ଭୁବନେଶ୍ୱର,୦୪/୧୦: ବିରାଟ ଯୋଜନା । ଦକ୍ଷିଣ ଓଡ଼ିଶାର ଶେଷ ମୁଣ୍ଡ ମୋଟୁରୁ ଉତ୍ତର ଓଡ଼ିଶାର ଶେଷ ଭାଗ ତିରିଂ ଯାଏଁ ଯିବ ସୁଦୀର୍ଘ ସଡ଼କ ପଥ । ପୂରା ଓଡ଼ିଶାର ମଝି ଭାଗ ଦେଇ ଯିବ ପ୍ରସ୍ତାବିତ ମେରୁଦଣ୍ଡ ଏକ୍ସପ୍ରେସ୍ ୱେ । ୯ ଜିଲ୍ଲା ଭିତର ଦେଇ ନିର୍ମାଣ ହେବ ୯୬୯ କିଲୋମିଟର ସଡ଼କ । ଖର୍ଚ୍ଚ ହେବ ପ୍ରାୟ ୧୪ ହଜାର ୮୦୯ କୋଟି ଟଙ୍କା ।
ସାରା ରାଜ୍ୟରେ ସଡ଼କ ଯୋଗାଯୋଗ ବ୍ୟବସ୍ଥାରେ ଆସିବ ବିରାଟ ପରିବର୍ତ୍ତନ । ସବୁ ଭାଗକୁ ଛୁଇଁବ ରାଜପଥ । ଦକ୍ଷିଣରୁ ଉତ୍ତରକୁ ପୂରା କେନ୍ଦ୍ରୀୟ ଓଡ଼ିଶା ଦେଇ ଏହି ରାସ୍ତା ଲମ୍ବିବ । ଖାଲି ସେତିକି ନୁହେଁ, ଏହାକୁ ସଂଯୋଗ କରି ପଶ୍ଚିମରୁ ପୂର୍ବକୁ ସଂଯୋଗ କରିବ ୪ଟି ନୂଆ କରିଡର । ପୂର୍ତ୍ତ ବିଭାଗର ବରିଷ୍ଠ ଅଧିକାରୀଙ୍କ ସୂଚନା ମୁତାବକ, ଓଡ଼ିଶାର ମଝି ଦେଇ ସଡ଼କ ପଥଟି ଏମିତି ଯିବ, ସତେ ଯେମିତି ଏହା ରାଜ୍ୟର ମେରୁଦଣ୍ଡ ଭଳି ଛିଡ଼ା ହେବ । ସେହିପରି ପଶ୍ଚିମରୁ ପୂର୍ବକୁ ୪ଟି ରାଜପଥ ଏଭଳି ନିର୍ମାଣ ହେବ, ଯେମିତି ମଣିଷ କଙ୍କାଳର ପିଞ୍ଜରା ହାଡ଼ ବାମରୁ ଡାହାଣକୁ ଲମ୍ବିଥାଏ ।
ବିସ୍ତୃତ ଯୋଜନାଟି ଏମିତି ମେରୁଦଣ୍ଡ ଏକ୍ସପ୍ରେସ ମାଲକାନଗିରି ଜିଲ୍ଲାର ମୋଟୁଠାରୁ (ଯାହାକି ରାଜ୍ୟର ଶେଷ ମୁଣ୍ଡ) ବାହାରିବ । ସେଠାରୁ ମାଲକାନଗିରି ସହର, ଗୋବିନ୍ଦପାଲି, କୋରାପୁଟ, କାଶୀପୁର, ଆମ୍ବଦୋଳା, ତୁମୁଡ଼ିବନ୍ଧ, ନୂଆଗାଁ, ସାରଙ୍ଗଗଡ଼, ଫୁଲବାଣୀ, ପୁରୁଣା କଟକ, ଆଠମଲ୍ଲିକ, ବଇଁନ୍ଦା, କଣିହା, ଖମାର, କାଞ୍ଜିପାଣି, କେନ୍ଦୁଝର, ଯଶିପୁର, ରାଇରଙ୍ଗପୁର ଦେଇ ତିରିଂରେ ପହଞ୍ଚିବ ।
ଯୋଜନା ଅନୁସାରେ ଏହି ପ୍ରସ୍ତାବିତ ରାସ୍ତା ୬ ଥାକିଆ (ଲେନ୍) ହେବ । ଏହା ସହ ଉଭୟ ପାଶ୍ୱର୍ରେ ୨ ଲେନ୍ ଲେଖାଏଁ ରହିବ ସର୍ଭିସ ରାସ୍ତା । ୩୮ଟି କିମି ରାସ୍ତା ସମ୍ପୂର୍ଣ୍ଣ ଭାବେ ନୂଆ କରି ନିର୍ମାଣ କରାଯିବ । ବାକି ଯେଉଁ ରାସ୍ତା ଅଛି, ତାହାକୁ ନୂଆ ରୂପ ଦେଇ ସମ୍ପ୍ରସାରଣ କରାଯିବ । ଏଥିରେ ଜାତୀୟ ରାଜପଥର ୪୫୭ କିମି, ପୂର୍ତ୍ତ ବିଭାଗର ୩୦୮ କିମି ଓ ଅନ୍ୟାନ୍ୟ ବିଭାଗର ୧୬୬ କିମି ରାସ୍ତା ରହିଛି । ବର୍ତ୍ତମାନ ଏହା ଭିତରୁ ୨୨୮ କିମି ଗୋଟିଏ ଲେନ୍ ରାସ୍ତା ଥିବାବେଳେ ୬୫୩ କିମି ଦୁଇ ଲେନ୍ ରହିଛି ।
ମୂଳ ଉଦ୍ଦେଶ୍ୟ ହେଲା- ଓଡ଼ିଶା ଦେଇ ଯାଇଥିବା ଜାତୀୟ ରାଜପଥ ଓ ପ୍ରମୁଖ ରାସ୍ତାଗୁଡ଼ିକ ମୁଖ୍ୟତଃ ଉପକୂଳ କିମ୍ବା ପଶ୍ଚିମ ଓଡ଼ିଶା ଦେଇ ଯାଇଛି । ମାତ୍ର ଆଭ୍ୟନ୍ତରୀଣ କିମ୍ବା କେନ୍ଦ୍ରୀୟ ଅଞ୍ଚଳ ଦେଇ କୌଣସି ଜାତୀୟ ରାଜପଥ କିମ୍ବା ପ୍ରମୁଖ ରାସ୍ତା ଯାଇନାହିଁ । ସମ୍ପୂର୍ଣ୍ଣ ଓଡ଼ିଶାରେ ଗମନାଗମନ ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରିବାକୁ ଏହି ଯୋଜନା କରାଯାଇଛି ।
ରାଜ୍ୟ ସରକାର ଏ ନେଇ ଗୁରୁତର ସହ ବିଚାର ବିମର୍ଷ ଚଳାଇଛନ୍ତି । ଖାଲି ସେତିକି ନୁହେଁ, ଏହି ପରିକଳ୍ପନାକୁ ବାସ୍ତବ ରୂପ ଦେବା ପାଇଁ ନିଜେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ପ୍ରସ୍ତାବିତ କରିଡର ନେଇ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କରୀଙ୍କ ସହ ମଧ୍ୟ କଥା ହୋଇଛନ୍ତି । ରାଜ୍ୟ ସରକାରଙ୍କ ପକ୍ଷରୁ ଏହାକୁ ଅଟଳ ଏକ୍ସପ୍ରେସ ଯୋଜନାରେ ସାମିଲ କରିବାକୁ ପ୍ରସ୍ତାବ ଦିଆଯାଇଛି । ସେହିପରି ପଶ୍ଚିମ ଓ ପୂର୍ବ ଓଡ଼ିଶା ସଂଯୋଗୀକରଣ ପାଇଁ ୪ଟି କରିଡର ଯୋଜନା କରିଛି ପୂର୍ତ୍ତ ବିଭାଗ । ଏସବୁ ଯାକ କରିଡରରେ ୬ ଲେନ୍ ରାସ୍ତା ରହିବ, ଏହାସହ ୨ ଲେନ୍ ଲେଖାଏଁ ସର୍ଭିସ୍ ରାସ୍ତା ଉଭୟ ପାଶ୍ୱର୍ରେ ରହିଛି ।
ପ୍ରଥମ କରିଡର ଝାରସୁଗୁଡ଼ାରୁ ବାହାରି ବାଲେଶ୍ୱରରେ ପହଞ୍ଚିବ, ପ୍ରାୟ ୩୮୩ କିମି । ଖର୍ଚ୍ଚ ହେବ ପାଖାପାଖି ସାଢ଼େ ୭୫୦୪ ଟଙ୍କା । ଏହା ଝାରସୁଗୁଡ଼ା, ବଣାଇଗଡ଼, କେନ୍ଦୁଝର, ଠାକୁରମୁଣ୍ଡା, ଉଦଳା ହୋଇ ବାଲେଶ୍ୱର ଛୁଇଁବ । ୪୧ କିମି ପୂରା ନୂଆ ସଡ଼କ ତିଆରି ହେବ । ବାକି ଯେଉଁ ରାସ୍ତା ଅଛି, ତା’ର ନବକଳେବର କରାଯିବ । ଏଥିରେ ପୂର୍ତ୍ତ ବିଭାଗର ୨୯୬ କିମି, ଏନ୍ଏଚ୍ ୧୫ କିମି ଓ ବାକି ବିଭାଗର ୩୧ କିମି ରାସ୍ତା ଅଛି ।
ଦ୍ୱିତୀୟ କରିଡର ସମ୍ବଲପୁରରୁ ସାତଭାୟା ପାଇଁ ଯୋଜନା ହୋଇଛି । ଏଥିରେ ୪୦୪ କିମି ରାସ୍ତା ପାଇଁ ୫୪୭୭ କୋଟି ଟଙ୍କା ଖର୍ଚ୍ଚ ଆକଳନ କରାଯାଇଛି । ପ୍ରସ୍ତାବିତ କରିଡରଟି ସମ୍ବଲପୁରରୁ ନାକଟିଦେଉଳ, ବୁଢ଼ାବାହାଲ, କଣିହାଁ, ତାଳଚେର, କାମାକ୍ଷାନଗର, ଯାଜପୁର, ଚାନ୍ଦବାଲି ହୋଇ କେନ୍ଦ୍ରାପଡ଼ାର ସାତଭାୟାକୁ ନେବାକୁ ଯୋଜନା ଅଛି । ଏଥିରେ ୨୬୧ କିମି ଏନ୍ଏଚ୍, ୧୩୫ ପୂର୍ତ୍ତ ରାସ୍ତା ସହ ଅନ୍ୟ ବିଭାଗର ୪ କିମି ରାସ୍ତାର ଉନ୍ନତିକରଣ କରାଯିବ । ମାତ୍ର ୪ କିମି ରାସ୍ତା ସମ୍ପୂର୍ଣ୍ଣ ନୂଆ କରି ନିର୍ମାଣ ହେବ ।
ତୃତୀୟ କରିଡରଟି ନୂଆପଡ଼ାରୁ ପୁରୀର ଅସ୍ତରଙ୍ଗକୁ ହେବ । ୪୯୧ କିମି ରାସ୍ତା ପାଇଁ ପ୍ରାୟ ୯୩୫୯ କୋଟି ଟଙ୍କା ଖର୍ଚ୍ଚ ଆକଳନ କରାଯାଇଛି । ଏହି ରାସ୍ତା ନୂଆପଡ଼ା, ପାଟଣାଗଡ଼, ବଲାଙ୍ଗୀର, ଫୁଲବାଣୀ, ଦଶପଲ୍ଲା, ଖୋର୍ଦ୍ଧା, ପିପିଲି ଦେଇ ଅସ୍ତରଙ୍ଗରେ ପହଞ୍ଚିବ । ଏଥିରେ ୨୭ କିମି ସମ୍ପୂର୍ଣ୍ଣ ରାସ୍ତା ନିର୍ମାଣ ହେବ । ୪୭ କିମି ଏନ୍ଏଚ୍, ୩୭୦ କିମି ପୂର୍ତ୍ତ ରାସ୍ତା ଓ ଅନ୍ୟ ବିଭାଗର ୪୭ କିମି ରାସ୍ତାକୁ ସମ୍ପ୍ରସାରଣ ଓ ଉନ୍ନତିକରଣ କରାଯିବା ଯୋଜନା ଅଛି ।
ଚତୁର୍ଥ କରିଡର କଳାହାଣ୍ଡିର ବୃନ୍ଦାବାହାଲ୍ରୁ ଗଞ୍ଜାମର ଗୋପାଳପୁରକୁ ନିର୍ମାଣ ହେବ। ପ୍ରସ୍ତାବିତ ଏହି କରିଡରରେ ୬୮୦୦ କୋଟି ଟଙ୍କା ବ୍ୟୟରେ ୩୫୭ କିମି ସଡ଼କ ନିର୍ମାଣ ଯୋଜନା ଅଛି । ବୃନ୍ଦାବାହାଲ, ଭବାନୀପାଟଣା, ବ୍ରାହ୍ମଣୀଗାଁ, ବଡ଼ଗଡ଼, ଆସିକା ଦେଇ ଗୋପାଳପୁରରେ ପହଞ୍ଚିବ ଏହି ରାସ୍ତା । ୧୭୬ କିମି ପୂର୍ତ୍ତ ସଡ଼କ, ୩୮ କିମି ଏନ୍ଏଚ୍, ୧୩୩ କିମି ଅନ୍ୟ ବିଭାଗ ରାସ୍ତାର ଉନ୍ନତିକରଣ ହେବ । କେବଳ ୧୦ କିମି ନୂଆ ସଡ଼କ ନିର୍ମାଣ କରିବାକୁ ପଡ଼ିବ ।
ପୂର୍ତ୍ତ ବିଭାଗ ଅଧିକାରୀଙ୍କ ସୂଚନା ଅନୁସାରେ ପ୍ରସ୍ତାବିତ ମେରୁଦଣ୍ଡ ଏକ୍ସପ୍ରେସ ଓ ୪ଟି ଯାକ କରିଡର ନିର୍ମାଣ ହେଲେ ଓଡ଼ିଶା ସଡ଼କ ଯୋଗାଯୋଗ କ୍ଷେତ୍ରରେ ନୂଆ ଅଧ୍ୟାୟ ଲେଖି । ୪ଟି ଯାକ କରିଡର ହେଲେ ଭବାନୀପାଟଣା, ଗୋପାଳପୁର, ପାରାଦୀପ, ସମ୍ବଲପୁରରେ ବିକାଶର ଧାରା ଆହୁରି ତ୍ୱରାନ୍ୱିତ ହେବ । ବ୍ୟବସାୟିକ କାରବାର ବଢ଼ିବ । ଅର୍ଥନୀତି ସମୃଦ୍ଧ ହେବ। ଉପକୂଳ ଓ ପଶ୍ଚିମ ଓଡ଼ିଶା ଦୂରତ୍ୱ କମି । ବଡ଼ କଥା ହେଲା, କେନ୍ଦ୍ରୀୟ ଓଡ଼ିଶାରେ ବିକାଶର ନୂଆ ଧାରା ଆରମ୍ଭ ହେବ । କେନ୍ଦ୍ରରୁ ସବୁଜ ସଙ୍କେତ ମିଳିବା ପରେ ଏ ସମସ୍ତ ପ୍ରକଳ୍ପ ପାଇଁ ସର୍ଭେ ଆରମ୍ଭ ହେବ । ପର୍ଯ୍ୟାୟ କ୍ରମେ ଏହାକୁ କାର୍ଯ୍ୟକାରୀ କରାଯିବ ।
