ମୁମ୍ବାଇ ୦୪/୦୪: ଲୋକପ୍ରିୟ ସିରିଜ୍ ‘ପଞ୍ଚାୟତ’କୁ ୫ ବର୍ଷ ପୂରିଛି । ୨୦୨୦, ଏପ୍ରିଲ ୩ରେ ପ୍ରାଇମ୍ ଭିଡିଓରେ ‘ପଞ୍ଚାୟତ’ର ପ୍ରିମିୟର ହୋଇଥିଲା । ଏହାର ୩ଟିଯାକ ସିଜନ୍ର ବିପୁଳ ସଫଳତା ପରେ ସିଜନ୍-୪କୁ ଉତ୍ସାହର ସହ ଅପେକ୍ଷା କରିଥିଲେ ଦର୍ଶକ । ଏହି ଅପେକ୍ଷାର ଅନ୍ତ ଘଟିଛି । ‘ପଞ୍ଚାୟତ’ର ୫ମ ବାର୍ଷିକୀ ଅବସରରେ ନିର୍ମାତା ଏହାର ୪ର୍ଥ ସଂସ୍କରଣ ଘୋଷଣା କରିଛନ୍ତି । ଆସନ୍ତା ଜୁଲାଇ ୨ ତାରିଖରେ ପରଦାକୁ ଆସିବ ‘ପଞ୍ଚାୟତ’ ସିଜନ୍-୪ । ଏହି ଲୋକପ୍ରିୟ ସିରିଜ୍ରେ ଜିତେନ୍ଦ୍ର କୁମାର, ନୀନା ଗୁପ୍ତା, ରଘୁବୀର ଯାଦବ, ଚନ୍ଦନ ରୟ, ସନ୍ଭିକା, ଫୈଜଲ ମଲିକ, ଦୁର୍ଗେଶ କୁମାର, ସୁନୀତା ରାଜୱାର ଓ ପଙ୍କଜ ଝା ପ୍ରମୁଖ ଅଭିନୟ କରିଛନ୍ତି ।
ପ୍ରାଇମ୍ ଭିଡିଓ ସିରିଜ୍ର ଏକ ପ୍ରମୋସନାଲ ଭିଡିଓ ଶେୟାର କରିଛି । ଏଥିରେ ଜିତେନ୍ଦ୍ର କୁମାର, ‘ସାଥ୍ ନିଭାନା ସାଥିୟା’ ଫେମ୍ ଜିଆ ମାନେକ ଓ ଭାଇରାଲ ସେନ୍ସେସନ୍ ଦର୍ଶନ ମାଗଡମ୍ ରିଲିଜ୍ ତାରିଖ ଘୋଷଣା କରିଛନ୍ତି । ଲୋକପ୍ରିୟ କମେଡି-ଡ୍ରାମା ସିରିଜ୍ ‘ପଞ୍ଚାୟତ’ର କାହାଣୀ ଜଣେ ଇଞ୍ଜିନିୟରିଂ ସ୍ନାତକଙ୍କ ଉପରେ ପର୍ଯ୍ୟବସିତ, ଯିଏକି ଉତ୍ତରପ୍ରଦେଶର ଫୁଲେରା ନାମକ ଏକ କାଳ୍ପନିକ ଗାଁରେ ପଞ୍ଚାୟତ ସଚିବ ଭାବେ ନିଯୁକ୍ତ ହୋଇଛନ୍ତି । ଗତ ୫ ବର୍ଷ ହେଲା ଶୋ’ର ପ୍ରଶଂସକଙ୍କ ସଂଖ୍ୟା ବଢ଼ିଚାଲିଛି ।