କଟକ,୧୯/୧୨: କଟକର ସ୍ୱତନ୍ତ୍ର ଖଣ୍ଡୁଆ ପାଟ କହି ଡୁପ୍ଲିକେଟ୍ ବା ନକଲି ଶାଢ଼ି ବିକିବା ବାଟ ଏକପ୍ରକାର ବନ୍ଦ ହେଲା । ଏଣିକି ଖଣ୍ଡୁଆ ଶାଢ଼ି ପ୍ୟାକେଟ୍ ଉପରେ ରହିଥିବା କ୍ୟୁଆର୍ ସ୍କାନ୍ କୋଡ୍ କଲେ ଜଣାପଡ଼ିଯିବ ଏହା ଅସଲି ନା ନକଲି । ସେହିପରି ଶାଢ଼ି ପ୍ୟାକେଟ୍ର ଉପରେ ସ୍ୱତନ୍ତ୍ର ହ୍ୟାଣ୍ଡ୍ଲୁମ୍ ମାର୍କ ବି ରହିବ । ଗ୍ରାହକଙ୍କୁ ସନ୍ତୁଷ୍ଟ କରିବା ସହ କଟକ ବ୍ରାଣ୍ଡ୍ ଖଣ୍ଡୁଆର ନକଲି ଶାଢ଼ି ବଜାରକୁ ଟାର୍ଗେଟ୍ କରି ଏଭଳି ପଦକ୍ଷେପ ନେଇଛି ପ୍ରଶାସନ । ପ୍ରଥମେ ସରକାରୀ ଆଉଟ୍ଲେଟ୍ରେ ଏହି ବ୍ୟବସ୍ଥା ଲାଗୁ କରାଯିବ । ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ ଉନ୍ନତମାନର ହସ୍ତତନ୍ତ ଶାଢ଼ି ପ୍ୟାକେଜିଂ ବକ୍ସର ଉନ୍ମୋଚନ କରିଛନ୍ତି ।
କଟକ ବଡ଼ମ୍ବା ବ୍ଲକ୍ର ଖଣ୍ଡୁଆ ପାଟର ବିଶ୍ୱ ବ୍ୟାପୀ ଖ୍ୟାତି ରହିଛି । ଜଗନ୍ନାଥ ସଂସ୍କୃତି ଠାରୁ ଆରମ୍ଭ କରି ମାହାରୀ ଓ ଓଡ଼ିଶୀ ନୃତ୍ୟରେ ଏହାର ବହୁଳ ବ୍ୟବହାର ହୋଇଥାଏ । ଓଡ଼ିଆଙ୍କ ଆରାଧ୍ୟ ଦେବତା ପ୍ରଭୁ ଶ୍ରୀଜଗନ୍ନାଥଙ୍କ ପ୍ରିୟ ପାଟବସ୍ତ୍ର ଭାବେ ସ୍ୱତନ୍ତ୍ର ପରିଚୟ ହାସଲ କରିଥିବା କଟକର ଖଣ୍ଡୁଆ ଭାରତୀୟ ହସ୍ତତନ୍ତ କଳାର ଏକ ପ୍ରମୁଖ ଅଙ୍ଗ । ବର୍ଷ ବର୍ଷ ଧରି ବଂଶାନୁକ୍ରମେ କଟକ ବନମ୍ବା ବ୍ଲକ୍ର ଶହ ଶହ ପରିବାର ଖଣ୍ଡୁଆ ପାଟ ତିଆରି କରିଆସୁଛନ୍ତି । ଅନ୍ଲାଇନ୍ ମାର୍କେଟ୍ରେ ବି ଖଣ୍ଡୁଆର ଏକ ବୃହତ ବଜାର ରହିଛି, ଯେଉଁଥିରେ ବିଭିନ୍ନ ଦେଶରୁ ବହୁମାତ୍ରାରେ ଖଣ୍ଡୁଆ ବରାଦ ଆସିଥାଏ ।
ତେବେ ଖଣ୍ଡୁଆ ପାଟର ବଜାର ଚାହିଦାକୁ ଦୃଷ୍ଟିରେ ରଖି ଗତ କିଛି ବର୍ଷ ଧରି ନକଲି ଖଣ୍ଡୁଆ ମାର୍କେଟରେ ହାଉଯାଉ ହେଉଛି । ଫଳରେ ଅନେକ ସମୟରେ ଅସଲି ଖଣ୍ଡୁଆର ମୂଲ୍ୟ ଦେଇ ଗ୍ରାହକ ନକଲି କିଣି ଠକାମୀର ଶିକାର ହେଉଛନ୍ତି । କିନ୍ତୁ ଏବେ ଅନ୍ତତଃପକ୍ଷେ ମାନ ଯାଞ୍ଚ୍ କରିବାର ସୁଯୋଗ ସୃଷ୍ଟି ହେଲା ବୋଲି କୁହାଯାଇପାରେ । ଖଣ୍ଡୁଆ ପାଟର ପ୍ୟାକେଜିଂ ବକ୍ସ ଉପରେ ବ୍ୟବହାର କରାଯିବ କ୍ୟୁଆର୍ ସ୍କାନ୍ କୋଡ୍ । ଏହାକୁ ସ୍କାନ୍ କଲେ ଗ୍ରାହକ ମାନେ ଖଣ୍ଡୁଆ ସମ୍ପର୍କରେ ବିସ୍ତୃତ ସୂଚନା ପାଇପାରିବେ । ଅର୍ଥାତ୍ ଏ ଖଣ୍ଡୁଆ କେଉଁ ସୋସାଇଟିରୁ ତିଆରି ହୋଇଛି, ଏହାର ବୁଣାକାର କିଏ, କେଉଁ ମାନର ସୂତା ବ୍ୟବହାର କରାଯାଇଛି, ରଙ୍ଗ କ’ଣ ଆଦି ବିଭିନ୍ନ ତଥ୍ୟ ମିଳିପାରିବ । ସେହିପରି ପ୍ୟାକେଜିଂ ବକ୍ସ ଉପରେ ଖଣ୍ଡୁଆ ଉପରେ ବିସ୍ତୃତ ସୂଚନା ରହିବ, ଯାହାକୁ ୱିଣ୍ଡୋ ବକ୍ସ ବୋଲି କୁହାଯିବ । ଏହି ବକ୍ସରେ ଖଣ୍ଡୁଆର ଇତିହାସ ସମ୍ପର୍କରେ ବିସ୍ତୃତ ସୂଚନା ମିଳିପାରିବ ।
ଗ୍ରାମାଂଚଳର ଉତ୍ପାଦକ ଗୋଷ୍ଠୀ କିପରି ସେମାନଙ୍କ ଉତ୍ପାଦର ବିକାଶ, ଏହାର ବିବିଧକରଣ ତଥା ଖୁଚୁରା ବିକ୍ରୟ ବ୍ୟବସ୍ଥାରେ ବ୍ରାଣ୍ଡର ଉନ୍ନତିକରଣ କରିପାରିବେ ସେ ନେଇ ଏଭଳି ଅତ୍ୟାଧୁନିକ ସୁବିଧା ସୃଷ୍ଟି କରାଯାଇଥିବା ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ ପ୍ରକାଶ କରିଛନ୍ତି । ଏହି ପ୍ୟାକେଜିଂ ବକ୍ସ ଏବେ ସରକାରୀ ଆଉଟ୍ଲେଟ୍ରେ ବ୍ୟବହାର କରାଯିବ । ପରେ ଏହାକୁ ବିଭିନ୍ନ ବ୍ୟବସାୟିକ ଅନୁଷ୍ଠାନକୁ ପରିବ୍ୟାପ୍ତ କରିବାକୁ ପ୍ରଶାସନ ତରଫରୁ ଗୁରୁତ୍ୱ ଦିଆଯାଇଛି । ଖଣ୍ଡୁଆ ପାଟର ପ୍ୟାକେଜିଂ ବକ୍ସ କରିବାରେ ଓରମାସ୍ ପ୍ରମୁଖ ଭୂମିକା ଗ୍ରହଣ କରିଛି । ଉତ୍ପାଦକ ଗୋଷ୍ଠୀମାନଙ୍କୁ ସହାୟତା କରିବା ସହ ଖଣ୍ଡୁଆ ପ୍ରତି ରହିଥିବା ଗ୍ରାହକଙ୍କ ବିଶ୍ୱାସ ଜିତିବାକୁ ଏଭଳି ପଦକ୍ଷେପ ଗ୍ରହଣ କରାଯାଇଥିବା ଓରମାସ୍ର ଯୁଗ୍ମ ନିର୍ବାହୀ ଅଧିକାରୀ ବିପିନ ରାଉତ ପ୍ରକାଶ କରିଛନ୍ତି ।
