ଭୁବନେଶ୍ୱର,୦୫/୦୪: ଲୁଟ୍ ପାଇଁ ଆସି ବୃଦ୍ଧାଙ୍କୁ ହତ୍ୟା କଲେ ଦୁର୍ବୃତ୍ତ। ଲୁଟେରାଙ୍କ ଠେଙ୍ଗାମାଡ଼ରେ ମାଆଙ୍କ ପ୍ରାଣ ଚାଲି ଯାଇଥିବା ବେଳେ ଝିଅ ଗୁରୁତର ହୋଇଛନ୍ତି । ମୃତ ବୃଦ୍ଧା ଜଣକ ହେଲେ କୌସଲ୍ୟା ପତି । ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଅଧୀନ ବାଲିପଡିଆ ପଞ୍ଚାୟତ ଟିଗିରିଆ ଗାଁରେ ଏଭଳି ଘଟଣା ଘଟିଥିବାର ଖବର ସାମେନାକୁ ଆସିଛି ।
ସୂଚନା ମୁତାବକ, ଟିଗିରିଆ ଗ୍ରାମର କୌସଲ୍ୟା ପତି ଓ ତାଙ୍କ ଝିଅ ଘରେ ଥିବା ସମୟରେ ଦୁଇ ଜଣ ଦୁର୍ବୃତ୍ତ ଲୁଟ୍ କରିବା ପାଇଁ ଘରେ ପଶିଥିଲେ। ଏହି ସମୟରେ ସେମାନଙ୍କୁ ମାଆ ଏବଂ ଝିଅ ଦେଖି ଦେବାରୁ ଦୁର୍ବୃତ୍ତମାନେ ଉଭୟଙ୍କୁ ଆକ୍ରମଣ କରିଥିଲେ । ଏକ ଠେଙ୍ଗାରେ ଉଭୟଙ୍କୁ ମାଡ଼ ମାରିଥିଲେ ଦୁର୍ବୃତ୍ତ । ଫଳରେ ବୃଦ୍ଧାଙ୍କ ମୃତ୍ୟୁ ହୋଇଥିବା ବେଳେ ଝିଅ ଗୁରୁତର ହୋଇଥିଲେ । ଝିଅର ପାଟି ଶୁଣି ଘର ପାଖ ଲୋକେ ଦୌଡ଼ି ଆସିଥିଲେ । ହେଲେ ଏହାରି ଭିତରେ ଦୁର୍ବୃତ୍ତମାନେ ଚମ୍ପଟ ମାରିଥିଲେ । ବୃଦ୍ଧାଙ୍କୁ ତଳେ ପଡ଼ି ରହିଥିବା ଦେଖି ତୁରନ୍ତ ବଡ଼ଚଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦକୁ ନେଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ଖବର ପାଇ ବାଲିଚନ୍ଦ୍ରପୁର ଥାନା ପୋଲିସ ଘଟଣା ସ୍ଥଳରେ ପହଞ୍ଚିଛି । ଘଟଣା ସ୍ଥଳରେ ଉପସ୍ଥିତ ରହି ତଦନ୍ତ କରୁଛି ପୋଲିସ ।
