ପୁରୀ,୩୧/୦୫: ନରେନ୍ଦ୍ରରେ ବାଣ ବିସ୍ଫୋରଣ ଘଟଣାର ପ୍ରାଶାସନିକ ସ୍ତରରେ ତଦନ୍ତ ନିର୍ଦ୍ଦେଶ ହୋଇଥିବା ବେଳେ କୁମ୍ଭାରପଡ଼ା ଥାନା ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏହି ବାଣ ବିସ୍ଫୋରଣ ଘଟଣାରେ ୩ ଜଣଙ୍କ ବିରୋଧରେ ମାମଲା ରୁଜୁ କରାଯାଇଥିବା ଜଣାପଡ଼ିଛି ।
ପୁଲିସ ତଦନ୍ତରୁ ଜଣାପଡ଼ିଛି, ଗୁରୁତର ଆହତ ହୋଇ ଭୁବନେଶ୍ୱରରେ ଆଇସିୟୁରେ ଚିକିତ୍ସାଧୀନ ଖଣ୍ଡିଆବନ୍ଧର ଚନ୍ଦନ ଭୋଇ ଏହି ବାଣ ନରେନ୍ଦ୍ର ପୁଷ୍କରିଣୀକୁ ଆଣି ଫୁଟାଉଥିଲେ । ଏହି ବାଣକୁ ଟ୍ରଲି ଯୋଗେ ବୋହି ଆଣିଥିଲେ ରାଜୁ । ଏହି ୨ ଜଣଙ୍କ ସହ ଅନ୍ୟ ଜଣେ ମଧ୍ୟ ସାମିଲ୍ ଥିବା ଜଣାପଡ଼ିବା ପରେ ପୁଲିସ ସେମାନଙ୍କ ବିରୋଧରେ ମାମଲା ରୁଜୁ କରିଛି । ଏଏସ୍ଆଇ ପ୍ରମୋଦ କୁମାର ଦଳେଇଙ୍କ ଏତଲାକ୍ରମେ ଏକ୍ସପ୍ଲୋସିଭ୍ ସବ୍ଷ୍ଟାନ୍ସ ଆକ୍ଟର ୩, ୪ ଓ ୫ ସହ ଓଡ଼ିଶା ଫାୟାର୍ ୱାର୍କସ୍ ଆଣ୍ଡ୍ ଲାଉଡ୍ ସ୍ପିକର୍ (ରେଗୁଲେସନ୍) ଆକ୍ଟ ୫ ଅନୁଯାୟୀ ମାମଲା ରୁଜୁ କରାଯାଇଛି । ମାମଲାରେ ରାଜୁଙ୍କର ମୃତ୍ୟୁ ହୋଇଥିବା ବେଳେ ଚନ୍ଦନ ଚିକିତ୍ସାଧୀନ ।
ସେହିପରି ଅନ୍ୟ ଅଭିଯୁକ୍ତ କଥା କହିପାରୁନଥିବାରୁ ତାଙ୍କୁ ପଚରାଉଚରା କରାଯାଇ ପାରୁନାହିଁ ବୋଲି କହିଛନ୍ତି ମାମଲାର ତଦନ୍ତକାରୀ ଅଧିକାରୀ ଆଇଆଇସି ଜୟଦୀପ ମହାନ୍ତି । ଡାକ୍ତରଖାନାରେ ପୁଲିସର ଏକ ଟିମ୍ ଅଛନ୍ତି । ଆହତମାନଙ୍କୁ ପଚରାଉଚରା କରାଯାଉଥିବା ବେଳେ ସେମାନଙ୍କ ଚିକିତ୍ସାରେ ମଧ୍ୟ ପୁଲିସ ଟିମ୍ ସହଯୋଗ କରୁଛନ୍ତି । ବାଣ ଫୁଟାଇବା ପାଇଁ କୌଣସି ଅନୁମତି ନଥିଲା ବୋଲି କହିଛନ୍ତି ଡେପୁଟି ଫାୟାର୍ ଅଫିସର୍ ନାରାୟଣ ଦାଶ । କେଉଁ ପରିସ୍ଥିତିରେ ସେଠାକୁ ବାଣ ଆସିଥିଲା ଓ କେତେ ସମୟ ଫୁଟିଥିଲା ତାହାର ଉଚ୍ଚସ୍ତରୀୟ ତଦନ୍ତ ଦାବି ହୋଇଛି ।
ପ୍ରାଣ ହରାଇଥିବା ଶିଶୁ ପ୍ରିୟାଂଶୁ ତାଙ୍କ ବାପା ଦେବଦତ୍ତଙ୍କ ସହ ନରେନ୍ଦ୍ର ପୋଖରୀରେ ଚାପ ଖେଳ ଦେଖିବାକୁ ଆସିଥିବା ବେଳେ ଋଷିକେଶ ଏକାକୀ ଆସିଥିଲେ । ରାଜୁ ସେଠାରେ ବାଣ ଫୁଟାଉଥିବା ବେଳେ ଏହି ଅଘଟଣ ଘଟିଥିଲା । ଆହତ ୨୭ ଜଣଙ୍କ ମଧ୍ୟରୁ ୩ ଜଣ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ହେଉଛନ୍ତି । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ଓ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇ ନରେନ୍ଦ୍ର ପୁଷ୍କରିଣୀ ସହ ଜିଲ୍ଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରିଛନ୍ତି । ସ୍ଥିତି ପରଖିବା ସହ ଆହତଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଥିଲେ ।