ନୂଆଦିଲ୍ଲୀ, ୨୩/୦୭: ବହୁ ପ୍ରତୀକ୍ଷିତ ପ୍ୟାରିସ୍ ଅଲିମ୍ପିକ୍ସ ଆସନ୍ତା ୨୬ ତାରିଖରୁ ଆରମ୍ଭ ହେବ । ଏହାର ଦିନକ ପୂର୍ବରୁ ତୀରନ୍ଦାଜୀ କ୍ରୀଡ଼ାରେ ବ୍ୟକ୍ତିଗତ ରିକର୍ଭ ଇଭେଣ୍ଟର ର୍ୟାଙ୍କିଙ୍ଗ୍ ରାଉଣ୍ଡ୍ ଖେଳାଯିବ । ଏଥିରେ ୬ଜଣ (୩ପୁରୁଷ, ୩ମହିଳା) ଭାରତୀୟ ଆକ୍ସନକୁ ଓହ୍ଲାଇବେ । ପୁରୁଷରେ ଧୀରଜ ବୋମାଦେବରା, ତରୁଣଦୀପ ରାଏ, ପ୍ରବୀଣ ରମେଶ ଯାଦବ ଏବଂ ମହିଳାରେ ଦୀପିକା କୁମାରୀ, ଭଜନ କୌର, ଅଙ୍କିତା ଭକତ୍ । ସମସ୍ତ ତୀରନ୍ଦାଜ ଏବେ ଫ୍ରାନ୍ସରେ ଜୋରଦାର ପ୍ରସ୍ତୁତି ଚଳାଇଛନ୍ତି । ବ୍ୟକ୍ତିଗତ ଇଭେଣ୍ଟରେ (ପୁରୁଷ ଓ ମହିଳା) ୬୪ଜଣ ଲେଖାଏଁ ଭାଗ ନେବେ । ସେଥିମଧ୍ୟରୁ ୩୨ଜଣ ଲେଖାଏଁ ପରବର୍ତ୍ତୀ ରାଉଣ୍ଡ୍କୁ ଉନ୍ନୀତ ହେବେ । ଜୁଲାଇ ୨୮ ତାରିଖ ମହିଳା ଟିମ୍ ଇଭେଣ୍ଟ, ୨୯ ତାରିଖ ପୁରୁଷ ଟିମ୍ ଇଭେଣ୍ଟ ଅନୁଷ୍ଠିତ ହେବ ।
ବ୍ୟକ୍ତିଗତ ଓ ଟିମ୍ ଇଭେଣ୍ଟରେ ଏକ ଭାରତୀୟ ତୀରନ୍ଦାଜଙ୍କଠୁ ପଦକ ଆଶା ରହିଛି । ପୁରୁଷ ଦଳ ଚଳିତ ବର୍ଷ ବିଶ୍ୱକପ୍ ଷ୍ଟେଜ୍-୧ରେ ବିଶ୍ୱ ଚାମ୍ପିଅନ୍ ଦକ୍ଷିଣ କୋରିଆକୁ ହରାଇ ବଡ଼ ବିପର୍ଯ୍ୟୟ ଘଟାଇଥିଲା । ଅଲିମ୍ପିକ୍ସରେ ମଧ୍ୟ ଦଳ ଅନୁରୂପ ପ୍ରଦର୍ଶନ ଦେବାକୁ ପ୍ରସ୍ତୁତ ରହିଛି । ବିଶ୍ୱ ମାନ୍ୟତା ତାଲିକାରେ ଧୀରଜ ୧୨ତମ, ତରୁଣ ୩୧ତମ ସ୍ଥାନରେ ରହିଛନ୍ତି । ଧୀରଜ ପ୍ରଥମ ଥର ଏବଂ ତରୁଣଦୀପ ଚତୁର୍ଥ ଥର ଅଲିମ୍ପିକ୍ସ ଖେଳିବାକୁ ଯାଉଛନ୍ତି । ମହିଳା ଦଳରେ ଦୀପିକା ହେଉଛନ୍ତି ଭାରତର ଶ୍ରେଷ୍ଠ ମାନ୍ୟତାପ୍ରାପ୍ତ ଖେଳାଳି । ସେ ୧୨ତମ ସ୍ଥାନରେ ଥିବାବେଳେ ଅଙ୍କିତା ଭକତ ୪୦ତମ ଏବଂ ଭଜନ ୪୫ତମ ସ୍ଥାନରେ ରହିଛନ୍ତି । ଦୀପିକା ଚଳିତ ବର୍ଷ ବିଶ୍ୱକପ୍ ଷ୍ଟେଜ୍-୧ର ବ୍ୟକ୍ତିଗତ ଇଭେଣ୍ଟରେ ରୌପ୍ୟ ପଦକ ହାସଲ କରିଥିଲେ । ଏଥର ସେ ଅଲିମ୍ପିକ୍ସ ପଦକ ପ୍ରତୀକ୍ଷାର ଅନ୍ତ ଘଟାଇବାକୁ ଲକ୍ଷ୍ୟ ରଖିଛନ୍ତି ।