କରାଯାଇ ପୋଲିଓ ବୁନ୍ଦା ଦିଆଯିବା ଅପେକ୍ଷା ଏହା ବେଶ୍ ପ୍ରଭାବୀ ହୋଇପାରୁଛି । କିନ୍ତୁ ଘରକୁ ଘର ବୁଲିବାକୁ ନେଇ ତାଲିବାନ ନାରାଜ ହୋଇଥିବା ଜଣାପଡିଛି । ତେଣୁ ଏହାକୁ ରୋକାଯାଇଛି ।
ଗତବର୍ଷ ଦେଶରେ ୬ଟି ପୋଲିଓ ମାମଲା ଚିହ୍ନଟ ହୋଇଥିଲା ବେଳେ ଚଳିତବର୍ଷ ଏପର୍ଯ୍ୟନ୍ତ ୧୮ଟି ମାମଲା ଚିହ୍ନଟ ହୋଇଛି । ସେହିଭଳି ପାକିସ୍ତାନରେ ଆତଙ୍କୀମାନେ ପୋଲିଓ କର୍ମୀଙ୍କୁ ଟାର୍ଗେଟ କରୁଥିବାରୁ ସେଠାରେ ଟିକାକରଣ ପ୍ରଭାବିତ ହୋଇଛି।
