କୋଲକାତା,୨୨।୪: ପଶ୍ଚିମବଙ୍ଗରେ ଶିକ୍ଷକ ଭର୍ତ୍ତି ବିବାଦ ବଢିବାରେ ଲାଗିଛି। ସୁପ୍ରିମକୋର୍ଟଙ୍କ ରାୟ ପରେ ପ୍ରାୟ ୨୫ ହଜାରରୁ ଅଧିକ ଶିକ୍ଷକ ଓ ଅନ୍ୟ କର୍ମଚାରୀଙ୍କ ନିଯୁକ୍ତି ରଦ୍ଦ କରି ଦିଆଯାଇଛି। ଏହାପରେ ଏବେ ଶିକ୍ଷକମାନେ ଏହା ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି। ସେପଟେ ମଙ୍ଗଳବାର ମୁଖ୍ୟମନ୍ତ୍ରୀ ମମତା ବାନାର୍ଜୀ ଶିକ୍ଷକଙ୍କୁ ସ୍କୁଲକୁ ଫେରିବାକୁ କହିଛନ୍ତି। ସେ କହିଛନ୍ତି, ସରକାର ତାଙ୍କ ବେତନର ବ୍ୟବସ୍ଥା କରିବେ।
ସୁପ୍ରିମକୋର୍ଟଙ୍କ ରାୟ ପରେ ନିଜର ଚାକିରୀ ହରାଇ ସାରିଥିବା ହଜାର ହଜାର ଶିକ୍ଷକ ପ୍ରଦର୍ଶନ କରୁଥିଲେ। ସଲ୍ଟ ଲେକ୍ରେ ପଶ୍ଚିମବଙ୍ଗ ସ୍କୁଲ ସେବା ଆୟୋଗ(ଡବ୍ଲୁବିଏସ୍ଏସ୍ସି) ମୁଖ୍ୟାଳୟ ବାହାରେ ମଙ୍ଗଳବାର ତାଙ୍କର ପ୍ରଦର୍ଶନ ଜାରି ରହିଛି। ମମତା ବାନାର୍ଜୀ କହିଛନ୍ତି, ଆପଣଙ୍କୁ ଏହି କଥାର ଚିନ୍ତା କରିବା ଦରକାର ନାହିଁ, କିଏ ଦାଗୀ ଓ କିଏ ନୁହେଁ। ଆପଣଙ୍କୁ କେବଳ ଏହି କଥାର ଚିନ୍ତା କରିବା ଦରକାର ଯେ, କ’ଣ ଆପଣଙ୍କ ପାଖରେ ଚାକିରୀ ଅଛି କି ନାହିଁ ? ଆପଣଙ୍କୁ ଠିକ୍ ସମୟରେ ବେତନ ମିଳୁଛି କି ନାହିଁ ? ଦାଗି ଓ ବେଦାଗୀ ଶିକ୍ଷକଙ୍କ ପରିଚୟ କରିଥିବା ସୂଚୀ ସରକାର ଓ କୋର୍ଟ ପାଖରେ ରହିଛି।’
ମମତା ମେଦିନାପୁରୀରେ ଏକ ପ୍ରଶାସନିକ କାର୍ଯ୍ୟକ୍ରମରେ କହିଛନ୍ତି, ଆମେ ଆଶ୍ବାସନା ଦେଉଛୁ ଯେ, ଆପଣଙ୍କ ଚାକିରୀ ଏବେ ସୁରକ୍ଷିତ ରହିଛି ଓ ଆପଣଙ୍କୁ ନିଜର ବେତନ ମିଳିବ। ଦୟାକରି ନିଜର ସ୍କୁଲକୁ ଫେରି ଯାଆନ୍ତୁ ଓ କ୍ଲାସ୍ ପୁଣିଥରେ ଆରମ୍ଭ କରନ୍ତୁ। ମୁଁ କାଲି ରାତିରୁ ବହୁବାର ଏନେଇ କଥା ହୋଇଛି। ମୁଁ ଆପଣଙ୍କ ସହ ଅଛି। ଚାକିରୀ ହରାଇଥିବା ଗ୍ରୁପ୍ ସି’ ଓ ଗ୍ରୁପ୍ ଡି’ କର୍ମଚାରୀଙ୍କ ପାଇଁ ଏକ ପୁନଃବିଚାର ଆବେଦନ ମଧ୍ୟ ସୁପ୍ରିମକୋର୍ଟଙ୍କ ନିକଟରେ ଦାଖଲ କରାଯିବ। ସେ ପର୍ଯ୍ୟନ୍ତ ଆପଣମାନେ ଆମ ଉପରେ ବିଶ୍ବାସ ରଖନ୍ତୁ।’
