ପୁରୀ, ୩୦/୧୨ : ନୂଆବର୍ଷ ପାଇଁ ପୁରୀରେ ଲକ୍ଷାଧିକ ଭକ୍ତଙ୍କ ସମାଗମ ଆକଳନ କରାଯାଇଛି । ଏଥିପାଇଁ ଶ୍ରୀମନ୍ଦିର ପ୍ରଶାସନ ଓ ପୁଲିସ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ହୋଇଛି । ଶ୍ରୀମନ୍ଦିରରେ ପ୍ରବେଶ ଓ ପ୍ରସ୍ଥାନ ନେଇ କଟକଣା ଜାରି ହୋଇଛି । ଡିସେମ୍ବର ୩୧ ଏବଂ ଜାନୁଆରୀ ୧ ତାରିଖରେ ଭକ୍ତମାନେ କେବଳ ସିଂହଦ୍ୱାର ଦେଇ ଶ୍ରୀମନ୍ଦିର ମଧ୍ୟକୁ ପ୍ରବେଶ କରିପାରିବେ । ଅନ୍ୟ ୩ ଦ୍ୱାର ଦେଇ ପ୍ରସ୍ଥାନ କରିବେ । ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ବୋଲି ପୁରୀ ପୁଲିସ ସୂଚନା ଦେଇଛି । ଭକ୍ତଙ୍କ ସୁରକ୍ଷାକୁ ଦୃଷ୍ଟିରେ ରଖି ଶ୍ରୀମନ୍ଦିର ପରିସରକୁ ଦୁଇ ଭାଗରେ ବିଭକ୍ତ କରାଯାଇଛି । ଶ୍ରୀମନ୍ଦିର ଭିତର ପାର୍ଶ୍ୱ ଓ ବାହାର ପାର୍ଶ୍ୱ ସୁରକ୍ଷା ପାଇଁ ସ୍ୱତନ୍ତ୍ର ବ୍ୟବସ୍ଥା ହୋଇଛି । ଭିତର ପାର୍ଶ୍ୱ ୫ଟି ଜୋନ୍ରେ ଏବଂ ବାହାର ପାର୍ଶ୍ୱରେ ୪ଟି ଜୋନ୍ରେ ପୁଲିସ ନିୟୋଜିତ ରହିବେ ।
ମାର୍କେଟ ଛକଠାରୁ ଶ୍ରୀମନ୍ଦିର ପର୍ଯ୍ୟନ୍ତ ସ୍ୱତନ୍ତ୍ର ବ୍ୟାରିକେଡ୍ ବ୍ୟବସ୍ଥା କରାଯାଇଛି । ମେଡିକାଲ ଛକରୁ ଶ୍ରୀମନ୍ଦିର ନୋ ଭେହିକିଲ୍ ଜୋନ୍ । ଏହାସହ ସହରର ସମସ୍ତ ପ୍ରବେଶ ପଥରେ ପୁଲିସ ପକ୍ଷରୁ ଯାଞ୍ଚ କଡ଼ାକଡ଼ି କରାଯିବ ବୋଲି ସେ ସୂଚନା ଦେଇଛନ୍ତି । ଡିସେମ୍ବର ୩୧ ତାରିଖ, ଇଂରାଜୀ ନୂଆ ବର୍ଷର ଦିନ ପ୍ରବଳ ଭିଡ଼ ଅନୁମାନ କରାଯାଇଛି । ଏହି ୨ ଦିନ ଟ୍ରାଫିକ୍ କଟକଣା ଜାରି କରାଯାଇଛି । ସେହିପରି ମେଡିକାଲ ଛକଠୁ ସୁଭାଷ ବୋଷ ଛକ ଏବଂ ସୁଭାଷ ବୋଷ ଛକଠୁ ଲାଇଟ୍ହାଉସ୍ ପର୍ଯ୍ୟନ୍ତ ବେଳାଭୂମି ମାର୍ଗ ଅଞ୍ଚଳରେ ସମ୍ପୂର୍ଣ୍ଣ ଚାରିଚକିଆ ଯାନ ଚଳାଚଳା ନିଷେଧ କରାଯାଇଛି । କେବଳ ଯେଉଁ ପର୍ଯ୍ୟଟକମାନେ ହୋଟେଲ ବୁକିଂ ସ୍ଳିପ୍ ଦେଖାଇବେ ସେମାନଙ୍କ ଗାଡ଼ିକୁ ହୋଟେଲ ପର୍ଯ୍ୟନ୍ତ ଯିବାକୁ ଅନୁମତି ଦିଆଯିବ ।
ଭୁବନେଶ୍ୱରରୁ ଆସୁଥିବା ଚାରିଚକିଆ ଯାନଗୁଡ଼ିକ ବାଟଗାଁ, ଚାରିନଳା, ଅଠରନଳା ଓ କୁମ୍ଭାରପଡ଼ା ଥାନାଛକ ଦେଇ ଜେଲ୍ରୋଡ ପାର୍କିଂ ବା ମେଡିକାଲ ଛକରୁ ବାମପାର୍ଶ୍ୱରେ ଆସି ବଡ଼ଶଙ୍ଖ ଓ ଶରଧାବାଲିରେ ପାର୍କିଂ କରିବେ । କୋଣାର୍କରୁ ଆସୁଥିବା ଚାରିଚକିଆ ଯାନଗୁଡ଼ିକ ତାଳବଣିଆ ପାର୍କିଂରେ ପାର୍କିଂ କରିବେ । ଦୁଇଚକିଆ ଗାଡ଼ିଗୁଡ଼ିକ ମ୍ୟୁନିସିପାଲଟି ମାର୍କେଟ କମ୍ପେ୍ଲକ୍ସରେ ପାର୍କିଂ କରିବେ । ସେଠାରେ ଜାଗା ନ ହେଲେ ମାର୍କେଟଛକଠୁ ମେଡିକାଲ ଛକ ପର୍ଯ୍ୟନ୍ତ ଗ୍ରାଣ୍ଡରୋଡରେ ପାର୍କିଂ କରିବେ । ଅନ୍ୟପଟରେ ତାଳବଣିଆ ପାର୍କିଂରୁ ତିନି ଚକିଆ ଗାଡ଼ିଗୁଡ଼ିକ ୱାଟର ୱାର୍କସ୍ ରୋଡ, ଓଡ଼ିଶା ବେକେରି, ରାମ ମନ୍ଦିର, ଘୋଡ଼ାବଜାର ଛକ ଦେଇ ରେଡକ୍ରସ ରୋଡରେ ଯାତ୍ରୀଙ୍କୁ ଓହ୍ଳାଇ ପୁଣି ସେହି ରାସ୍ତା ଦେଇ ତାଳବଣିଆକୁ ଫେରିବେ ବୋଲି ନିଷ୍ପତ୍ତି ହୋଇଛି ।
