ନୂଆଦିଲ୍ଲୀ ୦୫/୦୪: ବଲିଉଡର ଭେଟେରାନ ଅଭିନେତା ତଥା ନିର୍ଦ୍ଦେଶକ ମନୋଜ କୁମାର ଆଉ ଆମ ଗହଣରେ ନାହାଁନ୍ତି। ୮୭ ବର୍ଷ ବୟସରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କ ଅଭିନୟର ଯାଦୁରେ ଅନେକ ସିନେମା କାଳଜୟୀ ହୋଇଛି । ଭାରତୀୟ ସିନେ ଜଗତକୁ ନୂଆ ମାର୍ଗ ଦେଖାଇଥିବା ମନୋଜ କୁମାର ସିନେ ଦୁନିଆର ଏଭଳି ଜଣେ ଧ୍ରୁବତାରା ଯିଏ ଚିରକାଳ ଚିକ୍ମିକ୍ କରୁଥିବେ । ତେବେ ଶାନ୍ତ ସ୍ୱଭାବର ମନୋଜ ଥରେ ବଲିଉଡ୍ ବାଦଶାହ ଶାହରୁଖ ଖାନ୍ଙ୍କ ଉପରେ ଖୁବ୍ ରାଗିଥିଲେ ।
ମାମଲା ୨୦୦୭ର ଫିଲ୍ମ ‘ଓମ୍ ଶାନ୍ତି ଓମ୍’ ସହ ଜଡ଼ିତ । ଫିଲ୍ମର ନିର୍ଦ୍ଦେଶିକା ଫରାହ ଖାନ୍ ଓ ଶାହରୁଖ୍ଙ୍କ ବିରୋଧରେ ମନୋଜ ମାନହାନି ମକଦ୍ଦମା କରିଥିଲେ । ଫିଲ୍ମର ଏକ ସିନ୍ରେ ଶାହରୁଖଙ୍କ ଚରିତ୍ର ଓମ୍ ପ୍ରକାଶ ମଖିଜା ମନୋଜଙ୍କ ପାସ୍ ନେଇ ଏକ ଫିଲ୍ମ ପ୍ରିମିୟର୍ରେ ଏଣ୍ଟ୍ରି କରୁଥିବା ନଜର ଆସିଥିଲେ । ମନୋଜଙ୍କ ମୁହଁରେ ହାତ ରଖିବାର ଆଇକନିକ୍ ଅନ୍ଦାଜ୍କୁ ସେ ନକଲ କରିଥିବାରୁ ପୁଲିସ ତାଙ୍କୁ ଚିହ୍ନି ପାରିଲା ନାହିଁ । ପରେ ସୁରକ୍ଷାକର୍ମୀ ତାଙ୍କ ଉପରେ ଲାଠି ଚାର୍ଜ କରି ତାଙ୍କୁ ସେଠାରୁ ଘଉଡ଼େଇ ଦେଲେ । ଏଥିରେ ମନୋଜ ମର୍ମାହତ ହେଲେ । ତାଙ୍କୁ ଅପମାନିତ ଓ ଉପହାସ କରିବାର ଏହା ଏକ ଷଡ଼ଯନ୍ତ୍ର । ଫିଲ୍ମ ଦୁନିଆକୁ ଦୀର୍ଘ ୫୦ ବର୍ଷର ତାଙ୍କ ସମର୍ପଣଭାବ ଅପମାନିତ ହୋଇଛି ବୋଲି ସେ କହିଲେ ।
ଫିଲ୍ମରୁ ଉକ୍ତ ଦୃଶ୍ୟକୁ ହଟାଇବାକୁ ଅନୁରୋଧ କଲେ । ଫିଲ୍ମ ନିର୍ମାତା ଏଥିରେ ରାଜି ହେଲେ । ଶାହରୁଖ ମଧ୍ୟ ଏହି ବର୍ଷୀୟାନ ଅଭିନେତାଙ୍କୁ କ୍ଷମା ପ୍ରାର୍ଥନା କଲେ । କିନ୍ତୁ ୨୦୧୩ରେ ‘ଓମ୍ ଶାନ୍ତି ଓମ୍’ ଜାପାନରେ ପୁନଃ ମୁକ୍ତିଲାଭ କରିବା ପରେ ମାମଲା ପୁଣି ଚର୍ଚ୍ଚାକୁ ଆସିଲା । ଫିଲ୍ମରେ ବିବାଦୀୟ ଦୃଶ୍ୟ ପୁନଃ ପ୍ରଦର୍ଶିତ ହେବାରୁ ମନୋଜ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କଲେ । ପ୍ରଡକ୍ସନ୍ ହାଉସ୍ ଇରୋଜ୍ ଇଣ୍ଟର୍ନ୍ୟାସନାଲ ଓ ଶାହରୁଖଙ୍କଠୁ ସେ ୧୦୦ କୋଟି କ୍ଷତିପୂରଣ ଦାବି କଲେ । ତେବେ ପରେ ମାମଲା ପ୍ରତ୍ୟାହାର କରିନେଲେ ।
