ମୁମ୍ବାଇ: ମହାରାଷ୍ଟ୍ରରେ ରାଜନୈତିକ ଦଳଙ୍କ ଅପେକ୍ଷାର ଅନ୍ତ ଘଟାଇ ନିର୍ବାଚନ ଆୟୋଗ ନିର୍ବାଚନ ତାରିଖ ଘୋଷଣା କରିଛନ୍ତି । ୨୮୮ ଆସନ୍ ବିଶିଷ୍ଟ ମହାରାଷ୍ଟ୍ର ବିଧାନସଭା ନିର୍ବାଚନ ନଭେମ୍ବର ୨୦ରେ ଅନୁଷ୍ଠିତ ହେବାକୁ ଯାଉଥିବା ବେଳେ ନଭେମ୍ବର ୨୩ରେ ଭୋଟ ଗଣତି ହେବ । ନିର୍ବାଚନୀ ବିଗୁଲ ବାଜିବା ପରେ ଅଜିତ ପାଓ୍ବାରଙ୍କ ଏନସିପି ଶିବିରରେ ଖୁସିର ପରିବେଶ ସୃଷ୍ଟି ହୋଇଛି । ଏନସିପିର ରାଜ୍ୟସଭା ସାଂସଦ ପ୍ରଫୁଲ ପଟେଲ କହିଛନ୍ତି, ‘ଭଲ କାମକୁ ଦେଖି ଲୋକେ ଭୋଟ୍ ଦେବେ ବୋଲି ମୋର ବିଶ୍ବାସ ରହିଛି ।’
ନ୍ୟୁଜ ଏଜେନ୍ସି ଏଏନଆଇକୁ ପ୍ରଫୁଲ ପଟେଲ କହିଛନ୍ତି ଯେ, ‘ମହାରାଷ୍ଟ୍ରରେ ନିର୍ବାଚନ ଅନୁଷ୍ଠିତ ହେବ । ନଭେମ୍ବର ୨୬ ପୂର୍ବରୁ ବିଧାନସଭା ଗଠନ ହେବା ଜରୁରି । ନିର୍ବାଚନ ଆୟୋଗ ଆଜି ତାରିଖ ଘୋଷଣା କରିଥିବାରୁ ମୁଁ ବହୁତ ଖୁସି । ନଭେମ୍ବର ୨୦ରେ ମତଦାନ ଏବଂ ନଭେମ୍ବର ୨୩ରେ ମତଗଣନା ହେବ ।’
ସାଂସଦ ପ୍ରଫୁଲ ପଟେଲ ଦାବି କରିଛନ୍ତି ଯେ, ମହାରାଷ୍ଟ୍ରରେ ପୁଣି ଥରେ ମୟାୟୁତି (ବିଜେପି, ଶିବସେନା ଓ ଏନସିପି) ସରକାର ଗଠନ ହେବ । ମହାରାଷ୍ଟ୍ରର ଲୋକେ ବିକାଶ, ଭଲ କାର୍ଯ୍ୟ ଏବଂ ନିଶ୍ଚିତ ରୂପେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ବକୁ ଭୋଟ ଦେବେ । ଏଥିପାଇଁ ଏନଡିଏକୁ ଲଗାତାର ତୃତୀୟ ଥର ବିଜୟ ମିଳିଛି । ହରିୟାଣା ଏବଂ ଜମ୍ମୁକାଶ୍ମୀରରେ ଏହାର ପ୍ରତିଫଳନ ମଧ୍ୟ ଦେଖିବାକୁ ମିଳିଛି ବୋଲି ପ୍ରଫୁଲ ପଟେଲ କହିଛନ୍ତି।
ସେ ଆହୁରି କହିଛନ୍ତି ଯେ, ‘ଲୋକମାନେ ଭଲ କାମ, ବିକାଶ ଏବଂ ଲୋକାଭିମୁଖୀ ଯୋଜାନା ଲାଗି ଭୋଟ ଦେଉଛନ୍ତି । ଏଥିପାଇଁ ମୋତେ ଲାଗୁଛି ମହାରାଷ୍ଟ୍ରରେ ପୁଣି ଥରେ ଆମ ସରକାର ଆସିବ। ’ ସେପଟେ ଆସନ ବୁଝାମଣାକୁ ନେଇ ପ୍ରଫୁଲ ପଟେଲ କହିଛନ୍ତି, ଏନେଇ ବହୁ କଳ୍ପନା ଜଳ୍ପନା ଲାଗିରହିଛି । କିନ୍ତୁ କୌଣସି ମତଭେଦ ହେବ ନାହିଁ ବୋଲି ବିଶ୍ବାସ । ଆସନ୍ତା ୩ରୁ ୪ ଦିନ ଭିତରେ ଆସନ ବୁଝାମଣା ଶେଷ ହୋଇଯିବ ।
