ନୂଆଦିଲ୍ଲୀ: ଦିଲ୍ଲୀର ଲାଲକିଲ୍ଲା ଏବଂ ଜାମା ମସଜିଦକୁ ବୋମା ମାଡ଼ କରି ଉଡାଇ ଦେବାକୁ ଧମକ ମିଳିଛି । ଦିଲ୍ଲୀ ପୋଲିସ କହିଛି ଯେ ଯେତେବେଳେ ଏହାକୁ ନେଇ କଲ୍ ଯାଞ୍ଚ କରାଯାଇଥିଲା, ସେତେବେଳେ କିଛି ସନ୍ଦିଗ୍ଧ ମିଳିନଥିଲା ଏବଂ ଏହା ଏକ ମିଥ୍ୟା କଲ୍ ଥିଲା। ଏହି କଲ୍ ପାଇବା ପରେ ତୁରନ୍ତ ଗୁରୁବାର ସକାଳେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ଦିଲ୍ଲୀ ଅଗ୍ନିଶମ ସେବା କହିଛି ଯେ ସକାଳ ୯.୩୦ରେ ଜାମା ମସଜିଦ ଏବଂ ଲାଲକିଲ୍ଲାରେ ବୋମା ଧମକ ବିଷୟରେ ଏକ ଫୋନ୍ ଆସିଥିଲା। ଏହା ପରେ, ସେଠାରେ ଏକ ଅନୁସନ୍ଧାନ କରାଯାଇଥିଲା।

ଦିଲ୍ଲୀ ପୋଲିସ ତାର ବିବୃତ୍ତିରେ କହିଛି ଯେ, କଲ୍ ପାଇବା ପରେ, ବୋମା ନିଷ୍କ୍ରିୟକାରୀ ଦଳ ଏବଂ CISF ଦଳ ସମଗ୍ର ପରିସରକୁ ଭଲ ଭାବରେ ଯାଞ୍ଚ କରିଥିଲେ କିନ୍ତୁ କିଛି ସନ୍ଦେହଜନକ ମିଳିନଥିଲା।

ଦିଲ୍ଲୀରେ ବୋମା ଧମକ ଦିଆଯିବା ଏହା ପ୍ରଥମ ଘଟଣା ନୁହେଁ। ନିକଟ ଅତୀତରେ ମଧ୍ୟ ବୋମା ଧମକ ସମ୍ପର୍କିତ କଲ୍ ବୃଦ୍ଧି ପାଇଛି । ସ୍କୁଲ ଏବଂ ବିମାନ ଉପରେ ବୋମା ପକାଇବା ଧମକପୂର୍ଣ୍ଣ ଅନେକ କଲ୍ ଏପର୍ଯ୍ୟନ୍ତ ଆସିସାରିଛି।

ଫେବୃଆରୀ ମାସରେ ହିଁ ଦିଲ୍ଲୀ ଏବଂ ନୋଏଡାର ସ୍କୁଲ ଗୁଡ଼ିକୁ ବୋମା ଧମକ ମିଳିଥିଲା। ଜାନୁଆରୀ ୧୦ ତାରିଖରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଥିଲା ଯେତେବେଳେ ଜଣେ ଦ୍ୱାଦଶ ଶ୍ରେଣୀ ଛାତ୍ର ୨୩ଟି ସ୍କୁଲକୁ ବୋମା ଧମକପୂର୍ଣ୍ଣ ଇମେଲ୍ ପଠାଇଥିଲେ। ଆଉ ପରେ ସେ ଦିଲ୍ଲୀରେ ଧରାପଡ଼ିଥିଲେ।