ପ୍ୟାରିସ, ୨୫/୦୭: ଦୀର୍ଘ ୧୦୦ ବର୍ଷ ପରେ ପ୍ୟାରିସ ନଗରୀକୁ ଫେରିଛି ଅଲିମ୍ପିକ୍ସ କ୍ରୀଡ଼ା । ଶେଷ ଥର ୧୯୨୪ରେ ଏଠାରେ କ୍ରୀଡ଼ା ଆୟୋଜିତ ହୋଇଥିଲା । ଇତିମଧ୍ୟରେ ଏକ ଶତାବ୍ଦୀ ବିତି ଯାଇଛି । ଏଥର କ୍ରୀଡ଼ାକୁ ସ୍ରଣୀୟ କରିବା ପାଇଁ ଆୟୋଜକ କିଛି ନୂଆ ପଦକ୍ଷେପ ନେଇଛନ୍ତି, ଯାହା ଅଲିମ୍ପିକ୍ସ ଇତିହାସରେ ପ୍ରଥମ ଥର ଘଟିବାକୁ ଯାଉଛି । ପୂର୍ବରୁ ଅଲିମ୍ପିକ୍ସର ଉଦ୍ଘାଟନୀ ଉତ୍ସବ ମୁଖ୍ୟ ଆଥଲେଟିକ୍ସ ଷ୍ଟାଡିୟମରେ ଆୟୋଜିତ ହୋଇ ଆସୁଥିଲା । କିନ୍ତୁ ଏଥର ଖୋଲା ଆକାଶ ତଳେ ଏବଂ ନଦୀ ଗର୍ଭରେ ଉତ୍ସବର ଆୟୋଜନ କରାଯାଉଛି । ଦର୍ଶକ ଷ୍ଟାଡିୟମ ଗ୍ୟାଲେରୀ ନୁହଁ ବରଂ ନଦୀ ବନ୍ଧରେ ବସି ଅତି ପାଖକୁ ଉତ୍ସବର ରୋମାଞ୍ଚ ନେବେ । ଆସନ୍ତା ୨୬ ତାରିଖ ସ୍ଥାନୀୟ ସମୟ ସନ୍ଧ୍ୟା ୭.୩୦ ମିନିଟରୁ ଆରମ୍ଭ ହେବ ୩୩ତମ ଅଲିମ୍ପିକ୍ସ କ୍ରୀଡ଼ାର ଉଦ୍ଘାଟନୀ ଉତ୍ସବ । ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରନ କ୍ରୀଡ଼ାକୁ ଉଦ୍ଘାଟନ କରିବେ ।
ଆୟୋଜକଙ୍କ ପକ୍ଷରୁ ଉଦ୍ଘାଟନୀ ଉତ୍ସବ ସଂପର୍କିତ ଏକ ଗ୍ରାଫିକ୍ସ ଭିଡିଓ ଜାରି କରାଯାଇଛି । ମାତ୍ର ଉତ୍ସବ ସଂପର୍କରେ ସେମିତି ବିଶେଷ ତଥ୍ୟ ଦିଆଯାଇ ନାହିଁ । ଫ୍ରାନ୍ସ ଗଣମାଧ୍ୟମର ରିପୋର୍ଟରୁ ଯାହା ଜଣା ପଡ଼ିଛି, ସେନ ନଦୀର ଅଷ୍ଟ୍ରେର୍ଲିଜ ବ୍ରିଜ୍ (ପୋଲ) ପାଖରୁ ଉତ୍ସବ ଆରମ୍ଭ ହୋଇ ଆଇଫିଲ ଟାୱାର ନିକଟରେ ଶେଷ ହେବ । ଉଭୟ ସ୍ଥାନ ମଧ୍ୟରେ ଦୂରତା ଛଅ କିଲୋ ମିଟର ରହିଛି ।
୬୦୦୦ରୁ ୭୦୦୦ କ୍ରୀଡ଼ାବିତ ଉତ୍ସବରେ ସାମିଲ ହେବେ । ୮୫ଟି ବଡ଼ ଡଙ୍ଗାରେ ପରେଡ୍ କାର୍ଯ୍ୟକ୍ରମ ଆୟୋଜିତ ହେବ ଏବଂ ୩୦୦୦ରୁ ଊଦ୍ଧ୍ୱର୍ କଳାକାର ସାଂସ୍କୃତିକ କାର୍ଯ୍ୟକ୍ରମ ପରିବେଶଣ କରିବେ । ଏକ ବିଶାଳ ଭାସମାନ ଆଥଲେଟିକ୍ ଟ୍ରାକ୍ରେ କଳାକାର ବିଭିନ୍ନ କଳା ପ୍ରଦର୍ଶନ କରିବେ ।
ନଦୀ ବନ୍ଧ ଏବଂ ନଦୀର ଉଭୟ ପାଶ୍ୱର୍ର କୋଠା ଉପରେ ବସି ଦର୍ଶକ ଉଦ୍ଘାଟନୀର ରୋମାଞ୍ଚ ନେବେ । ନଦୀ ଗର୍ଭକୁ ଲାଗି ଦର୍ଶକଙ୍କ ପାଇଁ ସ୍ୱତନ୍ତ୍ର ବସିବାର ବ୍ୟବସ୍ଥା କରାଯାଇଛି । ଯାହାର ଟିକେଟ୍ ମୂଲ୍ୟ ୨୯୦୦ ଡଲାର ରହିଛି । ଏମିତି ୬ କିଲୋ ମିଟର ମଧ୍ୟରେ ୫ ଲକ୍ଷରୁ ଊଦ୍ଧ୍ୱର୍ ଦର୍ଶକ ବସି ଉତ୍ସବ ଦେଖିବେ । ସାଂସ୍କୃତିକ କାର୍ଯ୍ୟକ୍ରମର ନିର୍ଦ୍ଦେଶନା ଦେଇଛନ୍ତି ବିଖ୍ୟାତ ନିର୍ଦ୍ଦେଶକ ଥୋମାସ ଜୋଲି। କାର୍ଯ୍ୟକ୍ରମ ୧୨ଟି ପର୍ଯ୍ୟାୟରେ ଆୟୋଜିତ ହେବ । ୩୦୦୦ ଡ୍ୟାନ୍ସର, ବିଖ୍ୟାତ କଣ୍ଠଶିଳ୍ପୀ ପର୍ଯ୍ୟୟକ୍ରମିକ ଭାବେ କାର୍ଯ୍ୟକ୍ରମରେ ସାମିଲ ହେବେ । କାର୍ଯ୍ୟକ୍ରମରେ ବିଶ୍ୱକୁ କ’ଣ ବାର୍ତ୍ତା ରହିଛି ପ୍ରଶ୍ନରେ ଜୋଲି ଏତିକି କହିଥିଲେ ‘ପ୍ରେମ’ । ପ୍ରସିଦ୍ଧ କୋରିଓଗ୍ରାଫର ମାଉଡ ଲେ ପ୍ଲାଡେକ ନୃତ୍ୟ ଶିକ୍ଷା ଦେଉଛନ୍ତି । କ୍ଲାସିକ ଠାରୁ ବ୍ରେକଡ୍ୟାନ୍ସ ପର୍ଯ୍ୟନ୍ତ ସବୁ ନୃତ୍ୟକୁ ଗୁରୁତ୍ୱ ଦିଆଯିବ । କ୍ରୀଡ଼ାକୁ ସ୍ମରଣୀୟ କରିବା ନେଇ ପ୍ରସ୍ତୁତି ଚାଲିଛି । ଫ୍ରାନ୍ସର କଳା ଓ ସଂସ୍କୃତି ମୁଖ୍ୟ ଆକର୍ଷଣ ସାଜିବ ।
ଭାଗ ନେବେ ୧୦,୭୧୪ କ୍ରୀଡ଼ାବିତ
ଏଥର ଅଲିମ୍ପିକ୍ସରେ ମୋଟ୍ ୧୦,୭୧୪ ଜଣ କ୍ରୀଡ଼ାବିତ ସାମିଲ ହେବେ । ୩୨ଟି କ୍ରୀଡ଼ାରେ ୩୨୯ଟି ଇଭେଣ୍ଟରେ ସେମାନେ ଭାଗ ନେବେ । ସେ ନେଇ କେନ୍ଦ୍ରୀୟ ପ୍ୟାରିସରେ ନିର୍ମାଣ ହୋଇଛି ସୁବିଶାଳ କ୍ରୀଡ଼ାଗ୍ରାମ । ଯେଉଁଠାରେ ୧୪୫୦୦ ଜଣଙ୍କ ରହିବାର ବ୍ୟବସ୍ଥା କରାଯାଇଛି । ସେଥିରୁ କ୍ରୀଡ଼ାବିତଙ୍କ ପାଇଁ ୯୦୦୦ ଶଯ୍ୟା ସଂରକ୍ଷିତ ରହିଛି । ପର୍ଯ୍ୟାୟକ୍ରମିକ ଭାବେ କ୍ରୀଡ଼ାବିତମାନେ କ୍ରୀଡ଼ା ଗ୍ରାମରେ ପ୍ରବେଶ କରିବେ । ଅଲିମ୍ପିକ୍ସ କ୍ରୀଡ଼ା ଶେଷ ହେବା ପରେ ଏହି କ୍ରୀଡ଼ାଗ୍ରାମ ପାରା ଅଲିମ୍ପିକ୍ସ କ୍ରୀଡ଼ା ପାଇଁ ବ୍ୟବହାର କରାଯିବ । ଏହି କ୍ରୀଡ଼ା ଅଗଷ୍ଟ ୨୮ରୁ ଆରମ୍ଭ ହୋଇ ସେପ୍ଟେମ୍ବର ୮ ତାରିଖରେ ଶେଷ ହେବ ।
୧୯୨୪ ଅଲିମ୍ପିକ୍ସ
ଶେଷ ଥର ପ୍ୟାରିସରେ ୧୯୨୪ରେ ଅଲିମ୍ପିକ୍ସ ଆୟୋଜିତ ହୋଇଥିଲା । ୪୪ଟି ଦେଶରୁ ୩,୦୮୯ ଜଣ କ୍ରୀଡ଼ାବିତ (୨,୯୫୪ ପୁରୁଷ ଓ ୧୩୫ ମହିଳା) ଭାଗ ନେଇଥିଲେ । ୧୬ଟି କ୍ରୀଡ଼ାରେ ୧୨୬ଟି ଇଭେଣ୍ଟରେ ପ୍ରତିଯୋଗିତା ହୋଇଥିଲା । କ୍ରୀଡ଼ା ଜୁଲାଇ ୫ରୁ ଆରମ୍ଭ ହୋଇ ୨୭ ତାରିଖରେ ଶେଷ ହୋଇଥିଲା । ଏହି ଅଲିମ୍ପିକ୍ସରେ ପ୍ରଥମ ଥର କ୍ରୀଡ଼ାବିତମାନଙ୍କ ରହିବା ପାଇଁ କ୍ରୀଡ଼ା ଗ୍ରାମ ନିର୍ମାଣ ହୋଇଥିଲା ।
୧୯୦୦ ଅଲିମ୍ପିକ୍ସ
ଅଲିମ୍ପିକ୍ସର ଦ୍ୱିତୀୟ ସଂସ୍କରଣ ପ୍ୟାରିସରେ (୧୯୦୦) ଆୟୋଜିତ ହୋଇଥିଲା । ୨୬ଟି ଦେଶରୁ ୧୨୨୬ କ୍ରୀଡ଼ାବିତ ଭାଗ ନେଇଥିଲେ । ୧୯ଟି କ୍ରୀଡ଼ାରେ ୯୫ଟି ଇଭେଣ୍ଟରେ ପ୍ରତିଯୋଗିତା ହୋଇଥିଲା । କ୍ରୀଡ଼ା ମେ’ ୧୪ରୁ ଆରମ୍ଭ ହୋଇଥିଲା ।
