ମୁମ୍ବାଇ,୦୫/୦୪: ଚାକିରି ଖୋଜୁ ଖୋଜୁ ସିନେ ଦୁନିଆରେ ପାଦ ଥାପିଥିଲେ । ଲାଇଟ୍ ଟେଷ୍ଟିଂରୁ ଅଭିନୟ ଜଗତରେ ପହଞ୍ଚିଥିଲେ । ହରିକୃଷ୍ଣ ଗୋସ୍ବାମୀରୁ ମନୋଜ କୁମାର ଆଉ ପରେ ବନିଯାଇଥିଲେ ବଲିଉଡ଼ର ଭାରତ କୁମାର । ରୋମାଣ୍ଟିକ, ଆକ୍ସନ ସବୁଥିଲେ ତାଙ୍କ ଅଭିନୟ ଥିଲା ନମ୍ବର ୱାନ୍ । ଭାରତୀୟ ସିନେମାକୁ ନୂଆ ମାର୍ଗ ଦେଖାଇଥିବା ବର୍ଷୀୟାନ ଅଭିନେତା-ନିର୍ଦ୍ଦେଶକ ମନୋଜ କୁମାର ଦୁନିଆରୁ ବିଦାୟ ନେଇଛନ୍ତି । ଆସନ୍ତୁ ଜାଣିବା ତାଙ୍କ ବିଷୟରେ କିଛି ଅଜଣା କଥା ।
ପ୍ରଥମ ଦେଖାରେ ପ୍ରେମ- ଏକ ସାକ୍ଷତକାରରେ ମନୋଜ ତାଙ୍କ ପ୍ରେମ କାହାଣୀ ବିଷୟରେ କହିଥିଲେ । ତାଙ୍କ ପତ୍ନୀଙ୍କ ନାମ ଶଶି ଗୋସ୍ବାମୀ । ସ୍ନାତକ ପଢିବା ସମୟରେ ପୁରୁଣା ଦିଲ୍ଲୀ ସ୍ଥିତ ଜଣେ ବନ୍ଧୁଙ୍କ ଘରକୁ ଯାଇଥିଲେ ମନୋଜ । ସେଠାରେ ସେ ଶଶିଙ୍କୁ ପ୍ରଥମେ ଦେଖିଥିଲେ । ପ୍ରଥମ ଦେଖାରୁ ହିଁ ପ୍ରେମରେ ପଡିଥିଲେ । ପ୍ରାୟ ଦେଢ ବର୍ଷ ପରେ ଦୁହେଁ ଦୁହିଁଙ୍କୁ ମନ କଥା କହିଥିଲେ । । ଶଶିଙ୍କ ପରିବାର ଅରାଜି ହେଲେ ହେଁ, ଶେଷରେ ଉଭୟଙ୍କ ବିବାହ ହେଲା । ବିବାହ ପୂର୍ବରୁ ୧୯୫୭ରେ ଶଶିଙ୍କୁ ଏକ ଫିଲ୍ମ ଅଫର୍ ହୋଇଥିଲା । ଶଶି ଯେତେବେଳେ ଏ ବିଷୟରେ ମନୋଜଙ୍କୁ ପଚାରିଲେ, ସେ କହିଲେ ଉଭୟଙ୍କ ମଧ୍ୟରୁ କେବଳ ଜଣେ ଫିଲ୍ମରେ କାମ କରିବା ଉଚିତ୍ । ଶଶି ଅଭିନୟରୁ ଓହରିଗଲେ ।
ଲାଇଟ୍ ଟେଷ୍ଟିରୁ ଲାଇଟ୍- କ୍ୟାମେରା- ଆକ୍ସନ- ମନୋଜ ଦିନେ ଚାକିରି ଅନ୍ୱେଷଣରେ ଫିଲ୍ମ ଷ୍ଟୁଡିଓରେ ବୁଲୁଥିଲେ । ଜଣେ ବ୍ୟକ୍ତିଙ୍କୁ ଏ କଥା କହିବାରୁ ସେ ମନୋଜଙ୍କୁ ଲାଇଟ୍ ଓ ଫିଲ୍ମ ସୁଟିଂରେ ବ୍ୟବହୃତ ଅନ୍ୟ ଉପକରଣଗୁଡ଼ିକୁ ନେବା ଆଣିବା କାମ ମିଳିଲା । ଧୀରେ ଧୀରେ କାମରେ ଖୁସି ହୋଇ ତାଙ୍କୁ ଫିଲ୍ମରେ ସହାୟକ କାମ ଦିଆଗଲା । ଫିଲ୍ମ ସେଟ୍ରେ ହିରୋଙ୍କ ଉପରେ ପଡୁଥିବା ଲାଇଟ୍ ଚେକ୍ କରିବା ପାଇଁ ମନୋଜଙ୍କୁ ହିରୋଙ୍କ ସ୍ଥାନରେ ଠିଆ କରାଯାଉଥିଲା । ଦିନେ ଲାଇଟ୍ ଟେଷ୍ଟିଂ ପାଇଁ ମନୋଜ କୁମାର ହିରୋଙ୍କ ସ୍ଥାନରେ ଠିଆ ହୋଇଥିଲେ । ଲାଇଟ୍ ପଡ଼ିବା ମାତ୍ରେ ତାଙ୍କ ଚେହେରା ଏତେ ଆକର୍ଷଣୀୟ ଦିଶିଲା ଯେ ନିର୍ଦ୍ଦେଶକ ତାଙ୍କୁ ୧୯୫୭ରେ ମୁକ୍ତିପ୍ରାପ୍ତ ଫିଲ୍ମ ‘ଫ୍ୟାଶନ୍’ରେ ଏକ ଛୋଟ ଭୂମିକା ଦେଲେ । ମନୋଜଙ୍କ ପ୍ରଥମ ଫିଲ୍ମ ସଫଳ ହେଲା । ତା’ପରେ ଫିଲ୍ମର ଲାଇନ୍ ଲାଗିଲା ।
ଶାସ୍ତ୍ରୀ କହିବାରୁ କରିଥିଲେ 'ଉପକାର'-୧୯୬୫ରେ ମନୋଜ କୁମାର ଦେଶଭକ୍ତି ଫିଲ୍ମ ‘ସହିଦ’ରେ ସ୍ୱାଧୀନତା ସଂଗ୍ରାମୀ ଭଗତ ସିଂହ ଭୂମିକାରେ ନଜର ଆସିଲେ । ଫିଲ୍ମ ସୁପର୍ହିଟ୍ ହେଲା । ଏହାର ଗୀତ ‘ଏ ୱତନ୍, ଏ ୱତନ୍ ହମ୍କୋ ତେରୀ କସମ୍’, ‘ସର୍ଫରୋଶୀ କି ତମନ୍ନା’ ଓ ‘ମେରା ରଙ୍ଗ ଦେ ବସନ୍ତୀ ଚୋଲା’କୁ ଦର୍ଶକ ଖୁବ୍ ପସନ୍ଦ କଲେ । ଫିଲ୍ମଟି ତତ୍କାଳୀନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀଙ୍କ ମନ କିଣିନେଲା । ଶାସ୍ତ୍ରୀଙ୍କ ସ୍ଲୋଗାନ୍ ଥିଲା ‘ଜୟ ଯବାନ, ଜୟ କିସାନ୍’ । ଏହି ସ୍ଲୋଗାନ୍ ଉପରେ ଫିଲ୍ମ ନିର୍ମାଣ କରିବାକୁ ଶାସ୍ତ୍ରୀ ପ୍ରସ୍ତାବ ଦେଲେ । ତା’ପରେ ମନୋଜ ଫିଲ୍ମ ‘ଉପକାର’ ନିର୍ମାଣ ଆରମ୍ଭ କଲେ । ‘ଉପକାର’ ଫିଲ୍ମ ଶାସ୍ତ୍ରୀ ଜୀଙ୍କ କଥାରେ ନିର୍ମିତ ହୋଇଥିଲା । କିନ୍ତୁ ସେ ଫିଲ୍ମ ଦେଖିପାରିଲେ ନାହିଁ । ୧୧ ଜାନୁଆରୀ, ୧୯୬୬ରେ ଶାସ୍ତ୍ରୀ ଜୀଙ୍କ ଦେହାନ୍ତ ହୋଇଥିଲା । ଏହାର ବର୍ଷେ ପରେ ୧୯୬୭ରେ ‘ଉପକାର’ ରିଲିଜ୍ ହେଲା । ଶାସ୍ତ୍ରୀ ଜୀ ଫିଲ୍ମ ଦେଖି ନ ପାରିବାର ଅବସୋସ ମନୋଜଙ୍କର ସାରା ଜୀବନ ରହିଲା ।
ମା'ଙ୍କ ଯନ୍ତ୍ରଣା ଦେଖି ଡାକ୍ତରଙ୍କୁ ପିଟିଥିଲେ- ମନୋଜଙ୍କୁ ଯେତେବେଳେ ୧୦ ବର୍ଷ ବୟସ, ୧୯୪୭ରେ ତାଙ୍କର ସାନ ଭାଇ ଜନ୍ମ ହେଲା । ସ୍ୱାସ୍ଥ୍ୟ ବିଗିଡ଼ିବାରୁ ୨ ମାସର ଭାଇ ଓ ମା’ଙ୍କୁ ହସ୍ପିଟାଲରେ ଭର୍ତ୍ତି କରାଗଲା । ଇତିମଧ୍ୟରେ ଦଙ୍ଗା ଆରମ୍ଭ ହୋଇଗଲା । ଦଙ୍ଗା ସମୟରେ ସାଇରନ୍ ବାଜିବା ମାତ୍ରେ ଡାକ୍ତର, ନର୍ସ ଅଣ୍ଡର୍ଗ୍ରାଉଣ୍ଡ୍କୁ ଚାଲିଯାଉଥିଲେ । ଏହି ସ୍ଥିତିରେ ମନୋଜଙ୍କ ଭାଇ ହସ୍ପିଟାଲରେ ପ୍ରାଣ ହରାଇଲା । ମା’ଙ୍କ ଅବସ୍ଥା ମଧ୍ୟ ସଙ୍କଟାପନ୍ନ ଥିଲା । ସେ ଯନ୍ତ୍ରଣାରେ ଚିତ୍କାର କରୁଥିଲେ । କିନ୍ତୁ ଡାକ୍ତର କିମ୍ବା ନର୍ସ କେହି ବି ତାଙ୍କର ଚିକିତ୍ସା କରୁନଥିଲେ । ଏ ସବୁ ଦେଖି ମନୋଜ ଏତେ କ୍ଷୁବ୍ଧ ହୋଇଗଲେ ଯେ ଅଣ୍ଡରଗ୍ରାଉଣ୍ଡ୍ ଯାଇ ଡାକ୍ତର ଓ ନର୍ସଙ୍କୁ ପିଟିବା ଆରମ୍ଭ କରିଦେଲେ ।
ଅଧିକ ପଢନ୍ତୁ...ପଞ୍ଚଭୂତରେ ଲୀନ ମନୋଜ କୁମାରଙ୍କ ପାର୍ଥିବ ଶରୀର, ଲୁହ ଭିଜା ଆଖିରେ ବିଦାୟ ଦେଲା ବଲିଉଡ଼
ଶାହରୁଖଙ୍କ ବିରୋଧରେ ମାନହାନି ମକଦ୍ଦମା- ଶାନ୍ତ ସ୍ୱଭାବର ମନୋଜ ଥରେ ବଲିଉଡ୍ ବାଦଶାହ ଶାହରୁଖ ଖାନ୍ଙ୍କ ଉପରେ ଖୁବ୍ ରାଗିଥିଲେ । ମାମଲା ୨୦୦୭ର ଫିଲ୍ମ ‘ଓମ୍ ଶାନ୍ତି ଓମ୍’ ସହ ଜଡ଼ିତ । ଫିଲ୍ମର ନିର୍ଦ୍ଦେଶିକା ଫରାହ ଖାନ୍ ଓ ଶାହରୁଖ୍ଙ୍କ ବିରୋଧରେ ମନୋଜ ମାନହାନି ମକଦ୍ଦମା କରିଥିଲେ । ଫିଲ୍ମର ଏକ ସିନ୍ରେ ଶାହରୁଖଙ୍କ ଚରିତ୍ର ଓମ୍ ପ୍ରକାଶ ମଖିଜା ମନୋଜଙ୍କ ପାସ୍ ନେଇ ଏକ ଫିଲ୍ମ ପ୍ରିମିୟର୍ରେ ଏଣ୍ଟ୍ରି କରୁଥିବା ନଜର ଆସିଥିଲେ । ମନୋଜଙ୍କ ମୁହଁରେ ହାତ ରଖିବାର ଆଇକନିକ୍ ଅନ୍ଦାଜ୍କୁ ସେ ନକଲ କରିଥିବାରୁ ପୁଲିସ ତାଙ୍କୁ ଚିହ୍ନି ପାରିଲା ନାହିଁ । ପରେ ସୁରକ୍ଷାକର୍ମୀ ତାଙ୍କ ଉପରେ ଲାଠି ଚାର୍ଜ କରି ତାଙ୍କୁ ସେଠାରୁ ଘଉଡ଼େଇ ଦେଲେ । ଏଥିରେ ମନୋଜ ମର୍ମାହତ ହେଲେ । ଫିଲ୍ମରୁ ଉକ୍ତ ଦୃଶ୍ୟକୁ ହଟାଇବାକୁ ଅନୁରୋଧ କଲେ । ଫିଲ୍ମ ନିର୍ମାତା ଏଥିରେ ରାଜି ହେଲେ । ଶାହରୁଖ ମଧ୍ୟ ଅଭିନେତାଙ୍କୁ କ୍ଷମା ପ୍ରାର୍ଥନା କଲେ ।
