ପୁରୀ,୦୬/୦୭: ଶନିବାର ବସିବାକୁ ଯାଉଛି ଶ୍ରୀମନ୍ଦିର ରତ୍ନଭଣ୍ଡାର ଗଣତିମଣତି ନେଇ ନବଗଠିତ କମିଟିର ପ୍ରଥମ ବୈଠକ । ପୂର୍ବାହ୍ନ ୧୧ଟା ବେଳେ ଶ୍ରୀମନ୍ଦିର କାର୍ଯ୍ୟାଳୟ ସଭା କକ୍ଷରେ ଏହି ବୈଠକ ବସିବ । 

ଗତକାଲି ରାଜ୍ୟ  ସରକାର ଜଷ୍ଟିସ୍‌ ଅରଜିତ୍‌ ପଶାୟତଙ୍କ  ଅଧ୍ୟକ୍ଷତାରେ ଗଠିତ ପୁରୁଣା କମିଟିକୁ ରଦ୍ଦ କରି ଜଷ୍ଟିସ୍‌ ବିଶ୍ୱନାଥ ରଥଙ୍କ ଅଧ୍ୟକ୍ଷତାରେ  ଏକ ୧୬ ଜଣିଆ ନୂଆ କମିଟି ଗଠନ  କରିଥିଲେ । ଏହି କମିଟି ରତ୍ନଭଣ୍ଡାର  ମରାମତି, ରତ୍ନ ଗଣତିମଣତି ନେଇ  ବ୍ୟବସ୍ଥା ଓ ରୂପରେଖ ପ୍ରସ୍ତୁତ କରିବ । 

ଗଣମାଧ୍ୟମକୁ ଜଷ୍ଟିସ୍‌ ରଥ କହିଛନ୍ତି,  ୪୬ ବର୍ଷ ପରେ ଏହି ଗଣତିମଣତି  ହେଉଥିବାରୁ ବୈଠକରେ ବିସ୍ତୃତ  ଆଲୋଚନା ପରେ ଯାହା କିଛି ନିଷ୍ପତ୍ତି  ହେବ । ଏନେଇ ଆଇନମନ୍ତ୍ରୀ ପୃଥ୍ୱୀରାଜ  ହରିଚନ୍ଦନ କହିଛନ୍ତି, ୨୪ ବର୍ଷ ଧରି ପୁରୁଣା  ସରକାର ଯାହା କରିପାରିନଥିଲେ ୨୪  ଦିନର ସରକାର ତାହା କରି ଦେଖାଇଛନ୍ତି । 

ଶନିବାର ବୈଠକରେ ରତ୍ନଭଣ୍ଡାର  ଖୋଲିବାର ତାରିଖ ଓ ମୋଡ଼ାଲିଟି ନିର୍ଦ୍ଧାରିତ  ହେବ । ରତ୍ନଭଣ୍ଡାର ରତ୍ନ ଗଣତିମଣତି  କମିଟି କରିବା ସହ ମରାମତି କାମ  ଏଏସ୍‌ଆଇ କରିବ । କମିଟି ସଦସ୍ୟ ତଥା  ବରିଷ୍ଠ ସେବାୟତ ଜନାର୍ଦ୍ଦନ ପାଟ୍ଟଯୋଶୀ  ମହାପାତ୍ର କହିଛନ୍ତି, ମାଲିକ ଘରେ ନଥିବା  ବେଳେ ମହାପ୍ରଭୁଙ୍କ ଅଳଙ୍କାର ଗଣତି  କରାନଯାଉ । ଠାକୁର ଆସିବା ପରେ ତାଙ୍କ  ଆଜ୍ଞା ଓ ଗଜପତିଙ୍କ ଅନୁମତି ନେଇ ଗଣତିମଣତି କରାଯାଉ ।