କୋଲକାତା: ନରେନ୍ଦ୍ର ମୋଦୀ ପୁଣି ଥରେ ଭାରତର ପ୍ରଧାନମନ୍ତ୍ରୀ ଭାବରେ ଶପଥ ନେବାକୁ ଯାଉଛନ୍ତି । ଜୁନ୍‌ ୯ (ରବିବାର)ରେ ଶପଥ ଗ୍ରହଣ ସମାରୋହ ଆୟୋଜିତ ହେବ । ମୋଦୀ ୩.୦ ସରକାରର ଶପଥ ଗ୍ରହଣ ପୂର୍ବରୁ ଟିଏମସି ମୁଖ୍ୟ ମମତା ବାନାର୍ଜୀ ବଡ଼ ଦାବି କରିଛନ୍ତି । ସେ କହିଛନ୍ତି, ‘ଏହି ସରକାର ବେଶୀ ଦିନ ତିଷ୍ଠି ପାରିବ ନାହିଁ ।କିଛି ଦିନ ଭିତରେ ବିଜେପିର ଅନେକ ନେତା ଦଳ ଛାଡ଼ିଦେବେ । ଅନେକ ବିଜେପିର ନେତା ଦୁଃଖି ଅଛନ୍ତି । ଏହି ସରକାର ଅଧିକ ଦିନ ଚାଲିପାରିବ ନାହିଁ ।’ 

 ନରେନ୍ଦ୍ର ମୋଦୀଙ୍କ ଶପଥ ଗ୍ରହଣ ସମାରୋହରେ ଟିଏମସି ସାମିଲ ହେବ କି ନାହିଁ ପ୍ରଶ୍ନରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ନା ନିମନ୍ତ୍ରଣ ମିଳିଛି ନା ଆମେ ଯିବୁ । ଟିଏମସି ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ସାମିଲ ହେବ ନାହିଁ । ସେ ଆହୁରି କହିଛନ୍ତି ଯେ, ଦେଶରେ ଅନେକ ପରିବର୍ତ୍ତନ ଜରୁରି । ଆମେ ଦେଶର ରାଜନୈତିକ ସ୍ଥିତି ଉପରେ ନଜର ରଖିଛୁ । ଯେଉଁଭଳି ଜନାଦେଶ ମିଳିଛି ଏଭଳି ସ୍ଥିତିରେ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା କଥା ନୁହେଁ । ଆଗକୁ ମମତା କହିଛନ୍ତି, ବର୍ତ୍ତମାନ ଇଣ୍ଡି ମେଣ୍ଟ ସରକାର ଗଢ଼ିବାକୁ ଦାବି କରିନାହିଁ। ଏହାର ଅର୍ଥ ନୁହେଁ ଯେ, ଆଗକୁ ଏଭଳି ଆମେ କରିବୁ ନାହିଁ ।

ଅନ୍ୟପଟେ ସିଏଏକୁ ନେଇ ବିଜେପି ଉପରେ ବର୍ଷିଛନ୍ତି ମମତା ବାନାର୍ଜୀ । ସେ କହିଛନ୍ତି, ସିଏଏକୁ ରଦ୍ଦ କରିବାକୁ ପଡ଼ିବ ।ସଂସଦରେ ଆମେ ଦାବି ଉଠାଇବୁ । ଅଣ ସାମ୍ବିଧାନିକ ଏବଂ ଅଣ ଆଇନ୍‌ସମ୍ମତ ପାର୍ଟିକୁ ସରକାର ଗଢ଼ିବା ଲାଗି ଶୁଭକାମନା ଦେଇପାରିବି ନାହିଁ , ମୋତେ କ୍ଷମା କରନ୍ତୁ ବୋଲି ମମତା କହିଛନ୍ତି । ଆମେ ଆପଣଙ୍କ ପାର୍ଟିକୁ ଭାଙ୍ଗିବୁ ନାହିଁ ବରଂ ଆପଣଙ୍କ ଦଳ ଭିତରୁ ଭାଙ୍ଗିଯିବ । ଆପଣଙ୍କ ଦଳର ନେତା ଖୁସିରେ ନାହାନ୍ତି ବୋଲି ଦାବି କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ।