ମଙ୍ଗଳପୁର,୨୭/୦୩ : ଲୋକଙ୍କ ଯାତାୟତ ସୁଗମ ପାଇଁ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ଏହି ଅର୍ଥକୁ କେତେକ ଠିକା ସଂସ୍ଥା ଯନ୍ତ୍ରୀଙ୍କ ସହିତ ମିଶି ଲୁଟିବାରେ ଲାଗିପଡ଼ିଛନ୍ତି । ଏଭଳି ଏକ ଅଭିଯୋଗ ଆସିଛି ଦଶରଥପୁର ବ୍ଲକରେ । ପୂର୍ତ୍ତ ବିଭାଗ ରାସ୍ତା ଠାରୁ ଖୋସାଲପୁର, ରଣସାହି, ବେହେରା ସାହି, ମାଣିକିଡିହା ରାସ୍ତା ନିର୍ମାଣ କାର୍ଯ୍ୟରେ ଦୁର୍ନୀତି ନେଇ ଅଭିଯୋଗ ହୋଇଛି ।
ଏହି ରାସ୍ତାର ଉନ୍ନତିକରଣ ପାଇଁ ପୂର୍ତ୍ତ ବିଭାଗ ତରଫରୁ ୫କୋଟି ୨୨ ଲକ୍ଷ ୮୧ ହଜାରେ ୮୦୧ ଟଙ୍କା ମଞ୍ଜୁର ହୋଇଥିଲା । ଜନୈକ ଠିକାଦାର କାର୍ଯ୍ୟାଦେଶ ହାତେଇ କାମ ଆରମ୍ଭ କରିଥିଲେ । ରାସ୍ତା କାର୍ଯ୍ୟ ୨୦୨୪ ସେପ୍ଟମ୍ବର ୩୦ତାରଖରୁ ଆରମ୍ଭ ହୋଇଥିବା ବେଳେ ନିର୍ମାଣ ଶେଷ ଅବଧି ଚଳିତ ବର୍ଷ ଜୁନ ମାସରେ ରହିଛି । ରାସ୍ତା ନିର୍ମାଣରେ ଅତି ନିମ୍ନମାନର ସାମଗ୍ରୀ ବ୍ୟବହାର କରାଯାଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ବେଳେ ଠିକା ସଂସ୍ଥା ଏକ ଫଳକ ମାଣିକଡିହା ଠାରେ ତିଆରି କରିଛନ୍ତି । ଫଳକଟି ଅଞ୍ଚଳବାସୀଙ୍କ ନଜରକୁ ଆସୁନାହିଁ। ଫଳକଟି ୪ ମାସ ହେବ ପୋତି ଠିକାଦାର ଚୂନ ମାରିଥିଲା । ଏବେ ଅବଧି ସରିବାକୁ ଆଉ ୯୫ଦିନ ବାକି ଥିବା ବେଳେ ଠିକା ସଂସ୍ଥା ଏହି ରାସ୍ତା ନିର୍ମାଣ କାର୍ଯ୍ୟକୁ ତରବରିଆ ଭାବେ ଶେଷ କରିବାକୁ ଉଦ୍ୟମ କରୁଛି । ରାସ୍ତା ନିର୍ମାଣରେ ସିମେଣ୍ଟ ବାଲି ଓ ଚିପ୍ସ ବ୍ୟବହାରରେ ଭାଗ ମାପ ସଠିକ୍ ଭାବରେ ଦିଆଯାଉ ନାହିଁ । ଠିକା ସଂସ୍ଥାର ନିର୍ମାଣ କାର୍ଯ୍ୟ ଚାଲୁଥିବା ସମୟରେ କୌଣସ ଯନ୍ତ୍ରୀ ଉପସ୍ଥିତ ରହୁନଥିବା ଦେଖିବାକୁ ମିଳିଛି ।
କଂକ୍ରିଟରେ ଅଧିକ ପଟୁ ବାଲି ବ୍ୟବହାର କରାଯାଉଛି । ରାସ୍ତାର ସାଇଡ୍ ୱାଲରେ ମିଶୁଥିବା କଂକ୍ରିଟର ଭାଗ ମାପ ଏକ କଡ଼ା ସିମେଣ୍ଟ ସହ ୪ଟି ବାଲି ଓ ମନ ଇଚ୍ଛା ଚିପ୍ସ ପକାଯାଉଛି । ଏହି ପରିମାଣରେ ରାସ୍ତା ନିର୍ମାଣ କରାଗଲେ ଖୁବ କମ୍ ଦିନରେ ଏହି ରାସ୍ତାଟି ନଷ୍ଟ ହୋଇଯିବ ବୋଲି ଲୋକେ ଅଭିଯୋଗ କରିଛନ୍ତି । ରାସ୍ତା ନିର୍ମାଣ କାର୍ଯ୍ୟର ତଦାରଖ କରୁଥିବା ସହକାରୀ ଯନ୍ତ୍ରୀ ବିନୋଦ କୁମାର ସିଆଳଙ୍କ ସହ ଯୋଗାଯୋଗ କରିଥିଲେ ମଧ୍ୟ ତାହା ସମ୍ଭବପର ହୋଇପାରି ନାହିଁ । ରାସ୍ତା ନିର୍ମାଣ କାର୍ଯ୍ୟର ତଦାରଖ କରିବା ସଠିକ୍ ମାନ ସାମଗ୍ରୀ ବ୍ୟବହାର କରିବା ପାଇଁ ଛଞ୍ଚିଣା, ତରପଦା, ମଲ୍ଲିକାପୁର, କସପା ଆଦି ପଞ୍ଚାୟତରୁ ଜନସାଧାରଣ ଦାବି କରିଛନ୍ତି । ଏହାର ଉଚ୍ଚସ୍ତରୀୟ ତଦନ୍ତ କରିବା ସହ କାର୍ଯ୍ୟକୁ ତଦାରଖ କରୁଥିବା ସରକାରୀ ଯନ୍ତ୍ରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବି କରିଛନ୍ତି । ଯଦି ତଦନ୍ତ ନହୁଏ ରାସ୍ତା ନିର୍ମାଣ ସମୟରେ ବହୁ ପଞ୍ଚାୟତବାସୀ ରାସ୍ତା ଉପରେ ଧାରଣା ଦେବେ ବୋଲି ଚେତାବନୀ ଦେଇଛନ୍ତି ।
ଏହି ଖବରଟିକୁ ପଢନ୍ତୁ-ଖୋର୍ଦ୍ଧା ଜିଲ୍ଲା ପୋଲିସ ବିଭାଗରେ ହଲଚଲ, ୧୩୯ ପୋଲିସଙ୍କୁ ବଦଳି କଲେ ଏସ୍ପି
