ନୂଆଦିଲ୍ଲୀ,୧୧/୬:ତୃତୀୟଥର ପ୍ରଧାନମନ୍ତ୍ରୀ ହୋଇଛନ୍ତି ମୋଦି।ଏନେଇ ସେ ଶପଥ ଗ୍ରହଣ କରିସାରିଥିବା ବେଳେ ତାଙ୍କ ପ୍ରଥମ କାର୍ଯ୍ୟ ଭାବେ ‘ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି’ ଫାଇଲ୍ରେ ଗତକାଲି ଦସ୍ତଖତ କରିଛନ୍ତି। ଏଥିସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୁନ୍ ୧୮ ତାରିଖରେ ଉତ୍ତରପ୍ରଦେଶର ତାଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀରେ ଏକ ‘କୃଷକ ସମ୍ମିଳନୀ’ କୁ ସମ୍ବୋଧିତ କରିବେ ବୋଲି ଏକ ସୂଚ୍ରରୁ ଜଣାପଡିଛି।ତେବେ ରବିବାର ତୃତୀୟ ଥର ପାଇଁ ଶପଥ ନେବା ପରେ ବାରାଣାସୀରେ ଏହା ପ୍ରଧାନମନ୍ତ୍ରୀଙ୍କ ପ୍ରଥମ ଗସ୍ତ ହୋଇପାରେ।
ଏନେଇ ସ୍ଥାନୀୟ ବିଜେପି ନେତା କହିଛନ୍ତି ଯେ, ରୋହାନିଆ କିମ୍ବା ସେବାପୁରୀ ବିଧାନସଭା ନିର୍ବାଚନମଣ୍ଡଳୀରେ କୃଷକ ସମ୍ମିଳନୀ ପାଇଁ ଏକ ସ୍ଥାନ ବାଛିବା ପାଇଁ କାର୍ଯ୍ୟ ଚାଲିଛି। ସେହିପରି ପ୍ରଧାନମନ୍ତ୍ରୀ ମୋଦିଙ୍କ ବାରାଣାସୀ ଗସ୍ତକୁ ନେଇ ଗୁଲାବ ବାଗରେ ଥିବା ପାର୍ଟି କାର୍ଯ୍ୟାଳୟରେ ମହାନଗର ଓ ଜିଲ୍ଲା ଅଧିକାରୀଙ୍କ ଏକ ବୈଠକ ଅନୁଷ୍ଠିତ ହୋଇଛି। ସେପଟେ ବିଜେପି କାଶୀ ଅଞ୍ଚଳର ସଭାପତି ଦିଲୀପ ପଟେଲ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦି ମନ୍ଦିରର ସହରକୁ ଏକ ଦିନିଆ ଗସ୍ତ ସମୟରେ ଦଶ୍ବାମେଧ ଘାଟରେ ଗଙ୍ଗା ଆରତୀରେ ଅଂଶଗ୍ରହଣ କରିବେ ଏବଂ ଏଥିପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି। ଏଥିସହ ସମସ୍ତ ବିଜେପି କର୍ମୀଙ୍କୁ ପ୍ରଧାନମନ୍ତ୍ରୀ ମୋଦୀଙ୍କୁ ବାରାଣାସୀରେ ସ୍ୱାଗତ କରିବାକୁ ପ୍ରସ୍ତୁତ ହେବାକୁ କୁହାଯାଇଛି। କୃଷକ ସମ୍ମିଳନୀ ପାଇଁ ଦଳୀୟ କର୍ମୀଙ୍କୁ ଦାୟିତ୍ବ ଦେବା ପ୍ରକ୍ରିୟା ମଧ୍ୟ ଆରମ୍ଭ ହୋଇଛି।
