ନୂଆଦିଲ୍ଲୀ : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଗୁରୁବାର ରାଜ୍ୟପାଳ ସି.ଭି. ଆନନ୍ଦ ବୋଷଙ୍କୁ ଅନୁରୋଧ କରି, ମୁର୍ଶିଦାବାଦ ଗସ୍ତ ସ୍ଥଗିତ କରିବାକୁ କହିଥିଲେ। ମୁର୍ଶିଦାବାଦ ପଶ୍ଚିମବଙ୍ଗର ଏକ ଜିଲ୍ଲା , ଯାହା ସଦ୍ୟ ନୂଆ ପ୍ରଣିତ ୱାକଫ ସଂଶୋଧନ ଆଇନକୁ ନେଇ ସାଂପ୍ରଦାୟିକ ସଂଘର୍ଷରେ ଥରି ଉଠିଥିଲା।
ମୁର୍ଶିଦାବାଦ ଦଙ୍ଗାରେ ୩ଜଣ ଲୋକଙ୍କର ଜୀବନ ଚାଲିଯାଇ ଥିବାବେଳେ ଅନେକ ଆହତ ହୋଇଛନ୍ତି। ରାଜ୍ୟ ସଚିବାଳୟ ନବାନ୍ନରୁ ନିଜ ବକ୍ତବ୍ୟରେ ମମତା ଅଣ-ସ୍ଥାନୀୟ ଲୋକଙ୍କୁ ମୁର୍ଶିଦାବାଦ ନଆସିବାକୁ ଅନୁରୋଧ କରିଥିଲେ। ପିଟିଆଇ ତାଙ୍କ କଥାକୁ ଉଦ୍ଧୃତ କରି କହିଛି , ମୁଁ ରାଜ୍ୟପାଳଙ୍କୁ ଆଉ କିଛି ଅପେକ୍ଷା କରିବାକୁ ଅପିଲ କରିବି, କାରଣ ବିଶ୍ୱାସ ପୁନଃ ସ୍ଥାପନ କରିବାକୁ ଚେଷ୍ଟା ଜାରି ରହିଛି। ସ୍ଥିତି ଧିରେ ଧିରେ ସାଧାରଣ ହେଉଛି। ମମତାଙ୍କ ଏହି ଅପିଲ ରାଜ୍ୟପାଳ ବୋଷଙ୍କ ଦ୍ୱାରା ଶୁକ୍ରବାର ମୁସଲିମ୍ ବହୁଳ ଜିଲ୍ଲାରେ ସ୍ଥିତିର ସମୀକ୍ଷା କରିବା ପାଇଁ ମୁର୍ଶିଦାବାଦ ଯିବାର ଘୋଷଣା ପରେ ଆସିଛି।
ମୁଖ୍ୟମନ୍ତ୍ରୀ କହିଛନ୍ତି ଯେ, ସେ ରାଜନୀତିକ ବିବାଦକୁ ଏଡେଇବା ପାଇଁ ବର୍ତ୍ତମାନ ପ୍ରଭାବିତ ଅଞ୍ଚଳ ଗସ୍ତ ନକରିବାକୁ ନିଷ୍ପତ୍ତି ନେଇଛନ୍ତି। ମମତା ବାନାର୍ଜୀଙ୍କ ଅନୁରୋଧ ସତ୍ତ୍ୱେ ରାଜ୍ୟପାଳ ବୋଷ୍ କହିଛନ୍ତି ସେ ଗ୍ରାଉଣ୍ଡ ସ୍ଥିତିର ସମୀକ୍ଷା କରିବାକୁ ଜିଲ୍ଲାର ଗସ୍ତ କରିବାକୁ ଚାହାନ୍ତି।
କୋଲକାତାରେ କିଛି ହିଂସା ପୀଡ଼ିତଙ୍କୁ ଭେଟିବା ପରେ ସେ ସାମ୍ୱାଦିକଙ୍କୁ କହିଛନ୍ତି , ମୁଁ ନିଶ୍ଚିତ ଭାବେ ମୁର୍ଶିଦାବାଦ ଗସ୍ତ କରିବି। ମୁଁ ନିଜେ ବାସ୍ତବିକତାକୁ ଦେଖିବା ପାଇଁ ଅଞ୍ଚଳକୁ ଯିବି। ମୁଁ ମାମଲାକୁ ବସ୍ତୁନିଷ୍ଟ ଦୃଷ୍ଟିକୋଣରେ ଦେଖିବି। ସ୍ଥିତିକୁ ନିୟନ୍ତ୍ରଣକୁ ଅଣାଯାଇଛି। ଆମକୁ ଭବିଷ୍ୟତରେ ଏମିତି ଘଟଣାକୁ ରୋକିବା ପାଇଁ ଆହୁରି ପଦକ୍ଷେପ ନେବା ଉଚିତ୍। ସଂପୃକ୍ତ ଅଞ୍ଚଳର ଲୋକେ ସେଠାରେ ବିଏସଏଫ୍ କ୍ୟାମ୍ପର ଦାବି କରିଛନ୍ତି।
ଅନ୍ୟପଟେ ମମତା ବାନାର୍ଜୀ କହିଛନ୍ତି , ମୁର୍ଶିଦାବାଦ ହିଂସାର ଯାଞ୍ଚ ପାଇଁ ପୂର୍ବରୁ ହିଁ ଏକ ସ୍ୱତନ୍ତ୍ର ଯାଞ୍ଚ ଦଳ ( ଏସଆଇଟି)ର ଗଠନ କରାଯାଇ ସାରିଛି। ମମତା କହିଛନ୍ତି ସେ ମୁର୍ଶିଦାବାଦ ହିଂସା ପ୍ରଭାବିତ ପୀଡ଼ିତଙ୍କ ଘରେ ପୁନର୍ନିର୍ମାଣ କରିବେ। ମମତା ଆହୁରି ମଧ୍ୟ କହିଛନ୍ତି ପ୍ରଶାସନ ମୁର୍ଶିଦାବାଦର ଲୋକଙ୍କ ବିଶ୍ୱାସ ପୁନଃସ୍ଥାପନ କରିବାକୁ ପ୍ରୟାସ କରୁଛି।
