ନୂଆଦିଲ୍ଲୀ,୧୪।୪: ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହୱୁର ହୁସେନ ରାଣାକୁ ଜାତୀୟ ତଦନ୍ତ ସଂସ୍ଥା (NIA) କଷ୍ଟଡିରେ ଅଛି। ତଦନ୍ତକାରୀ ଏଜେନ୍ସିର ଅଧିକାରୀମାନେ ପ୍ରତିଦିନ ୮ରୁ ୧୦  ଘଣ୍ଟା ତାକୁ ପଚରାଉଚରା କରୁଛନ୍ତି। ଫଳରେ ଯେପରି ଆକ୍ରମଣ ପଛର ବଡ଼ ଷଡ଼ଯନ୍ତ୍ରର ପର୍ଦ୍ଦାଫାସ ହୋଇପାରିବ। ସୋମବାର ସରକାରୀ ସୂତ୍ରରୁ ମିଳିଥିବା ସୂଚନା ଅନୁସାରେ,  NIA ଅଧିକାରୀମାନେ ରାଣାର ଡାକ୍ତରୀ ପରୀକ୍ଷା ସୁନିଶ୍ଚିତ କରୁଛନ୍ତି। ତାକୁ ନିଜ ଓକିଲଙ୍କୁ ଭେଟିବାକୁ ମଧ୍ୟ ଅନୁମତି ଦିଆଯାଉଛି। ଶୁକ୍ରବାର ସକାଳେ ଦିଲ୍ଲୀର ଏକ କୋର୍ଟ ତାଙ୍କୁ ଆମେରିକାରୁ ପ୍ରତ୍ୟର୍ପଣ କରାଯିବା ପରେ ୧୮ ଦିନ ପାଇଁ NIA ହସ୍ତାନ୍ତର କରିଛନ୍ତି।

ସୂତ୍ର ଅନୁଯାୟୀ, ୨୦୦୮ ମସିହାରେ ଲସ୍କର-ଇ-ତୋଇବା ଦ୍ୱାରା କରାଯାଇଥିବା ଆକ୍ରମଣ ପଛରେ ଥିବା ବଡ଼ ଧରଣର ଷଡ଼ଯନ୍ତ୍ରର ପର୍ଦ୍ଦାଫାସ କରିବା ପାଇଁ ଚେଷ୍ଟା ଚାଲିଛି। ଏଥିପାଇଁ ଏନଆଇଏ ତଦନ୍ତକାରୀମାନେ ରାଣାକୁ ପ୍ରତିଦିନ ପ୍ରାୟ ଆଠରୁ ଦଶ ଘଣ୍ଟା ପଚରାଉଚରା କରୁଛନ୍ତି। ଏହି ଆକ୍ରମଣରେ ୧୬୬ ଜଣଙ୍କର ମୃତ୍ୟୁ ହୋଇଥିଲା ଏବଂ ୨୩୮ ରୁ ଅଧିକ ଆହତ ହୋଇଥିଲେ। ରାଣା  ମଧ୍ୟ ଜେରା ସମୟରେ ସହଯୋଗ କରୁଛି। ସେ କହିଛନ୍ତି ଯେ ମୁଖ୍ୟ ତଦନ୍ତକାରୀ ଅଧିକାରୀ ଜୟା ରାୟଙ୍କ ନେତୃତ୍ୱରେ NIA ଅଧିକାରୀଙ୍କ ଏକ ଦଳ ରାଣାକୁ ଲଗାତାର  ପଚରାଉଚରା କରୁଛି। ରାଣା ଏପର୍ଯ୍ୟନ୍ତ କେବଳ ତିନୋଟି ଜିନିଷ ମାଗିଛି - ଗୋଟିଏ କଲମ, କାଗଜ କିମ୍ବା ନୋଟପ୍ୟାଡ୍ ଏବଂ କୁରାନ। ଯାହା ତାଙ୍କୁ NIA ଦ୍ୱାରା ଯୋଗାଇ ଦିଆଯାଇଛି। 

ସୂତ୍ର ଅନୁଯାୟୀ ରାଣା ଏପର୍ଯ୍ୟନ୍ତ ସ୍ପେଶାଲ କୌଣସି ଖାଦ୍ୟ ସମ୍ପର୍କରେ ଦାବି କରିନି । ତାଙ୍କୁ  ପ୍ରୋଟୋକଲ ଅନୁଯାୟୀ ଅନ୍ୟ ଅଭିଯୁକ୍ତମାନଙ୍କୁ ଦିଆଯାଉଥିବା ଖାଦ୍ୟ ଦିଆଯାଉଛି। ସୂତ୍ର ଅନୁଯାୟୀ, ଭୟଙ୍କର ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ରାଣାଙ୍କୁ ସିଜିଓ କମ୍ପ୍ଲେକ୍ସରେ ଥିବା ଏଜେନ୍ସିର ମୁଖ୍ୟାଳୟ ଭିତରେ ଏକ ଉଚ୍ଚ-ସୁରକ୍ଷା ପ୍ରକୋଷ୍ଠରେ ରଖାଯାଇଛି । ତାଙ୍କୁ ୨୪ ଘଣ୍ଟା ସୁରକ୍ଷା ଦେବା ପାଇଁ ସୁରକ୍ଷା କର୍ମୀ ନିୟୋଜିତ ହୋଇଛନ୍ତି।