ନୂଆଦିଲ୍ଲୀ: ୨୦୨୩୬ ସୁଦ୍ଧା ଭାରତର ଜନସଂଖ୍ୟା ୧୫୨ କୋଟିରୁ ଅଧିକ ହେବାକୁ ଯାଉଛି । ପରିସଂଖ୍ୟାନ ମନ୍ତ୍ରାଳୟ ଦେଶର ଜନସଂଖ୍ୟା ସମ୍ବନ୍ଧୀୟ ଏକ ରିପୋର୍ଟ ପ୍ରକାଶ କରିଛି । ଆଗାମୀ ଦିନରେ ମହିଳା ଓ ପରୁଷଙ୍କ ମଧ୍ୟରେ ଥିବା ଲିଙ୍ଗାନୁପାତରେ ସୁଧାର ଆସିବ । ୨୦୧୧ରେ ମିହିଳାଙ୍କ ସଂଖ୍ୟା ୪୮.୫%ରୁ ବଢ଼ି ଏହା ୪୮.୮ ପ୍ରତିଶତ ହେବ ବୋଲି ରିପୋର୍ଟରୁ ଜଣାପଡ଼ିଛି । ଭାରତରେ ଏବେ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ବଢ଼ିବ ।
୨୦୧୧ରେ ପ୍ରତି ୧୦୦୦ ପୁରୁଷ ତୁଳନାରେ ୯୪୩ ମହିଳା ଥିଲେ । କିନ୍ତୁ ୨୦୩୬ ବେଳକୁ ଏଥିରେ ସୁଧାର ଆସିବା ସହ ପ୍ରତି ୧୦୦୦ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ୯୫୨ ହେବାର ସମ୍ଭାବନା ରହିଛି । ‘ଭାରତରେ ମହିଳା ଓ ପୁରୁଷ ୨୦୨୩’ ନାମକ ଏହି ରିପୋର୍ଟ ଅନୁସାରେ, ୨୦୩୬ ସୁଦ୍ଧା ଦେଶରେ ୧୫ ବର୍ଷରୁ କମ୍ ବୟସର ପିଲାଙ୍କ ସଂଖ୍ୟା ହ୍ରାସ ପାଇବ । ଏହି ସମୟରେ ୬୦ କିମ୍ବା ଏହାଠୁ ଅଧିକ ବୟସର ଲୋକଙ୍କ ସଂଖ୍ୟା ବଢ଼ିବାର ସମ୍ଭାବନା ରହିଛି ।
ପରିସଂଖ୍ୟାନ ମନ୍ତ୍ରାଳୟ ଦ୍ବାରା ଜାରି ହୋଇଥିବା ରିପୋର୍ଟରେ, ଜନସଂଖ୍ୟା, ସ୍ବାସ୍ଥ୍ୟ, ଶିକ୍ଷା, ସ୍ବାସ୍ଥ୍ୟ, କାମକାର୍ଯ୍ୟ, ଗାଁ-ସହର ମଧ୍ୟରେ ସଂପର୍କ, ରାଜ୍ୟ-ରାଜ୍ୟ ମଧ୍ୟରେ ପାର୍ଥକ୍ୟ ସଂପର୍କରେ ଦର୍ଶାଯାଇଛି । ତେବେ ଏହି ରିପୋର୍ଟ, ବିଭିନ୍ନ ମନ୍ତ୍ରାଳୟ, ବିଭାଗ ଏବଂ ଅନ୍ୟ ତଥ୍ୟ ଉପରେ ଆଧାରିତ । ବିଶେଷ କରି ଏହି ରିପୋର୍ଟରେ ଦେଶରେ ଲିଙ୍ଗଗତ ସମାନତା ଉପରେ ଅଧିକ ତଥ୍ୟ ଦିଆଯାଇଛି ।
ରିପୋର୍ଟ ଅନୁସାରେ, ୨୦୧୬-୨୦୨୦ ମଧ୍ୟରେ ୨୦ରୁ ୨୪ ଏବଂ ୨୫-୨୯ ବର୍ଷୀୟା ମହିଳାଙ୍କ ମଧ୍ୟରେ ପିଲା ଜନ୍ମ କରିବାର ହାର କମିଛି । ସେହିଭଳି ୩୫-୩୯ ବର୍ଷୀୟା ମହିଳାଙ୍କ ପିଲା ଜନ୍ମ କରିବାର ହାର ୩୨.୭ରୁ ୩୫.୬ ହୋଇଛି । ଏହାର ଅର୍ଥ, ଜୀବମଧାରଣ ମାନରେ ସୁଧାର ଆସିବା ପରେ ମହିଳାମାନେ ପିଲା ଜନ୍ମ ଉପରେ ବିଚାର କରୁଛନ୍ତି ।
ସେପଟେ ୨୦୨୦ରେ ଅଶିକ୍ଷିତ ମହିଳା କିଶୋରୀ ଅବସ୍ଥାରେ ପିଲା ଜନ୍ମ କରିବା ହାର ୩୩.୯ ଥିବା ବେଳେ ଶିକ୍ଷିତ ମହିଳାଙ୍କ ହାର ୧୧.୦ ଥିଲା । ସେହିଭଳି ଯେଉଁ ମହିଳାଙ୍କୁ ପଢ଼ିବା ଲେଖିବା ଜଣାଥିଲା କିନ୍ତୁ ସେମାନେ ସ୍କୁଲ ଯାଉନଥିଲେ ସେମାନଙ୍କ କ୍ଷେତ୍ରରେ ଏହି ସଂଖ୍ୟା ପ୍ରତି ୧୦୦୦ରେ ୨୦ ଥିଲା । ଅଶିକ୍ଷିତ ମହିଳାଙ୍କ ତୁଳନାରେ ଏହା ଖୁବ କମ୍ । ଏଥିରୁ ସାବ୍ୟସ୍ତ ହେଉଛି ଯେ, ମହିଳାଙ୍କ ଲାଗି ଶିକ୍ଷା କେତେ ଜରୁରି ।