ପ୍ୟାରିସ୍‌,୨୩/୦୭: ଟୋକିଓ ଅଲିମ୍ପିକ୍ସ ରୌପ୍ୟ ପଦକ ବିଜୟିନୀ ଚେକ  ଗଣରାଜ୍ୟର ମର୍କେଟା ଭଣ୍ଡ୍ରୋସୋଭା ଏବଂ ପୋଲାଣ୍ଡର ହ୍ୟୁବର୍ଟ ହର୍କାଜ ଆସନ୍ତା ପ୍ୟାରିସ୍‌ ଅଲିମ୍ପିକ୍ସରୁ ଓହରି ଯାଇଛନ୍ତି । ଉଭୟ ଆହତ ଅଛନ୍ତି । ଭଣ୍ଡ୍ରୋସୋଭାଙ୍କ  ହାତରେ ଆଘାତ ଲାଗିଥିବାବେଳେ ହର୍କାଜ ଗତ ୱିମ୍ବଲଡନ୍‌ ଗ୍ରାଣ୍ଡସ୍ଲାମ୍‌ର ଦ୍ୱିତୀୟ ରାଉଣ୍ଡ୍‌ରେ ଆହତ ହୋଇଥିଲେ । ତାଙ୍କ ଆଣ୍ଠୁରେ ଆଘାତ ଲାଗିଥିଲା । 

ଭଣ୍ଡ୍ରୋସୋଭା କହିଛନ୍ତି, ମୁଁ ଦୁଃଖର ସହ ଜଣାଇବାକୁ ଚାହୁଁଛି କି ସ୍ୱାସ୍ଥ୍ୟଗତ ସମସ୍ୟା ପାଇଁ ପ୍ୟାରିସ୍‌ ଅଲିମ୍ପିକ୍ସରେ ଭାଗ ନେଇ ପାରିବିନି । ତଥାପି ଡବଲ୍ସ ଖେଳିବାକୁ ଲକ୍ଷ୍ୟ ରଖିଛି । ଶେଷ ପର୍ଯ୍ୟନ୍ତ ଅପେକ୍ଷା କରିବି । ଯଦି ହାତରେ ଯନ୍ତ୍ରଣା କମେ ଡବଲ୍ସରେ ପ୍ରତିଦ୍ୱନ୍ଦ୍ୱିତା  କରିବି ।’ ଭଣ୍ଡ୍ରୋସୋଭାଙ୍କ ସ୍ଥାନରେ ଅଲିମ୍ପିକ୍ସରେ ମହିଳା ଡବଲ୍ସ ସ୍ୱର୍ଣ୍ଣ ପଦକ  ବିଜୟିନୀ କାଟେରିନା ସିନିଆକୋଭାଙ୍କୁ  ସାମିଲ କରାଯାଇଛି । ଅନ୍ୟ ପଟରେ ମହିଳା ଡବଲ୍ସରେ କାରୋଲିନା ମୁଚୋଭା  ଓ ଲିଣ୍ଡା ନୋସ୍କୋଭା ଭାଗ ନେବେ ।  

ସୂଚନାଯୋଗ୍ୟ, ପୂର୍ବରୁ ବିଶ୍ୱର ୩ନଂ  ଖେଳାଳି ଅର୍ନ୍ୟା ସାବାଲେଙ୍କାଙ୍କ ସମେତ  ଓନ୍ସ ଜାବେଓର, ଏମା ରାଡୁକାନୁ, ବେନ  ସେଲଟନ୍‌, ପାବ୍‌ଲୋ କାରେନୋ ବୁଷ୍ଟ  ପ୍ୟାରିସ୍‌ ଅଲିମ୍ପିକ୍ସରୁ ଓହରି ଯାଇଥିଲେ ।