ବ୍ରହ୍ମପୁର,୨୬ା୩(ବ୍ୟୁରୋ): ଗଞ୍ଜାମ ଜିଲ୍ଲା କେ.ନୂଆଗାଁ ଥାନା ଚୌଧୁରୀ ଟିକରପଡ଼ା ଗ୍ରାମରେ ୨୦୨୩ ଜାନୁଆରୀ ୮ରେ ମାନସିକ ଅନଗ୍ରସର ଯୁବତୀ ବିଷ୍ଣୁପ୍ରିୟା ସାହୁ(୩୮) ଙ୍କୁ ହତ୍ୟା ମାମଲାରେ ସେହି ଗ୍ରାମର ରୁବିତା ଅଧିକାରୀ (୪୮)ଙ୍କୁ ଆଜୀବନ ଜେଲ ଦଣ୍ଡାଦେଶ କରିଛନ୍ତି ଗଞ୍ଜାମ ଜିଲ୍ଲା ଓ ଦୌରା ଜଜ୍ ରୂପଶ୍ରୀ ଚୌଧୁରୀ । ଏହାସହିତ ୧୫ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ । ହତ୍ୟା ମାମଲାର ମୁଖ୍ୟ ଅଭିଯୁକ୍ତ ରୁବିତାଙ୍କ ସହଯୋଗୀ ତଥା ତାଙ୍କ ପ୍ରେମିକ ପଦ୍ମନ ସାହୁ(୪୨) ପ୍ରମାଣ ଅଭାବରୁ ନିର୍ଦୋଷରେ ଖଲାସ ହୋଇଛନ୍ତି ।
୨୦୨୩ ଜାନୁଆରୀ ୮ ତାରିଖରେ ଚୌଧୁରୀ ଟିକରପଡ଼଼ାର ବାସୁ ସାହୁଙ୍କ ଭିନ୍ନକ୍ଷମ ଝିଅ ବିଷ୍ଣୁପ୍ରିୟା ରାତ୍ରିଭୋଜନ ପରେ ଭଉଣୀ ଘରକୁ ଯାଇଥିଲେ । କିନ୍ତୁ ଭଉଣୀ ଘରେ ପହଞ୍ଚିନଥିଲେ । ପରିବାର ଲୋକ ଖୋଜାଖୋଜି କରିଥିଲେ । ୯ତାରିଖ ରାତି ୧୦ ଟାରେ ତାଙ୍କ ପଡୋଶୀ ଘର ବାରିପଟେ ତାଙ୍କ ଶବ ମିଳିଥିଲା । କେ.ନୂଆଗାଁ ପୁଲିସ ପ୍ରଥମେ ରୁବିତା ଅଧିକାରୀ ଓ ପରେ ତାଙ୍କ ପ୍ରେମିକ ପଦ୍ମନ ସାହୁଙ୍କୁ ଗିରଫ କରିଥିଲା । ଜେରା ବେଳେ ସେମାନେ ବିଷ୍ଣୁପ୍ରିୟାଙ୍କୁ ହତ୍ୟା କରିଥିବା ସ୍ୱୀକାର କରିଥିଲେ । ଉଭୟଙ୍କ ଅନୈତିକ ସମ୍ପର୍କ ସେ ଜାଣିଥିବାରୁ ତାଙ୍କୁ ହତ୍ୟା କରିଥିଲୁ ବୋଲି ସେମାନେ ପୁଲିସକୁ କହିଥିଲେ । ମାମଲାର ବିଚାରଣା ବେଳେ ୧୭ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା । ସାକ୍ଷୀମାନଙ୍କ ବୟାନ ଆଧାର କରି ଜଜ୍ ରାୟ ପ୍ରକାଶ କରିଛନ୍ତି । ସରକାରଙ୍କ ପକ୍ଷରୁ ପବ୍ଲିକ ପ୍ରସିକ୍ୟୁଟର ତ୍ରିଲୋଚନ ପରିଡ଼ା ମକଦ୍ଦମା ପରିଚାଳନା କରିଥିଲେ ।
