ଭୁବନେଶ୍ୱର,୨୮/୧୨ : ଆଉ ଦିନ କେଇଟା ପରେ ବିଦାୟ ନେବ ୨୦୨୪ ବର୍ଷ । ଧୁମ୍ଧାମରେ ପାଳନ ହେବ ନୂତନ ବର୍ଷର ପ୍ରଥମ ମୁହୂର୍ତ୍ତ । ଏଥିପାଇଁ ଆରମ୍ଭ ହେଲାଣି ପ୍ରସ୍ତୁତି । ଭୁବନେଶ୍ୱରବାସୀ ଜିରୋ ନାଇଟ୍ ସେଲିବ୍ରେସନ କରିବା ପାଇଁ ଠିକ୍ କରିସାରିଲେଣି ସ୍ଥାନ । ୨୦୨୪କୁ ବିଦାୟ ଦେଇ ୨୦୨୫କୁ ସ୍ୱାଗତ କରିବେ । ରାତି ସାରା ଚାଲିବ ପୁରୁଣା ବର୍ଷର ବିଦାୟ ପାର୍ଟି । ୧୨ଟା ବାଜିବା ମାତ୍ରେ ସେଲିବ୍ରେସନ୍ ପୂରା ଦମ୍ରେ ରହିବ । ନୂଆବର୍ଷରେ ସକାଳର ପହିଲି କିରଣକୁ ଅପେକ୍ଷା କରିବେ । ଶେଷ ବର୍ଷର ଶେଷ ରାତିକୁ ବିଦାୟ ଦେବା ଲାଗି ନାଚିବେ, ଗାଇବେ ଏବଂ ମସ୍ତି କରିବେ । ଏଥିପାଇଁ ଭୁବନେଶ୍ୱରର ବିଭିନ୍ନ ତାରକା ହୋଟେଲ ନିଜର ମେନୁ କାର୍ଡ ପ୍ରସ୍ତୁତ କରି ସାରିଛନ୍ତି । ଡିଜେ ଲାଇଟ୍ରେ କେଉଁଠି ଆର୍ଜେ ଲୋକଙ୍କ ନଚାଇବେ ତ ଆଉ କେଉଁଠି ଅଭିନେତା, ଅଭିନେତ୍ରୀଙ୍କ ଅଭିନୟ ସହିତ କଣ୍ଠଶିଳ୍ପୀଙ୍କ ସଙ୍ଗୀତରେ ଯୁବପିଢ଼ିଙ୍କ ଠାରୁ ବୟସ୍କଙ୍କ ପର୍ଯ୍ୟନ୍ତ ମତୁଆଲା ହେବେ ।
ସ୍ୱସ୍ତିର ଜିରୋ ନାଇଟ୍ରେ ଫାୟାର କ୍ରାକର୍ ସାଙ୍ଗକୁ ଥ୍ରିଲିଙ୍ଗ ନାଇଟ୍
ଶେଷ ରାତିରେ ଠିକ୍ ୮ଟା ବେଳକୁ ହୋଟେଲ୍ ସ୍ୱସ୍ତି ପ୍ରିମିୟମ୍ ଚାଣକ୍ୟ ହଲ୍ରେ ଆରମ୍ଭ ହୋଇଯିବ ରଙ୍ଗାରଙ୍ଗ କାର୍ଯ୍ୟକ୍ରମ । ପୁରୁଣା ବର୍ଷର ଶେଷ ରାତିକୁ ସ୍ମରଣୀୟ କରିବା ଲାଗି ଡ୍ୟାନ୍ସ ଡ୍ରପ୍ ସାଙ୍ଗକୁ ଲାଇଭ୍ ଡିଜେ ଆକର୍ଷଣ ସାଜିବ । ତା’ସହିତ ରହିଛି ଅନ୍ଲିମିଟେଡ୍ ସ୍ନାକ୍ସ, ଗାଲା ଡିନର୍ ସାଙ୍ଗକୁ ମକ୍ଟେଲ ରାତିକୁ ମଜାଦାର୍ କରିବ । ଥ୍ରିଲିଙ୍ଗ ନାଇଟ୍ ସାଙ୍ଗକୁ ଫାୟାର କ୍ରାକର ଏବଂ ଆକର୍ଷଣୀୟ ଉପହାରର ମଜା ନେବେ ଲୋକ । ଏହି ରଙ୍ଗାରଙ୍ଗ କାର୍ଯ୍ୟକ୍ରମରେ ଯୋଗଦେବା ଲାଗି ଦମ୍ପତିଙ୍କ ପାଇଁ ୧୦ହଜାର ଟଙ୍କା ପ୍ରବେଶ ଶୁକ୍ଳ ଥିବା ବେଳେ ସିଙ୍ଗଲ ମାନଙ୍କୁ ୭ହଜାର ଏବଂ ୬ରୁ ୧୨ବର୍ଷର ପିଲାଙ୍କୁ ୪ହଜାର ଟଙ୍କା ଦେବାକୁ ପଡ଼ିବ ।
ଆପାର୍ଟମେଣ୍ଟ, ଘର ଛାତ ଉପରେ ଚାଲିବ ଆୟୋଜନ
କେବଳ ବଡ଼ ବଡ଼ ତାରକା ହୋଟେଲରେ ପୁରୁଣା ବର୍ଷକୁ ବିଦାୟ ଦେବା ଲାଗି ଉତ୍ସବ ପାଳନ କରାଯିବ ତାହା ନୁହେଁ, ସହରରେ ଥିବା ବିଭିନ୍ନ ଆପାର୍ଟମେଣ୍ଟରେ ମଧ୍ୟ ଭୋଜିଭାତ ସାଙ୍ଗକୁ ନାଚଗୀତର ଆସର ଜମିବ । ସାଙ୍ଗସାଥୀମାନେ ମଧ୍ୟ ହଷ୍ଟେଲ ଏବଂ ଘରମାନଙ୍କରେ ଭୋଜିଭାତ କରି ଜିରୋ ନାଇଟ୍କୁ ସ୍ମରଣୀୟ କରିବେ ।
ପୁଷ୍ପକରେ ରୋମାଣ୍ଟିକ୍ ସାଗା
ଜିରୋ ନାଇଟ୍ ସେଲିବ୍ରେସନ ପାଇଁ ହୋଟେଲ ପୁଷ୍ପକରେ ସବୁ ପ୍ରକାର ପ୍ରସ୍ତୁତି ଶେଷ ପର୍ଯ୍ୟାୟରେ । ଯେଉଁଥିରେ ରୋମାଣ୍ଟିକ୍ ସାଗା କାର୍ଯ୍ୟକ୍ରମରେ ସିଙ୍ଗର୍ ସୁଦୀପ୍ ସିଲ୍ପି ଏବଂ ଶ୍ରୀ ରଙ୍ଗ ଭରିବେ । ତା’ସହିତ ଲାଇଭ୍ ମ୍ୟୁଜିକ୍ ଏବଂ ବିଟ୍ସ ଡିଜେ ନାଇଟ୍, ଅନ୍ଲିମିଟେଡ୍ କକ୍ଟେଲ ସହ ବିଭିନ୍ନ ପ୍ରକାର କାର୍ଯ୍ୟକ୍ରମ ଶେଷ ରାତିକୁ ରଙ୍ଗୀନ କରିବ । ଦମ୍ପତିଙ୍କ ପାଇଁ ୪୯୯୯ଟଙ୍କାର ପ୍ରବେଶ ଶୁକ୍ଳ ରହିଛି ।
ବିଭିନ୍ନ ତାରକା ହୋଟେଲରେ ଜିରୋ ନାଇଟ୍ ପାଳନ
ଭିଭାନ୍ତରେ ନୂଆବର୍ଷର ପୂର୍ବ ରାତିରେ ବଡ଼ ଡ୍ୟାନ୍ସ ଫ୍ଲୋରରେ ନୃତ୍ୟ କରିବାର ସୁଯୋଗ ମିଳିବା ସହ ଅନ୍ ଲିମିଟେଡ୍ ଖାଦ୍ୟ ଓ ପାନୀୟର ବ୍ୟବସ୍ଥା ରହିଛି । ବଲିଉଡ୍ ନାଇଟ୍ର ମଜା ନେବେ ଦର୍ଶକ । ଏଥିରେ ପ୍ରବେଶ ଶୁକ୍ଳ ୩ ହଜାର ଟଙ୍କାରୁ ଆରମ୍ଭ । ସେହିପରି ୱାଣ୍ଡର ୱାଲର୍ଡ ୱାଟର ପାର୍କରେ ୭ଟାରୁ ଆରମ୍ଭ ହେବ ଜିରୋ ନାଇଟ୍ ସେଲିବ୍ରେସନ୍ । ଏଠାରେ ଏଣ୍ଟ୍ରି ଫି ୨୪୯୯ରୁ ଆରମ୍ଭ । ବଲିଉଡ୍ ରକ୍, ଓଡ଼ିଆ, ହିନ୍ଦୀ ସଙ୍ଗୀତରେ ଝୁମିବେ ଲୋକେ ।
