ଉଦଳା, ୨୨/୧୨: ମହିଳାଙ୍କ ଘର ଜାଗା ଉପରେ ପଡୋଶୀ ରଖିଥିଲେ ପଥର । ଯାହାକୁ ବିରୋଧ କରିଥିଲେ ମହିଳା । ବିରୋଧ କରିବାରୁ ମହିଳାଙ୍କୁ ରାସ୍ତା ଉପରେ କରିଲେ ଆକ୍ରମଣ । ପଥରରେ ଛେଚି ମହିଳାଙ୍କୁ କରିଲେ ଗୁରୁତର । ଗୁରୁତର ମହିଳା ଜଣକ ମିନତୀ ବେହେରା ଏବଂ ଆକ୍ରମଣ କରିଥିବା ମହିଳା ଜଣକ କାନିଆ ମହାନ୍ତି ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ନୁଦଡିହା ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ନୁଦଡିହା ଗ୍ରାମର କାନିଆ ମହାନ୍ତି ତାଙ୍କ ପଡୋଶୀ ମିନତୀ ବେହେରାଙ୍କ ଜାଗା ଉପରେ ପଥର ରଖିଥିଲେ । ଯାହାକୁ ନେଇ କାନିଆଙ୍କୁ ପଥର ରଖିବା ବାବଦରେ ପଚାରି ଥିଲେ ମିନତୀ । ଏହି କଥାକୁ ନେଇ ଉଭୟଙ୍କ ମଧ୍ୟରେ ସାମାନ୍ୟ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ କାନିଆ ଏକ ପଥର ଆଣି ମିନତୀଙ୍କୁ ଅତର୍କିତ ଆକ୍ରମଣ କରିଥିଲେ । ପଥରରେ ମିନତୀଙ୍କ ମୁଣ୍ଡକୁ ଛେଚିବା ସହିତ ମାଡ଼ ମଧ୍ୟ ମାରିଥିଲେ । ଫଳରେ ମିନତୀଙ୍କ ମୁଣ୍ଡ ଫାଟିବା ସହିତ ପ୍ରବଳ ରକ୍ତସ୍ରାବ ହୋଇଥିଲା ଏବଂ ସେ ଯନ୍ତ୍ରଣାରେ ଚିତ୍କାର କରିଥିଲେ । ମିନତୀଙ୍କ ପାଟି ଶୁଣି ଘର ଲୋକେ ଦୌଡ଼ି ଆସିଥିଲେ । ମିନତୀଙ୍କୁ ଗୁରୁତର ଅବସ୍ଥାରେ ଦେଖି ତୁରନ୍ତ ତାଙ୍କୁ ଚିକିତ୍ସା ନିମନ୍ତେ ଉଦଳା ଡାକ୍ତରଖାନାରେ ଭର୍ତ୍ତି କରିଥିଲେ ଏବଂ ଏହି ଘଟଣା ସତମ୍ପର୍କରେ ପୋଲିସକୁ ମଧ୍ୟ ଖବର ଦେଇଥିଲେ । ଉଦଳା ଡାକ୍ତରଖାନାରେ ତାଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ ତାଙ୍କୁ ବାରିପଦା ସ୍ଥାନାନ୍ତର କରାଯାଇଛି । ଅନ୍ୟପଟେ ଖବର ପାଇ କପ୍ତିପଦା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ।
