ନୂଆଦିଲ୍ଲୀ,୩୦/୬: ଲଗାଣ ବର୍ଷାରେ ବେହାଲ ରାଜଧାନୀ ଦିଲ୍ଲୀ। ଅବିଶ୍ରାନ୍ତ ବର୍ଷା ଯୋଗୁ ଚାରିଆଡ଼େ କେବଳ ପାଣି ହିଁ ପାଣି। ସହରର ବିଭିନ୍ନ ସ୍ଥାନରେ ସୃଷ୍ଟି ହୋଇଥିବା କୃତ୍ରିମ ବନ୍ୟାରେ ଅନେକଙ୍କ ଗଲାଣି ଜୀବନ । ସେହିପରି ଦିଲ୍ଲୀର ଓଖଲାରେ ଥିବା ଅଣ୍ଡର ପାସ୍‌ରେ ଜମି ଥିବା ପାଣିରେ ବୁଡ଼ି ଜଣେ ୬୦ ବର୍ଷୀୟ ବୃଦ୍ଧଙ୍କ ମୃତ୍ୟୁ ହୋଇଛି। ଲଗାଣ ବର୍ଷା ଯୋଗୁ ୨୪ ଘଣ୍ଟା ହେଲା ଓଖଲା ପାଣିରେ ବୁଡ଼ି ରହିଛି। ପାଣିରେ ବୁଡ଼ି ପ୍ରାଣ ହରାଇଥିବା ବୃଦ୍ଧ ଜଣଙ୍କ ହେଲେ ଜୈତପୁରର ଦିଗବିଜୟ କୁମାର ଚୌଧୁରୀ ବୋଲି ଜଣାପଡିଛି।

ଶୁକ୍ରବାର ସକାଳେ ଓଖଲା ଶଳ୍ପାଞ୍ଚଳ ଅଞ୍ଚଳ ପୁଲିସ୍‌କୁ ଫୋନ ମିଳିବା ପରେ ପୂରା ଘଟଣା ସାମ୍ନାକୁ ଆସିଥିଲା। ପୁଲିସ୍‌ ତୁରନ୍ତ ଘଟଣାସ୍ଥଳରେ ପହଞ୍ଚି ବୃଦ୍ଧଙ୍କୁ ଅଚେତ ଅବସ୍ଥାରେ ଉଦ୍ଧାର କରି ହସ୍ପିଟାଲ ନେଇଥିଲା। କିନ୍ତୁ ସେଠାରେ ଗତକାଲି ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଅଣ୍ଡର ପାସ୍‌ରେ ପାଣି ଜମି ରହିଥିବା ବେଳେ ଦିଗବିଜୟ ତାଙ୍କ ଟିଭିଏସ୍‌ ସ୍କୁଟିରେ ଏହାକୁ ଅତିକ୍ରମ କରୁଥିଲେ। ଏହି ସମୟରେ ସେ ସେଠାରେ ବୁଡ଼ି ଯାଇଥିବା କୁହାଯାଉଛି। ଅନ୍ୟପକ୍ଷରେ ଶନିବାର ମଧ୍ୟାହ୍ନରେ ଦିଲ୍ଲୀର ଶ୍ୟାମାପୁର ବାଡଲିରେ ଥିବା ଅଣ୍ଡପାସ୍‌ ପାଣିରେ ବୁଡ଼ି ୨ ଜଣ ପିଲାଙ୍କ ମୃତ୍ୟୁ ହୋଇଛି। ସେହିପରି ମେଟ୍ରୋ ନିକଟ ସିରାସପୁର ଅଣ୍ଡରପାସରେ ୩ରୁ ୪ଫୁଟ ପାଣି ଜମି ରହିଛି।