ନୂଆଦିଲ୍ଲୀ,୨୭/୦୭: ବିଶ୍ୱରେ ଆୟ ଅସମାନତା ଦିନକୁ ଦିନ ଅଧିକ ଓସାରିଆ ହୋଇଚାଲିଛି । ଧନୀ ଆହୁରି ଧନୀ ହେଉଥିବାବେଳେ ଗରିବ ତଳକୁ ତଳକୁ ଖସୁଛି । ଏଭଳି ସ୍ଥିତିରେ ଆଉ ଏକ ରିପୋର୍ଟ ଆୟ ଅସମାନତାର ଅତି ବିକୃତ ଛବି ଦେଖାଇଛି । ଅକ୍ସଫାମ୍ ପକ୍ଷରୁ ଜାରି ସଦ୍ୟ ରିପୋର୍ଟ ଅନୁସାରେ, ଗତ ୧୦ ବର୍ଷରେ ବିଶ୍ୱର ୧% ଅତିଧନୀ ମିଳିତ ଭାବେ ୪୨ ଟ୍ରିଲିୟନ ଡଲାର ସମ୍ପତ୍ତି ଯୋଡ଼ିଛନ୍ତି । ଯାହାକି ବିଶ୍ୱର ୫୦% ଅତି ଗରିବଙ୍କ ମୋଟ ସମ୍ପତ୍ତିର ୩୪ ଗୁଣା । ବ୍ରାଜିଲରେ ହେବାକୁ ଥିବା ଜି-୨୦ ବୈଠକ ପୂର୍ବରୁ ଅକ୍ସଫାମ୍ ପକ୍ଷରୁ ଏ ରିପୋର୍ଟ ଜାରି ହୋଇଛି ।
ତେବେ ଉପରୋକ୍ତ ୧% ଧନୀଙ୍କ ମଧ୍ୟରେ ବ୍ୟକ୍ତି ପିଛା ହାରାହାରି ସମ୍ପତ୍ତି ଗତ ଦଶନ୍ଧିରେ ପ୍ରାୟ ୪୦୦,୦୦୦ ଡଲାର ବୃଦ୍ଧି ପାଇଛି । ଅନ୍ୟପକ୍ଷରେ, ନିମ୍ନ ସ୍ତରରେ ଥିବା ଅଧା ଜନସଂଖ୍ୟାକୁ ଯଦି ହିସାବକୁ ନିଆଯାଏ ଏଠାରେ ବ୍ୟକ୍ତି ପିଛା ସମ୍ପତ୍ତି ଗତ ୧୦ ବର୍ଷରେ ମାତ୍ର ହାରାହାରି ୩୩୫ ଡଲାର ବଢ଼ିଛି ।
ରିପୋର୍ଟ ଅନୁସାରେ, ଏତେ ସମ୍ପତ୍ତି ଯୋଡ଼ିବା ସତ୍ତେ୍ୱ ଅରବପତିମାନେ ନିଜ ସମ୍ପତ୍ତିର ମାତ୍ର ୦.୫%ରୁ କମ୍ ଟିକସ ଆକାରରେ ପ୍ରଦାନ କରିଛନ୍ତି । ଜି-୨୦ ଅର୍ଥମନ୍ତ୍ରୀମାନେ ବ୍ରାଜିଲ୍ର ରିଓ ଡି ଜାନେଇରୋଠାରେ ଭେଟିବାକୁ ଯାଉଥିବାବେଳେ ଉକ୍ତ ବୈଠକରେ ଅତି ଧନୀଙ୍କ ଉପରେ ଟିକସ ବଢ଼ାଇବା ଲାଗି ଏକ ବିଶ୍ୱସ୍ତରୀୟ ଚୁକ୍ତି ସ୍ୱାକ୍ଷର ହେବାର ସମ୍ଭାବନା ରହିଛି । ଆୟ ଅସମାନତାକୁ ନେଇ ଜି-୨୦ ନେତୃବୃନ୍ଦ ଚିନ୍ତା ପ୍ରକଟ କରିଆସୁଛନ୍ତି ।
ଏଭଳି ସ୍ଥିତିରେ ଆଗକୁ ଏହା ଉପରେ ଏକ ସ୍ୱତନ୍ତ୍ର ନିଷ୍କର୍ଶ ବାହାରିପାରେ ବୋଲି ଅନୁମାନ ରହିଛି । ଅତିଧନୀଙ୍କ ଉପରେ ଟିକସ ବଢ଼ାଇବାକୁ ବ୍ରାଜିଲ, ଦକ୍ଷିଣ ଆଫ୍ରିକା, ସ୍ପେନ୍ ଏବଂ ଫ୍ରାନ୍ସ ଭଳି ରାଷ୍ଟ୍ର ସମର୍ଥନ କରିଆସୁଛନ୍ତି । ଆୟ ଅସମାନତାର ସ୍ତରକୁ କମାଇବା ସହ ଧନୀମାନେ ସେମାନଙ୍କ ସମ୍ପତ୍ତିର ଯୁକ୍ତିଯୁକ୍ତ ଭାଗ ଟିକସ ଆକାରରେ ପ୍ରଦାନ କରିବା ଦରକାର ବୋଲି ମତ ପ୍ରକାଶ ପାଇଛି । ଆୟ ଅସମାନତା ବର୍ତ୍ତମାନ ଚରମ ସ୍ତରରେ ପହଞ୍ଚିଛି । ଏହାର ବିପରୀତ ପ୍ରଭାବରୁ ଲୋକମାନଙ୍କୁ ତଥା ପୃଥିବୀକୁ ସୁରକ୍ଷା ଦେବାରେ ଏଯାବତ୍ ରାଷ୍ଟ୍ରଗୁଡ଼ିକ ବିଫଳ ହୋଇଥିବା ଅକ୍ସଫାମ୍ ଇଣ୍ଟର୍ନ୍ୟାସ୍ନାଲ୍ସର ମୁଖ୍ୟ(ଅସମାନତା ନୀତି) ମାକ୍ସ ଲସନ୍ ପ୍ରକାଶ କରିଛନ୍ତି । ବିଶ୍ୱର ୧% ଅତିଧନୀ ପକେଟ୍ ଭର୍ତ୍ତି କରିବାରେ ଲାଗିଥିବାବେଳେ ନିମ୍ନ ବର୍ଗ ଗରିବ ହୋଇଚାଲିଛନ୍ତି ।
ରିପୋର୍ଟ ଅନୁସାରେ, ଗତ ୪ ଦଶନ୍ଧିରେ ଜି-୨୦ ରାଷ୍ଟ୍ରଗୁଡ଼ିକରେ ଶ୍ରେଷ୍ଠ ୧% ଧନୀଙ୍କ ଆୟ ଭାଗ ୪୫% ବୃଦ୍ଧି ପାଇଛି । ସେମାନଙ୍କ ଆୟ ଉପରେ ଟିକସ ମାତ୍ରାରେ ଏକ ତୃତୀୟାଂଶ ହ୍ରାସ କରାଯାଇଛି । ଅରବପତିଙ୍କ ଅତିରିକ୍ତ ସମ୍ପତ୍ତିକୁ ହ୍ରାସ କରିବା ପାଇଁ ସେମାନଙ୍କ ଉପରେ ବାର୍ଷିକ ଅନ୍ୟୁନ ୮%ର ଏକ ନେଟ୍ ସମ୍ପତ୍ତି ଟିକସ ଲଗାଇବା ଉଚିତ ବୋଲି ଅକ୍ସଫାମ୍ ପରାମର୍ଶ ଦେଇଛି । ପ୍ରକାଶଯୋଗ୍ୟ, ବିଶ୍ୱର ମୋଟ ଅରବପତିଙ୍କ ମଧ୍ୟରେ ପ୍ରାୟ ୮୦% ଜି-୨୦ ରାଷ୍ଟ୍ରଗୁଡ଼ିକରେ ରହୁଛନ୍ତି ।