ନୂଆଦିଲ୍ଲୀ: ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାରେ ସାମ୍ପ୍ରଦାୟିକ ହିଂସା ଘଟିବା ପରେ ସୋମବାର ଉକ୍ତ ଅଞ୍ଚଳରେ ଶାନ୍ତି ପରିଲକ୍ଷିତ ହୋଇଛି। ରାସ୍ତାଘାଟ ଶୂନଶାନ ରହିଥିବା ବେଳେ ସୀମାନ୍ତ ସୁରକ୍ଷା ବାହିନୀ(ବିଏସଏଫ) ଏବଂ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ(ସିଆରପିଏଫ) ଭଳି ଅର୍ଦ୍ଧସାମରିକ ବାହିନୀର ବ୍ୟାପକ ମୁତୟନ ସ୍ଥାନୀୟ ଲୋକଙ୍କୁ ଆଶ୍ଵାସନା ଦେଇଛି। ଦୁଇ ଦିନର ହିଂସାତ୍ମକ ବିକ୍ଷୋଭ ପରେ ବର୍ତ୍ତମାନ ପରିସ୍ଥିତି ଶାନ୍ତ ପଡିଛି। ତେବେ ୱାକଫ୍ (ସଂଶୋଧନ) ବିଲ୍ ୨୦୨୫ ଆଇନକୁ ବିରୋଧ କରି ଏହି ହିଂସାର ଆରମ୍ଭ ହୋଇଥିଲା।
ପୋଲିସ ସୂଚନା ଅନୁଯାୟୀ, ଶୁକ୍ରବାର ଜୁମା ନମାଜ ପରେ ୱାକଫ୍ (ସଂଶୋଧନ) ବିଲ୍ ୨୦୨୫ ଆଇନ ବିରୋଧରେ ହେଉଥିବା ବିକ୍ଷୋଭ ହିଂସାତ୍ମକ ରୂପ ନେଇଥିଲା। ଏହି ହିଂସାରେ ସ୍ଥାନିୟ ଅଞ୍ଚଳରେ ବ୍ୟପକ ଭାବେ ଲୁଟ୍ପାଟ୍, ଅଗ୍ନିସଂଯୋଗ ଏବଂ ଭଙ୍ଗାରୁଜା ଆଦି ହୋଇଥିଲା। ଯେଉଁଥିରେ ଅତି କମରେ ତିନି ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି। ମୃତକଙ୍କ ମଧ୍ୟରେ ଜଣେ ପିତା ଓ ତାଙ୍କ ପୁଅ ମଧ୍ୟ ରହିଛନ୍ତି। ଶନିବାର ମଧ୍ୟ ନୂଆ ଉକ୍ତ ଅଞ୍ଚଳରେ ହିଂସା ଦେଖାଦେଇଥିଲା। ରବିବାର କିଛି ଲୋକ ନୌକା ଯୋଗେ ମୁର୍ଶିଦାବାଦ ଛାଡ଼ି ପାଖ ଜିଲ୍ଲା ମାଲଦାକୁ ଯାଉଥିବା ଭିଡିଓ ସାମ୍ନାକୁ ଆସିଛି। ଗୁଜବ ରୋକିବା ପାଇଁ ସମ୍ବେଦନଶୀଳ ଅଞ୍ଚଳରେ ମଙ୍ଗଳବାର ପର୍ଯ୍ୟନ୍ତ ଇଣ୍ଟରନେଟ ସେବା ବନ୍ଦ ରହିଛି।
କଲିକତା ହାଇକୋର୍ଟଙ୍କ ନିର୍ଦ୍ଦେଶକ୍ରମେ ହିଂସା ପ୍ରଭାବିତ ଅଞ୍ଚଳରେ ୯ କମ୍ପାନୀ ବିଏସଏଫ ଏବଂ ୮ କମ୍ପାନୀ ସିଆରପିଏଫ ମୁତୟନ କରାଯାଇଛି। ମମତା ବାନାର୍ଜୀଙ୍କ ଟିଏମସି ସରକାର ଏହି ହିଂସାର ତଦନ୍ତ ପାଇଁ ୨୩ ଜଣିଆ ଏକ ସ୍ଵତନ୍ତ୍ର ପୋଲିସ ଦଳ ଗଠନ କରିଛନ୍ତି। ଯେଉଁଥିରେ ଡିଏସପି ଏବଂ ଇନ୍ସପେକ୍ଟର ସ୍ତରିୟ ଅଧିକାରୀ ରହିଛନ୍ତି। ପୋଲିସ ସୂତ୍ର ଅନୁଯାୟୀ, ସୋସିଆଲ ଡେମୋକ୍ରାଟିକ ପାର୍ଟି ଅଫ ଇଣ୍ଡିଆ (ଏସଡିପିଆଇ) ଏହି ହିଂସାକୁ ଉସକାଇବାରେ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରିଥିବା ଜଣାପଡ଼ିଛି। ଏସଡିପିଆଇର ମୂଳ ସଂଗଠନ ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ)କୁ ୨୦୨୨ରେ ଭାରତ ସରକାରଙ୍କ ଦ୍ଵାରା ଭାରତରେ ନିଷିଦ୍ଧ କରାଯାଇଥିଲା।
ରାଜନୈତିକ ଦଳମାନେ ଏହି ହିଂସା ପାଇଁ ପରସ୍ପରକୁ ଦାୟୀ କରୁଛନ୍ତି। ତୃଣମୂଳ ନେତା କୁନାଲ ଘୋଷ ଦାବି କରିଛନ୍ତି ଯେ, ମମତା ସରକାରଙ୍କୁ ଏକ "ବୃହତ୍ ଷଡ଼ଯନ୍ତ୍ର"ର ସୂଚନା ମିଳିଛି, ଯେଉଁଥିରେ କେନ୍ଦ୍ରୀୟ ଏଜେନ୍ସି, ବିଏସଏଫର କିଛି ଅଂଶ ଏବଂ ଦୁଇ-ତିନୋଟି ରାଜନୈତିକ ଦଳ ଜଡ଼ିତ ରହିଛନ୍ତି। ଅନ୍ୟପକ୍ଷରେ, ବିଜେପି ନେତା ସୁଭେନ୍ଦୁ ଅଧିକାରୀ ଦାବି କରିଛନ୍ତି ଯେ, ମୁର୍ଶିଦାବାଦର ଧୁଲିଆନରୁ ପ୍ରାୟ ୪୦୦ ହିନ୍ଦୁ ବିସ୍ଥାପିତ ହୋଇଛନ୍ତି। ବିଜେପି ମମତା ବାନାର୍ଜୀଙ୍କ "ତୁଷ୍ଟିକରଣ ରାଜନୀତି"ହିଁ ଏହି ହିଂସା ପାଇଁ ଦାୟୀ।
ମୁଖ୍ୟମନ୍ତ୍ରୀ ମମତା ବାନାର୍ଜୀ ଉକ୍ତ ଅଞ୍ଚଳ ଗସ୍ତ କରିବା ସହ ଶାନ୍ତି ରକ୍ଷା ପାଇଁ ଲୋକମାନଙ୍କୁ ଆହ୍ଵାନ ଦେଇଛନ୍ତି। ସେ କହିଛନ୍ତି ଯେ ୱାକଫ୍ (ସଂଶୋଧନ) ବିଲ୍ ୨୦୨୫ ଆଇନ ରାଜ୍ୟରେ ଲାଗୁ ହେବ ନାହିଁ। ସେ ଏହା ମଧ୍ୟ କହିଛନ୍ତି ଯେ ଏହି ଆଇନ କେନ୍ଦ୍ର ସରକାରଙ୍କ ଦ୍ଵାରା ପ୍ରଣୟନ କରାଯାଇଛି, ତେଣୁ ଏ ସମ୍ପର୍କରେ କେନ୍ଦ୍ରକୁ ପ୍ରଶ୍ନ କରାଯାଉ।
ଏହି ହିଂସା ମୁର୍ଶିଦାବାଦର ପରିସ୍ଥିତି ଓ ସଂଲଗ୍ନ ବାଂଲାଦେଶ ସୀମାକୁ ନେଇ ଚିନ୍ତା ବଢ଼ାଇଛି। ଏହି ଘଟଣାର ତଦନ୍ତ ଜାରି ରହିଛି ଓ ପରିସ୍ଥିତି ନିୟନ୍ତ୍ରଣରେ ରହିଛି ବୋଲି ପୋଲିସ ସୂଚନା ଦେଇଛି।
