ନୂଆଦିଲ୍ଲୀ: ଉତ୍ତର ପ୍ରଦେଶର ଗ୍ରେଟର ନୋଏଡାରେ ଏକ ହୃଦୟ ବିଦାରକ ଏବଂ ନିଷ୍ଠୁର ଘଟଣା ସାମ୍ନାକୁ ଆସିଛି। ଯେଉଁଠାରେ ଜଣେ ବ୍ୟକ୍ତି ନିଜ ପଡ଼ୋଶୀଙ୍କ ପୋଷା ଜର୍ମାନ ସେଫାର୍ଡ କୁକୁରକୁ ଗାଡ଼ିରେ ବାନ୍ଧି ପ୍ରାୟ ୧୨ କିଲୋମିଟର ଘୋଷାରି ନେଇଛନ୍ତି। ଏହି ଘଟଣା ଦାଙ୍କାଉର ଅଞ୍ଚଳରେ ଘଟିଥିବା ଜଣାପଡ଼ିଛି।

ପୋଲିସ ସୂଚନା ଅନୁଯାୟୀ, ଅଭିଯୁକ୍ତଙ୍କ ପୁଅ ଉପରେ କୁକୁରଟି ଭୁକିଥିଲା। ଯାହା ଫଳରେ ସେ ଭୟଭୀତ ହୋଇ ତଳେ ପଡ଼ିଯାଇଥିଲେ ଏବଂ କାନ୍ଦି ଉଠିଥିଲେ। ଏହାର ପ୍ରତିଶୋଧ ନେବାକୁ ଅଭିଯୁକ୍ତ ଜଣକ ପ୍ରଥମେ କୁକୁରଟିକୁ ଲାଠିରେ ପିଟିଥିଲେ, ଯାହା ଫଳରେ କୁକୁରଟି ଗୁରୁତର ଆହତ ହୋଇଥିଲା। ଏହା ପରେ ସେ କୁକୁରଟିକୁ ନିଜ ସ୍କର୍ପିଓ ଗାଡ଼ିରେ ବାନ୍ଧି ସ୍ପୋର୍ଟସ ସିଟି ଅଞ୍ଚଳ ନିକଟରେ 12 କିଲୋମିଟର ଯାଏ ଘୋଷାରି ଘୋଷାରି ନେଇଥିଲେ। କୁକୁରର ମାଲିକ ସୁଧୀର ଇନ୍ଦୋରିଆଙ୍କ ଅଭିଯୋଗ ଅନୁଯାୟୀ, ଅଭିଯୁକ୍ତ ତାଙ୍କୁ ମଧ୍ୟ ପୋଲିସରେ ଅଭିଯୋଗ କଲେ ହତ୍ୟା କରିବେ ବୋଲି ଧମକ ଦେଇଥିଲେ।

ଆହତ କୁକୁରଟିକୁ ସ୍ଥାନୀୟ ଲୋକମାନେ ଉଦ୍ଧାର କରି ତୁରନ୍ତ ସ୍ଥାନୀୟ ପଶୁ ଚିକିତ୍ସାଳୟରେ ଭର୍ତ୍ତି କରିଥିଲେ। ଯେଉଁଠାରେ କୁକୁରଟିର ଚିକିତ୍ସା ଜାରି ରହିଛି। ପୋଲିସ ଏହି ଘଟଣାରେ ଅଭିଯୁକ୍ତଙ୍କ ବିରୋଧରେ ପଶୁ ନିର୍ଯାତନ ଆଇନ ଅନୁଯାୟୀ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। 

ଏହି ଘଟଣା ସ୍ଥାନୀୟ ଅଞ୍ଚଳରେ ବ୍ୟାପକ ଆଲୋଚନାର ବିଷୟ ହୋଇଛି ଏବଂ ଲୋକମାନେ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରୁଛନ୍ତି। ଏହା ପଶୁ ଅଧିକାର ଏବଂ ଦାୟିତ୍ଵପୂର୍ଣ ପୋଷା ପ୍ରାଣୀ ପାଳନ ଉପରେ ଆଲୋଚନାକୁ ପୁନଃ ଜାଗ୍ରତ କରିଛି।