ଘଟଗାଁ, ୦୯/୦୪: ଅନ୍ତ ହେଲା ବର୍ଷକର ଅପେକ୍ଷା । ମିଳିଛି ମା’ଙ୍କ ଅପରୂପ ଦର୍ଶନ । ୭ ଦିନ ଧରି ଚାଲିବ ଏହି ମହାଆୟୋଜନ । ଏହାକୁ ନେଇ ସବୁରି ମନରେ ଆନନ୍ଦ, ଉଲ୍ଲାସ ଆଉ ଅସୁମାରୀ ଉତ୍ସାହ । ପ୍ରସିଦ୍ଧ ଶକ୍ତିପୀଠ ଘଟଗାଁ ମା’ ତାରିଣୀ ପୀଠରେ ଆଜି ଠାରୁ ଆରମ୍ଭ ହୋଇଛି ୮୯ତମ ଚଇତି ପର୍ବ । ଦୁଃଖ ହାରିଣୀ, ସଙ୍କଟ ନାଶିନୀ, ନଡ଼ିଆ ରାଣୀ କେନ୍ଦୁଝର ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ତାରିଣୀଙ୍କୁ ଦର୍ଶନ କରି ଆଶିଷ ଭିକ୍ଷା କରିଛନ୍ତି ଶ୍ରଦ୍ଧାଳୁ । ମନ୍ଦିର ପ୍ରଶାସନ ପକ୍ଷରୁ ପୂର୍ବ ବର୍ଷ ଠାରୁ ଆହୁରି ଆଡମ୍ବରରେ ସମସ୍ତ ବ୍ୟବସ୍ଥା କରାଯାଇଛି ।
ଚଳିତ ବର୍ଷ ଚଇତି ପର୍ବର ସୁପରିଚାଳନା ପାଇଁ ଘନ ଘନ ବୈଠକ ହୋଇଥିଲା । ବୈଠକରେ ହୋଇଥିବା ନିଷ୍ପତି ଅନୁସାରେ ସମସ୍ତ କାର୍ଯ୍ୟକ୍ରମ ସ୍ଥିରିକୃତ ହୋଇଥିବା ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ସୂଚନା ଦେଇଛନ୍ତି । ସୁନ୍ଦରଗଡ ଜିଲ୍ଲା ରାଉରକେଲା ନିକଟସ୍ଥ ବସୁଆଁ ଗ୍ରାମର ବାସିନ୍ଦା ତଥା ବାସୁକିନାଥ ରୋଡୱେଜ, ମା’ ତାରିଣୀ ଆଣ୍ଡ୍ କୋର ପ୍ରୋପାଇଟର ବଜରଙ୍ଗ ଅଗ୍ରୱାଲା ମଙ୍ଗଳବାର ଘଟଗାଁ ମା’ ତାରିଣୀଙ୍କ ଉଦ୍ଦେଶ୍ୟରେ ୫୦ ଲକ୍ଷ ଟଙ୍କାରେ ତିଆରି ଏକ ସ୍ୱର୍ଣ୍ଣ ମୁକୁଟ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ସଞ୍ଜୀବ ମହାପାତ୍ରଙ୍କୁ ପ୍ରଦାନ କରିଛନ୍ତି । ଏହା ବ୍ୟତୀତ ସୁନାରେ ତିଆରି ଅନ୍ୟ ଆଭୂଷଣ ଯଥା-ଆଖି ପତା, ନାକ ଗୁଣା, କାନଫୁଲ, ମଥା ବିନ୍ଦି, ମା’ଙ୍କ ଅଙ୍ଗବସ୍ତ୍ର ସହି ସମସ୍ତ ପୂଜକଙ୍କ ଲାଗି ନୂତନ ବସ୍ତ୍ର ମଧ୍ୟ ପ୍ରଦାନ କରିଛନ୍ତି । ଚଇତି ପର୍ବର ପ୍ରଥମ ଦିନରେ ମା’ ତାରିଣୀଙ୍କୁ ଏହି ସ୍ୱର୍ଣ୍ଣ ମୁକୁଟ ପିନ୍ଧାଇବା ଲାଗି ଅନୁରୋଧ କରିଛନ୍ତି ଶ୍ରୀ ଅଗ୍ରୱାଲ । ସୂଚନାଯୋଗ୍ୟ ଯେ, ଚଳିତ ବର୍ଷ ଚଇତି ପର୍ବର ୭ ଦିନରେ ୭ ଜଣ ଦାତବ୍ୟ ବ୍ୟକ୍ତି ହଜାର ହଜାର ଶ୍ରଦ୍ଧାଳୁଙ୍କୁ ଅନ୍ନ ପ୍ରସାଦ ବିତରଣ କରିବେ । କିନ୍ତୁ ପ୍ରସ୍ତୁତ ହେବା ପରେ ସର୍ବପ୍ରଥମେ ଅନ୍ନ ପ୍ରସାଦକୁ ଯାଞ୍ଚ କରାଯିବ ।
