ଖନ୍ତାପଡ଼ା ୨୫/୦୩: ପୋଖରୀରେ ଗାଧୋଇବା ବେଳେ ନାବାଳକର ମୃତ୍ୟୁ ହୋଇଛି। ମୃତ ନାବାଳକ ହେଲେ ବାଲେଶ୍ବର ଜିଲ୍ଲା ଖନ୍ତାପଡ଼ା ଥାନା ଅଧୀନ ରେମୁଣା ବ୍ଲକ ବରୁଣସିଂ ପଞ୍ଚାୟତ ଟିଣା ଗ୍ରାମର ପ୍ରଦୀପ ଦଳେଇଙ୍କ ବଡ଼ ପୁଅ ଅଭିମାନ ଦଳେଇ।  ଘଟଣା କ୍ରମେ ଆଜି ସକାଳ ୧୧ ଘଟିକା ସମୟରେ ନିଜ ଜେଜେମାଙ୍କ ସହ ନିକଟସ୍ଥ ଏକ ପୋଖରୀକୁ ଗାଧୋଇବାକୁ ଯାଇଥିଲେ ଅଭିମାନ। ପୋଖରୀର ପାହାଚ ଖସଡା ରହିଥିବାରୁ ଜେଜେମାଙ୍କ ଆଖି ସାମ୍ନାରେ ନାତି ଅଭିମାନର ଗୋଡ଼ ଖସିଯାଇଥିଲା। ଜେଜେମା ପାଟି କରିବାରୁ ଗ୍ରାମର କିଛି ଲୋକ ଖୋଜା ଖୋଜି କରିଥିଲେ। କିଛି ସମୟ ପରେ ଅଭିମାନକୁ ମୁର୍ମୁଷ ଅବସ୍ଥାରେ ଉଦ୍ଧାର କରି ବାଇକ ଯୋଗେ ଖନ୍ତାପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ନିମନ୍ତେ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ। ନାବାଳକର ମୃତ୍ୟୁ ଖବର ପାଇବା ପରେ ଅଞ୍ଚଳରେ ଶୋକର ଛାୟା ଖେଳିଯାଇଛି। ମେଡିକାଲ ପକ୍ଷରୁ ଖନ୍ତାପଡ଼ା ଥାନାକୁ ଘଟଣା ବାବଦରେ ସୂଚନା ଦେବା ପରେ ମେଡିକାଲରେ ଏଏସଆଇ ଅମିତା ଦାସ ପହଂଚି ଶବ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଛେଦ ପାଇଁ ବାଲେଶ୍ୱର ମେଡିକାଲକୁ ପଠାଇଥିବା ଜଣା ପଡିଛି।