ଭୁବନେଶ୍ୱର,୦୭/୦୬: ଫ୍ରାଇଡେ ରିଲିଜ୍ ଅବସରରେ ପ୍ରେକ୍ଷାଳୟକୁ ଆସୁଛି ନୂଆ ଓଡ଼ିଆ ସିନେମା ‘ଟିକେ ଟିକେ ଅଚିହ୍ନା ତୁ’। ରାଜ୍ୟର ୩୪ଟି ହଲ୍ରେ ଏହା ରିଲିଜ୍ ହେଉଥିବାବେଳେ ସନ୍ଧ୍ୟା ୭ଟାରେ ଭୁବନେଶ୍ୱରର ଏକ ପ୍ରେକ୍ଷାଳୟରେ କଳାକାରଙ୍କ ସହ ପ୍ରିମିୟର ଅନୁଷ୍ଠିତ ହେବ । ଆମର ଷ୍ଟୁଡିଓଜ୍ ଏବଂ ଡିକେ ମୁଭିଜ୍ ବ୍ୟାନରରେ ପ୍ରସ୍ତୁତ ହୋଇଥିବା ଏହି ସିନେମାରେ ପୁଣି ଥରେ ଏକାଠି ହୋଇଛନ୍ତି ଓଲିଉଡ୍ର ଚର୍ଚ୍ଚିତ ପୁରୁଣା ଯୋଡ଼ି ସ୍ୱରାଜ-ଭୂମିକା । ‘ତୁ ମୋ ଲଭ୍ଷ୍ଟୋରୀ’ ଓ ‘ତୁ ମୋ ଲଭ୍ଷ୍ଟୋରୀ-୨’ ମ୍ୟୁଜିକାଲ୍ ହିଟ୍ ହୋଇଥିଲାବେଳେ ଏହି ସିନେମା ସେହିପରି ସଫଳତା ଆଣିଦେବ ବୋଲି ଦୁହିଁଙ୍କ ସହ ପୂରା ୟୁନିଟ୍ ଆଶାବାଦୀ ରହିଛି । କିନ୍ତୁ ଦର୍ଶକ ଓ ସମର୍ଥକ କେତେ ଭଲପାଇବା ଦେଉଛନ୍ତି ତାହା ରିଲିଜ୍ ପରେ ଜଣାପଡ଼ିବ ।
ନବୀନ ଭଣ୍ଡାରି ଓ ଦୀପକ ମିଶ୍ରଙ୍କ ପ୍ରଯୋଜିତ ଏହି ଚଳଚ୍ଚିତ୍ରରେ ସ୍ୱରାଜ, ଭୂମିକାଙ୍କ ସହ ଶୁଭମ୍ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି । ତାପସ ସରଘରିଆ ନିର୍ଦ୍ଦେଶନା ଦେଇଥିବାବେଳେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ପ୍ରେମ୍ ଆନନ୍ଦ । ଭରଦ୍ୱାଜ ପଣ୍ଡା କାହାଣୀ, ସଂଳାପ ଓ ଚିତ୍ରନାଟ୍ୟ ଲେଖିଛନ୍ତି । ଏଥିରେ ବି ଗୀତକୁ ନେଇ ବହୁତ କିଛି ପରୀକ୍ଷା ନିରୀକ୍ଷା କରିଛନ୍ତି ପ୍ରେମ୍ ଆନନ୍ଦ । ତେଣୁ ଆଶା, ଗୀତକୁ ନେଇ ଏହି ସିନେମା ଆଗକୁ ମୁକ୍ତିଲାଭ ଅପେକ୍ଷାରେ ଥିବା ୩ ଓଡ଼ିଆ ସିନେମା ‘ପାବାର୍’, ‘କୁହୁଡ଼ି’ ଓ ‘ଚନ୍ଦ୍ରବଂଶୀ’ ସହ ରଜ ବଜାରରେ ଲଢ଼େଇ କରିବ । ସିନେମାର ଡିଓପିରେ ସୁବ୍ରତ ଖଟେଇ, ଏଡିଟିଂ ରାଜେଶ ଦାଶ, କୋରିଓଗ୍ରାଫିରେ ଗିରିଶ ମହାନ୍ତି ଓ ଅମିତ ନାୟକ ପ୍ରମୁଖ ଭାର ସମ୍ଭାଳିଛନ୍ତି ।
ଚଳିତ ରଜ ବଜାରରେ ଏହା ପ୍ରଥମ ସିନେମା ହୋଇଥିବାବେଳେ ଏଥର ସ୍ୱରାଜ-ଭୂମିକା ଯୋଡ଼ି ଓପନିଂ କରିଛନ୍ତି । ଏହାଛଡ଼ା ବକ୍ସ ଅଫିସ୍ରେ ବଲିଉଡ ସିନେମା ‘ହମାରେ ବାରହ’, ‘ମହ୍ଲାର’, ‘ବଜରଙ୍ଗ ଔର ଅଲ୍ଲୀ’, ‘ମୁଞ୍ଜ୍ୟା’, ‘ଫୁଲି’ ମୁକ୍ତିଲାଭ କରୁଛି ।
