ନୂଆଦିଲ୍ଲୀ: ଦିଲ୍ଲୀର ନୂତନ ବୈଦୁତିକ ଯାନ ନୀତିର ଡ୍ରାଫ୍ଟ ପ୍ରକାଶ ପାଇବା ପରଠାରୁ ଦିଲ୍ଲୀରେ ସିଏନଜି ଅଟୋରିକ୍ସା ଉପରେ ନିଷେଧାଦେଶ ଜାରି ରହିଛି । ଏବେ ଦିଲ୍ଲୀ ସରକାର ଏହାକୁ ବନ୍ଦ କରିଦେଇଛନ୍ତି । ଇଭି ନୀତି ସଂପର୍କରେ ଦିଲ୍ଲୀ ସରକାର ଅନେକ ବଡ଼ ଘୋଷଣା କରିଛନ୍ତି ।ନୂଆ ଘୋଷଣା ଅନୁସାରେ ସିଏନଜି ଅଟୋରିକ୍ସା ଦିଲ୍ଲୀରେ ବନ୍ଦ ହେବ ନାହିଁ । ଆସନ୍ତା ୩ ମାସ ପାଇଁ ପୂର୍ବ ନୀତି ଜାରି ରଖିବାକୁ ଦିଲ୍ଲୀ ସରକାର ମଙ୍ଗଳବାର ଅନୁମତି ଦେଇଛନ୍ତି । ଏହା ସହିତ ରାଜଧାନୀ ମଧ୍ୟରେ ବିଦ୍ୟୁତ ସବସିଡି ଜାରି କରିବା ପାଇଁ କ୍ୟାବିନେଟ ବୈଠକରେ ମଧ୍ୟ ନିଷ୍ପତ୍ତି ନିଆଯାଇଛି। ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଦିଲ୍ଲୀ ପରିବହନ ମନ୍ତ୍ରୀ ପଙ୍କଜ ସିଂହ ମଙ୍ଗଳବାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଅଟୋରିକ୍ସା ଉପରେ କୌଣସି ପ୍ରତିବନ୍ଧକ ଲଗାଯିବ ନାହିଁ । ସେ କହିଛନ୍ତି ଯେ, ସାଧାରଣ ଲୋକଙ୍କ ପାଇଁ ସରକାର ଅନେକ କାମ କରିବାକୁ ଚାହୁଁଛନ୍ତି। ତେଣୁ ସମସ୍ତଙ୍କୁ ନୂତନ ସଂଶୋଧିତ ଇଭି ନୀତି ସହିତ ଅନ୍ତର୍ଭୁକ୍ତ କରାଯିବ । ତେବେ ଏହା ସ୍ପଷ୍ଟ ଯେ ଅଟୋ ଉପରେ କୌଣସି ପ୍ରତିବନ୍ଧକ ଲାଗିବ ନାହିଁ ।
ଦିଲ୍ଲୀ ସରକାର ଇଭି ନୀତି ଉପରେ ସମୀକ୍ଷା କରୁଛନ୍ତି । ପ୍ରତ୍ୟେକ ଦିଗରୁ ବିଚାର କରିବା ପରେ ହିଁ କୌଣସି ଅନ୍ତିମ ନିଷ୍ପତ୍ତି ନିଆଯିବ । କ୍ୟାବିନେଟ ବୈଠକ ପରେ ଦିଲ୍ଲୀର ମନ୍ତ୍ରୀ ଆଶିଷ ସୁଦ କହିଛନ୍ତି ଯେ, ବିଜୁଳୀ ସବସିଡି ବନ୍ଦ ହେବା ନେଇ ଅନେକ ବିଭ୍ରାନ୍ତିକର ତଥ୍ୟ ପ୍ରଚାର କରାଯାଉଛି । କିନ୍ତୁ ଦିଲ୍ଲୀ ସରକାର କୃଷକ ଏବଂ ଆଇନଜୀବୀଙ୍କ ପାଖରେ ଫାଇଦା ପହଞ୍ଚାଇବାକୁ ଚେଷ୍ଟା କରୁଛନ୍ତି ।
