ନୂଆଦିଲ୍ଲୀ,୨୨/୦୪: କିଛ ଦିନ ହେବ ଚର୍ଚ୍ଚାରେ ଅଛନ୍ତି ବିଜେପି ସାଂସଦ ନିଶିକାନ୍ତ ଦୁବେ । ସୁପ୍ରିମକୋର୍ଟ ଓ ପ୍ରଧାନବିଚାରପତିଙ୍କ ଉପରେ ବୟାନ ଦେଇ ବିବାଦରେ ଛନ୍ଦି ହୋଇଥିବା ନିଶିକାନ୍ତ ଦୁବେ ଏବେ ଆଉ ଏକ ବୟାନ ନେଇ ଚର୍ଚ୍ଚାକୁ ଆସିଛନ୍ତି । ନ୍ୟାୟପାଳିକାକୁ ଟାର୍ଗେଟ କରି କଂଗ୍ରେସକୁ ଘେରିଛନ୍ତି ନିଶିକାନ୍ତ ଦୁବେ । ୧୯୬୭ରୁ ୬୮ ମଧ୍ୟରେ ଦେଶର ପ୍ରଧାନ ବିଚାରପତି ଥିବା କୈଳାଶନାଥ ବାଞ୍ଚୁ ଓକିଲାତି ପାଠ ପଢିନାହାନ୍ତି ବୋଲି କହିଛନ୍ତି ନିଶିକାନ୍ତ ।
ଏମିତି ହେଲେ ସିଜେଆଇ- ୧୯୦୩ ମସିହା ଫେବୃଆରୀ ୨୫ରେ ମଧ୍ୟପ୍ରଦେଶର ଜନ୍ମ ଗ୍ରହଣ କରିଥିଲେ ଜଷ୍ଟିସ୍ କୈଳାଶନାଥ ବାଞ୍ଚୁ । ସେ ଆଇସିଏସ ଅଧିକାରୀ ଥିଲେ । ୧୯୨୪ରେ ସିଭିଲ ସର୍ଭିସ ପରୀକ୍ଷାରେ କୃତକାର୍ଯ୍ୟ ହୋଇଥିଲେ । ଟ୍ରେନିଂ ସାରିବା ପରେ ସେ ଲଣ୍ଡନ ଯାଇଥିଲେ । ଭାରତୀୟ ସମ୍ବିଧାନ ମୁତାବିକ କୌଣସି ବ୍ୟକ୍ତିଙ୍କୁ ବିଚାରପତି କିମ୍ବା ମୁଖ୍ୟ ବିଚାରପତି ହେବାକୁ ହେଲେ ଓକିଲାତି ଡିଗ୍ରୀ ହାସଲ କରିବା ଜରୁରୀ ।ଜଷ୍ଟିସ୍ କୈଳାଶନାଥ ସିଜେଆଇ ହେବାର କାହାଣୀ ବଡ଼ ରୋମାଞ୍ଚର । କିଛି ବର୍ଷ ଧରି ଜିଲ୍ଲାପାଳ ଭାବେ କାର୍ଯ୍ୟ କରିବା ପରେ ୧୯୩୭ରେ ତାଙ୍କୁ ଜିଲ୍ଲା ଜଜ୍ ଭାବେ ନିଯୁକ୍ତି ମିଳିଥିଲା । ସ୍ୱାଧୀନତା ପରେ ୧୯୪୭ରେ ତାଙ୍କୁ ଆହ୍ଲାବାଦ ହାଇକୋର୍ଟରେ କାମଚଳା ବିଚାରପତି ଭାବେ ନିଯୁକ୍ତି ମିଳିଥିଲା । ଏହାପରେ ତାଙ୍କର ବଦଳି ରାଜସ୍ଥାନ ହାଇକୋର୍ଟକୁ ହୋଇଥିଲା । ୧୯୫୬ରେ ନ୍ୟୁ ରାଜସ୍ଥାନ ହାଇକୋର୍ଟର ମୁଖ୍ୟ ବିଚାରପତି ଭାବେ ନିଯୁକ୍ତ କରାଯାଇଥିଲା । ରିପୋର୍ଟ ଅନୁସାରେ ୧୯୬୭ ଏପ୍ରିଲ ୧୧ରେ ଜଷ୍ଟିସ କୈଳାଶନାଥ ବାଞ୍ଚୁଙ୍କ ଜୀବନ ପାଇଁ ଗୁରୁତ୍ୱପୂର୍ଣ୍ଣ ଥିଲା । ତତ୍କାଳୀନ ସିଜେଆଇ ରାଷ୍ଟ୍ରପତି ନିର୍ବାଚନ ପାଇଁ ପଦରୁ ଇସ୍ତଫା ଦେଇଥିଲେ । ଏହା ପରେ ବାଞ୍ଚୁଙ୍କୁ ଦେଶର ୧୦ମ ସିଜେଆଇ ଭାବରେ ନିଯୁକ୍ତ କରାଯାଇଥିଲା । ୧୯୬୭ ଏପ୍ରିଲ ୨୪ରେ ଦେଶର ମୁଖ୍ୟ ବିଚାରପତି ପଦ ସମ୍ଭାଳିଥିଲେ । ୧୦ ମାସ ଯାଏ ସିଜେଇ ପଦରେ ନିଯୁକ୍ତ ହୋଇଥିଲେ । ୧୯୬୮ ମସିହା ୨୪ ଫେବୃଆରୀରେ ଅବସର ଘୋଷଣା କରିଥିଲେ । କାର୍ଯ୍ୟକାଳ ଭିତରେ ସେ ୩୫୫ ମାମଲାର ରାୟ ଶୁଣାଇଛନ୍ତି । ଏହାପରେ ଜଷ୍ଟିସ ମହମ୍ମଦ ହିଦାୟତୁଲ୍ଲାହ ପରବର୍ତ୍ତୀ ସିଜେଇ ହୋଇଥିଲେ ।
क्या आपको पता है कि 1967-68 में भारत के मुख्य न्यायाधीश कैलाशनाथ वांचू जी ने क़ानून की कोई पढ़ाई नहीं की थी ।
— Dr Nishikant Dubey (@nishikant_dubey) April 21, 2025
ଘେରିଲେ ନିଶିକାନ୍ତ ଦୁବେ- ସୋମବାର ସାଂସଦ ନିଶିକାନ୍ତ ଦୁବେ ସୋସିଆଲ ମିଡିଆ ଏକ୍ସରେ ଏକ ପୋଷ୍ଟ ଜାରି କରିଛନ୍ତି । ସେଥିରେ ସେ ଲେଖିଛନ୍ତି,କଣ ତୁମକୁ ଜଣାଅଛି ୧୯୬୭ରୁ ୬୮ ମଧ୍ୟରେ ଦେଶର ପ୍ରଧାନ ବିଚାରପତି ଥିବା କୈଳାଶନାଥ ବାଞ୍ଚୁ ଓକିଲାତିି ପାଠ ପଢିନାହାନ୍ତି ।
କହି ରଖୁଛୁ କି, ବିଜେପି ସାଂସଦ ନିଶିକାନ୍ତ ଦୁବେ ସର୍ବୋଚ୍ଚ ଅଦାଲତଙ୍କୁ ଟାର୍ଗେଟ କରି ବିବାଦୀୟ ବୟାନ ଦେଇଥିଲେ । ସୁପ୍ରିମକୋର୍ଟ ଯଦି ସଂସଦ ଭଳି କାମ କରିବେ ତେବେ ସଂସଦକୁ ବନ୍ଦ କରିଦେବା ଆବଶ୍ୟକ । ଦେଶରେ ସାମ୍ପ୍ରଦାୟିକ ହିଂସା ସୃଷ୍ଟି ପାଇଁ ସ୍ରୁପ୍ରିମକୋର୍ଟ ଦାୟୀ । ସୁପ୍ରିମକୋର୍ଟ ସୀମା ବାହାରକୁ ଚାଲି ଯାଇଛନ୍ତି କହିଥିଲେ ସାଂସଦ ନିଶିକାନ୍ତ ଦୁବେ । ଅବମାନନା ମକଦ୍ଦମା ଦାୟର କରିବାକୁ ଦାବି ହୋଇଥିଲା ।
