ମୁମ୍ବାଇ: ମହାରାଷ୍ଟ୍ରର ସ୍ବାଧୀନ ବିଧାୟକ ଦେବେନ୍ଦ୍ର ଭୁୟାର ମହିଳାଙ୍କ ଉପରେ ମନ୍ତବ୍ୟ ଦେଇ ବିବାଦ ଘେରକୁ ଆସିଛନ୍ତି । ଅମରାବତୀର ଏକ ଜନସଭାକୁ ସମ୍ବୋଧନ ଅବସରରେ ସେ ଦେଇଥିବା ମନ୍ତବ୍ୟକୁ ନେଇ ଏବେ ରାଜନୀତି ଜୋର ଧରିଛି । ଭୁୟାର ଜଣେ ସ୍ବାଧୀନ ବିଧାୟକ ହୋଇଥିବା ବେଳେ ସେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାଓ୍ବାରଙ୍କ ସମର୍ଥକ । ସେ କହିଛନ୍ତି ଯେ, ଜଣେ ଚାଷୀଙ୍କ ପୁଅ ନିଜ ପସନ୍ଦର କନିଆ ପାଉନାହାନ୍ତି । କାରଣ ସୁନ୍ଦରୀ ମହିଳା ଜଣେ ଭଲ ଚାକିରି କରିଥିବା ବ୍ୟକ୍ତିଙ୍କୁ ବାଛୁଛନ୍ତି । 

ବୁଧବାର ଅମରାବତୀରେ ଆୟୋଜିତ ଏକ ଜନସଭାକୁ ସମ୍ବୋଧନ ଅବସରରେ ଭୁୟାର କହିଛନ୍ତି, ‘ଯଦି ଜଣେ ମହିଳା ସୁନ୍ଦରୀ ସେ ଆପଣ କିମ୍ବା ମୋ ଭଳି ଲୋକଙ୍କୁ ପସନ୍ଦ କରିବେ ନାହିଁ । ଚାକିରି କରିଥିବା ଲୋକଙ୍କୁ ସେ ପସନ୍ଦ କରିବେ ।’ ସେ ଏଭଳି ମହିଳାଙ୍କୁ ‘First Rate’ ଶ୍ରେଣୀରେ ସାମିଲ କରିଛନ୍ତି । ସେ ଆହୁରି କହିଛନ୍ତି, ସେକଣ୍ଡ ରେଟ୍‌ ମହିଳା ଛୋଟ ବ୍ୟବସାୟୀଙ୍କୁ ପସନ୍ଦ କରୁଛନ୍ତି ଏବଂ ଥାର୍ଡ ରେଟ୍‌ ମହିଳା ଚାଷୀର ପୁଅକୁ ବିବାହ କରୁଛନ୍ତି । 

ବିଧାୟକଙ୍କ ଏହି ମନ୍ତବ୍ୟକୁ ନେଇ ବିବାଦ ମୁଣ୍ଡ ଟେକିଛି । ମହିଳା ଏବଂ ଚାଷୀକୂଳ ପ୍ରତି ଏହା ଅପମାନସୂଚକ ମନ୍ତବ୍ୟ ବୋଲି ବିରୋଧୀ ନେତା ଯୁକ୍ତି ବାଢ଼ିଛନ୍ତି । କଂଗ୍ରେସ ନେତ୍ରୀ ଏବଂ ପୂର୍ବତନ ମହିଳା ଓ ଶିଶୁ ବିକାଶ ମନ୍ତ୍ରୀ ଯଶୋମତୀ ଠାକୁର କହିଛନ୍ତି ଯେ, ମହିଳାଙ୍କୁ ଏଭଳି ଶ୍ରେଣୀଭୁକ୍ତ କରିବା ଗ୍ରହଣୀୟ ନୁହେଁ । ଅଜିତ ପାଓ୍ବାର ଏବଂ ଯେଉଁମାନେ ଶାସନରେ ଅଛନ୍ତି ସେମାନେ ସେମାନଙ୍କ ବିଧାୟକଙ୍କୁ ନିୟନ୍ତ୍ରଣରେ ରଖିବା ଦରକାର ବୋଲି ସେ କହିଛନ୍ତି । ସେପଟେ ସମାଲୋଚନା ପରେ ଭୁୟାରଙ୍କ ପ୍ରତିକ୍ରିୟା ମିଳିପାରି ନାହିଁ ।